Dva viadučyja supracoŭniki ANT syšli z kanała i źjechali za miažu
Jak stała viadoma «Našaj Nivie», dziaržaŭny kanał ANT z pačatku hoda straciŭ dvuch viadučych supracoŭnikaŭ, jakija ŭciakli za miažu. Heta były kiraŭnik infarmacyjnaha viaščańnia i jeŭrapiejskaha biuro ANT Rusłan Paddubski, a taksama supracoŭnica puła Łukašenki Natalla Stelmach.
Rusłan Paddubski niekali ŭznačalvaŭ usio infarmacyjnaje viaščańnie ANT, paśla čaho staŭ šefam jeŭrapiejskaha ofisa kanała.
Apošni čas jon i nie žyŭ u Biełarusi, a pracavaŭ z adnoj ź jeŭrapiejskich krain, dzie vučacca jaho dzieci.
Apošni siužet ź jahonym udziełam na ANT — 25 lutaha. Jon raskazvaŭ pra reakcyju jeŭrapiejskich palitykaŭ na vajnu, a taksama cytavaŭ marhinalnych zachodnich dziejačaŭ, jakija pravodzili liniju «nam treba zrazumieć i pryniać patrabavańni Rasii».
Paśla hetaha nivodnaha siužeta za jahonym proźviščam na kanale nie vyjšła. Jak nam viadoma, Paddubski zvolniŭsia z kanała, nie staŭ viartacca ŭ Biełaruś i zastaŭsia žyć u adnoj z krain ES.
Kamientavać svajo rašeńnie «Našaj Nivie» nie staŭ.
«Kamientaroŭ davać nie budu, bo i kamientavać tut niama čaho», — adkazaŭ jon na zapyt u miesiendžary.
Natalla Stelmach — adna z zorak łukašenkaŭskaha pułu. Na kanale jana pracavała bolš za 10 hadoŭ, joj było pryjemna zdymać prapahandysckija roliki i krucicca ŭ kołach łukašenkaŭskaj namienkłatury.
Jana sprabavała ramantyzavać hetych ludziej u svajoj prahramie «Dvoje iz Dvorca», kazała Łukašenku, što «hramadstva čakaje, kali vy ŭžo pryznajecie Krym?».
Jana rychtavała repartažy z vybaraŭ-2020 i niadaŭniaha refierendumu. Ale paśla 9 sakavika na ANT nie vychodziła jaje siužetaŭ.
Razam sa svaim partnioram jana pakinuła Biełaruś i pierabrałasia ŭ Mieksiku.
Pierajezd žurnalistki zaŭvažyŭ kanał «MotolkoPomohi». U svaim instahramie Stelmach apisvaje žyćcio ŭ Łacinskaj Amierycy.
Jak nam viadoma, u Biełaruś jana viartacca nie źbirajecca, a pryčynaj sychodu taksama ličyć dalejšuju niemahčymaść apraŭdańnia dziejańniaŭ łukašenkaŭskaha režymu i Rasii.
Stelmach na pytańni «Našaj Nivy» adkazvać nie stała.
Čytajcie taksama:
«Lohkaść, svaboda, tvorčaść — na kožnym kroku». Homielskaja prapahandystka adpačyvaje ŭ krainach, jakija ŭ pracoŭny čas palivaje brudam
«Kudy vas supravadžać?» Apublikavali źliŭ telefonnych razmoŭ Bałaby i prapahandystki BT Lebiedzievaj
«Nie zdoleli pierastroicca na mirnuju chvalu». Prapahandyst Kazakoŭ krytykuje džyna, jakoha sam vypuściŭ z butelki
Ciapier čytajuć
«Ja jašče moh sumniavacca ŭ sabie. Ale kali Maša takoje zrabiła!» Nieviadomyja fakty pra Viktara Babaryku raskazała jaho advakatka Natalla Mackievič44
Kamientary