Čyrvonaja ikra — adzin z samych darahich dalikatesaŭ. Tym nie mienš mienavita hety pradukt niaźmienna padajecca da navahodniaha stała kožnaje 31 śniežnia. Smak čyrvonaj ikry dobra znajomy darosłym i dzieciam, adnak, kab atrymać asałodu ad upadabanaha pačastunku, treba viedać tonkaści vybaru. Jak pravilna vybrać čyrvonuju ikru i jak vyhladaje jaje padrobka, raskazała namieśnik hałoŭnaha doktara Minskaha abłasnoha centra hihijeny, epidemijałohii i hramadskaha zdaroŭja Iryna Miłanovič, piša «Źviazda».
— Iryna Uładzimiraŭna, čym karysnaja čyrvonaja ikra?
— Čyrvonaj nazyvajuć ikru łasasiovych ryb. U kožnaj ryby jana adroźnivajecca pa vyhladzie, ale ŭsia jana maje šerah karysnych ułaścivaściaŭ dziakujučy vitaminam i mikraelemientam. Najpierš heta vitaminy A, D, E, folijevaja kisłata, kalcyj, fosfar, białok, polinienasyčanyja tłustyja kisłoty.
— Jak nie kupić padrobku? Pierad navahodnimi śviatami dzie tolki ni pradajecca hety dalikates…
— Pierš za ŭsio, ikru varta kuplać tolki ŭ pravieranych handlovych punktach i ni ŭ jakim razie nie z ruk. Abaviazkova patrabujcie dakumienty, jakija paćviardžajuć jakaść, kali ŭ vas uźnikli sumnievy. Na etykietcy pavinny być paznačanyja vytvorca, imparcior i dźvie daty — vyrabu i fasoŭki.
— Zdajecca, nie lišnim budzie zahadzia pacikavicca miescami łoŭli…
— Źviartajcie ŭvahu na datu vytvorčaści. Pierš za ŭsio, kab nie kupić praterminavany pradukt. Akramia taho, jość i taki niuans: kali heta lipień ci žnivień, značyć, ikra sabrana i zakansiervavana nieŭzabavie paśla nierastu.
Jak praviła, u šklanych słoikach ikra maje termin prydatnaści da 9 miesiacaŭ, u mietaličnych — da hoda. Važny momant: termin prydatnaści na blašancy pavinien być vycisnuty vonki, a nie ŭnutr, inakš heta padrobka. Praviercie, nakolki ščylna zakatany słoik ci blašanka. Viečka nie pavinna być uzdutym navat niaznačna. Advarotnaje śviedčyć pra toje, što ŭ blašancy žyvie i raźvivajecca niebiaśpiečnaja dla zdaroŭja mikrafłora.
— Što jašče važna?
— Vid ryby, numar zavoda-vytvorcy i źmieny, asartymientny znak «Ikra», indeks rybnaj pramysłovaści i najaŭnaść inšych praduktaŭ. Zvyčajna heta sol i raślinny alej. Časam dadajuć kansiervanty, jakija padaŭžajuć termin zachoŭvańnia, — alerhikam varta paźbiahać takoha dalikatesu.
— Jakija dadatkovyja tonkaści dazvolać adroźnić padrobku ad sapraŭdnaj ikry?
— U słoiku pavinna adsutničać vadkaść. Što da blašanaj nieprazrystaj tary, to možna patreści jaje i prysłuchacca: ci niama ŭsiaredzinie vadkaści. Pach praduktu musić być pryjemnym rybnym, ale słabym. Mocny pach kaža pra toje, što ikra niaśviežaja ci štučna aramatyzavanaja. Začarpnicie ikru łyžkaj i razhledźcie: jakasnaja ikra ščylnaja, pruhkaja, rassypistaja i nie sklejvajecca. Pra nizkuju jakaść śviedčyć zanadta słabaja ci vielmi ščylnaja abałonka ikrynak. Jany pavinny być adnolkavaha koleru i pamieru.
Ci jość karyść u «imitacyi»?
Rybin tłušč — słovazłučeńnie, znajomaje kožnamu. Adnak sustrakajucca blašanki, na jakich napisana «rybny tłušč». Roźnica ŭsiaho ŭ dźvie litary zdajecca nieistotnaj, adnak rybin tłušč čaściej pradajecca jak leki z usimi składanaściami ŭ rehistracyi srodku. Atrymlivajuć jaho vyklučna ź piečani ryb tłustych parod. U im tracina sutačnaj dozy vitaminaŭ A, D, jodu i žaleza. Dla padrychtoŭki charčovaj dabaŭki — rybnaha tłušču — pierapracoŭvajuć lubych dastupnych ryb, a ŭ raschod idzie nie tolki piečań, ale i ŭsie vantroby całkam. Vitaminaŭ u rybnym tłuščy ŭ dziasiatki razoŭ mienš, ale kisłaty amieha-3, nieabchodnaj dla ruchomaści sustavaŭ i pravilnaj raboty mozhu, tam udvaja bolš.
Spačatku trybuch dla rybnaha tłušču vyvalvajuć u vielizarnuju miasasiečku i dobra pravarvajuć. Ale robiać heta nie ŭ kastruli na plicie, a pry dapamozie pompaŭ haniajuć farš pa trubach i apracoŭvajuć z usich bakoŭ haračaj paraj. Prajšoŭšy skroź łabirynty trub, farš ad nahrevu jak by raspłastoŭvajecca na vadu, tłušč i białok. Zatym traplaje ŭ vielizarnuju pralnuju mašynu, baraban jakoj krucicca z chutkaściu da dźviuch tysiač abarotaŭ u chvilinu, padzialaje hetyja płasty. Vadu źlivajuć u kanalizacyju, reštki trybuchoŭ — u śmiećcie, a voś kaštoŭny tłušč zalivajuć u admysłovuju jomistaść. Hety vytapleny rybny tłušč u kantejnierach vahoj u tonu raźjazdžajecca pa zavodach. Vytvorcy pryznajucca: biez farbavalnikaŭ u psieŭdaikornym biźniesie nikudy.
U asnoŭnym vykarystoŭvajucca naturalnyja farbavalniki. Heta «karmin» (Je120), jaki atrymlivajuć z nasiakomych, i farbavalnik «papryka» (Je160S) raślinnaha pachodžańnia. U nievialikaj kolkaści dadajucca i sintetyčnyja farbavalniki, što zabiaśpiečvajuć stabilnaść afarboŭki padčas zachoŭvańnia.
Kab atrymałasia ikra, rybny bulon źmiešvajuć z alhinatam. Toj jak byccam nalipaje na kropli bulonu, a dalej hety kamiačok boŭtajecca pa trubach, paralelna achałodžvajecca i zastyvaje. Samaje hałoŭnaje — nie pierabrać, bo kali alhinatu nalić zanadta šmat, to ikrynki buduć humovyja, a kali mała — to ikra pieratvorycca ŭ piure.
Potym hetyja šaryki atrasajuć ad viazkaha rastvoru i pramyvajuć. Adnak smak u hetaha vyrabu pakul adsutničaje. Kab imitacyja nahadvała naturalnuju ikru nie tolki vonkava, ale i pa smaku, u jaje dadajuć sol i roznyja aramatyzatary.
Sumieś składajecca z soli, cukru i kompleksnaj charčovaj dabaŭki, asnoŭnym kampanientam jakoj źjaŭlajecca, naprykład, sušany ekstrakt z pancyra rakapadobnych. Heta dazvalaje ikry nadać smak naturalnaha praduktu. Zatym u ikru ŭlivajuć klejkuju vadkaść: tak i bolš naturalna vyhladaje, i lahčej mazać na buterbrod.
Ale jość jašče adna chitraść: na imitacyju ikry niama nijakich HOSTaŭ. Sastaŭ zastajecca na sumleńni vytvorcy. Tamu niekatoryja, kab sekanomić, u takija słoiki naohuł nijakaha rybinaha tłušču nie dadajuć. I taki pradukt nie vytrymlivaje nahrevu. A značyć, na ŭpakoŭcy treba ŭčytvacca nie tolki ŭ sastaŭ, ale i šukać nadpis «pasteryzavanaja».
Kali pravilna vybrać blašanku, to imitavanaja ikra akažacca smačnaj i karysnaj. Hałoŭnaje, kab vytvorca sapraŭdy paznačaŭ, što hetaja ikra tolki «prykidvajecca» naturalnaj. Inakš kažučy, heta ŭžo nie imitacyja, a padrobka.
Ciapier čytajuć
Bietanavać hrošy — nacyjanalnaja ideja biełarusaŭ? Paraŭnali tempy budaŭnictva ŭ Biełarusi, Polščy, Litvie i Łatvii11
Kamientary