Biełaruski rynak novych aŭto čakaje tatalnaja kitaizacyja. Voś jakija brendy pryjduć na źmienu suśvietnym
Uzrovień łajalnaści da aŭtamabilaŭ kitajskich brendaŭ z boku biełarusaŭ raście. Sioleta na pieršaje miesca pa prodažy vyjšli mienavita kitajskija aŭto. I ich dola praciahnie raści, prahnazujuć pradstaŭniki dyleraŭ. Tłumačym čamu.
Apošnija hady najbolš značnuju dolu siarod pradavanych u Biełarusi novych aŭto zajmali tyja, što vyrablalisia na terytoryi RF. Dola takich mašyn składała bolš za 80%.
Adnak paśla napadu Rasii na Ukrainu suśvietnyja aŭtavytvorcy, jakija prysutničali na rasijskim rynku, adzin za adnym spačatku zajavili ab prypynieńni svajoj dziejnaści na terytoryi RF, a paźniej pačali kazać pra poŭny sychod.
RF pakinuli takija hihanty, jak VW, Renault, Ford, BMW i šerah inšych aŭtavytvorcaŭ. Tak, na maskoŭskim zavodzie Renault ciapier zamiest aŭtamabilaŭ francuzskaha brenda, jakija ŭvachodzili ŭ top-5 pradavanych aŭto ŭ Biełarusi, buduć vypuskać «Maskvič», jaki pa sutnaści źjaŭlajecca kitajskim JAC JS4.
Na kalininhradskim zavodzie «Aŭtator», dzie da vajny źbirali BMW, Kia i Hyundai, da kanca hoda płanujuć naładzić vypusk aŭtamabilaŭ troch kitajskich brendaŭ.
Na zavodzie Sollers, dzie raniej vypuskali Ford Transit, ciapier buduć źbirać kitajskija mikraaŭtobusy i hruzaviki JAC. Adnu z madelej, jakuju płanujuć źbirać u Rasii, u Biełarusi ŭžo vypuskajuć z 2018 hoda. Robiać heta pad brendam MAZ.
Adnym z najbolš vierahodnych pretendentaŭ na zborku mašyn na byłym zavodzie Nissan u Rasii nazyvajuć kitajski FAW.
Inšyja suśvietnyja aŭtavytvorcy, jakija zajavili pra sychod z rynku, čakajuć pakupnikoŭ svaich aktyvaŭ u RF. Siarod ich VW, Toyota i Mercedes-Benz.
Aproč kitajskich vytvorcaŭ na rynak RF prychodzić iranskaja kampanija Iran Khodro. Dniami Iran padpisaŭ z Rasijaj miemarandum ab eksparcie svaich aŭtamabilaŭ na 300 miljonaŭ dalaraŭ. Biełarusam marka viadoma tym, što raniej u nas užo źbirali iranskija Samand.
Pakul rasijskija zavody, na jakich da niadaŭniaha času vypuskali aŭtamabili suśvietnych brendaŭ, pierabudoŭvajucca pad zborku kitajskich mašyn, u Biełarusi pačynajuć źjaŭlacca novyja dylery, jakija pradajuć novyja dla nas brendy z Kitaja. Tak, naprykład, u kastryčniku ŭ Minsk prybyła pieršaja partyja liftbekaŭ JAC J7. Aŭtamabili marki JAC pačynajuć pradavać i tam, dzie raniej pradavali Mazda. Inšyja dylery prapanujuć pakupnikam bahi i kvadracykły kitajskaha vytvorcy Hisun. Taksama na biełaruskim rynku aktyŭna prasoŭvajucca kitajskija Haval i Chery.
Imavierna, dola aŭto z kitajskimi karaniami na našym rynku praciahnie raści, bo na zavodach, dzie raniej rabili BMW, Renault ci Nissan, ciapier buduć źbirać JAC, Chery i FAW.
Zakanadaŭstva JEAES aryjentavana na toje, kab u krainy sadružnaści impartavałasia jak maha mienš transpartu z trecich krain. Vysokija zaharadžalnyja pošliny i inšyja patrabavańni robiać impart mašyn nie tolki darahim, ale i dastatkova składanym. Mienavita tamu bolšaść novych aŭto, jakija pradavali ŭ našych sałonach, byli zrobleny na terytoryi Rasii, dzie skancentravana asnoŭnaja masa zavodaŭ.
«Naša Niva» — bastyjon biełaruščyny
PADTRYMAĆČytajcie taksama:
U Rasii źbirajucca vypuskać ułasnyja miniveny. Tolki pahladzicie, jak jany vyhladajuć i za kolki buduć pradavacca
Śpiavačku Meryjem Hierasimienka na praciahu dvuch hadoŭ źbivaŭ muž43
Śpiavačku Meryjem Hierasimienka na praciahu dvuch hadoŭ źbivaŭ muž
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary