Źjaviłasia videa Antonaŭskaha mosta ŭ Chiersonie paśla ŭčarašnich udaraŭ USU
Akupacyjnyja ŭłady śćviardžajuć, što było čatyry papadańnia ŭ most, taksama paciarpieła budaŭničaja technika.
Raniej paviedamlałasia, što paśla načnych udaraŭ rasijskija vojski atačyli most z dvuch bakoŭ, miascovych žycharoŭ blizka nie padpuskali. Pra heta paviedamlaŭ pieršy namieśnik kiraŭnika abłsavieta Chiersonščyny Juryj Sabaleŭski.
Paviedamleńni pra ŭdary pa mastach kamientavała i kiraŭnica pres-centra AK «Poŭdzień» USU Natalla Humianiuk:
«Adpracavany ahniavy kantrol, jaki my trymali niekalki dzion tamu na hetym kirunku, i ŭ jaho jość svaje vyniki. Papadańni dastatkova «važkija» — jak pa Kachoŭskim, tak i pa Antonaŭskim moście», — paviedamiła jana.
U svaju čarhu, namieśnik kiraŭnika akupacyjnaj administracyi Chiersona Kirył Stramavusaŭ zajaviŭ, što kala mosta akupanty pačali ŭzvodzić pantonnuju pierapravu. Ciapier ruch praz Dniapro ŭ hetym rajonie ažyćciaŭlajecca z dapamohaj paroma.
Antonaŭski most praz Dniapro złučaje Chierson ź levabiarežnaj častkaj vobłaści, jakaja taksama znachodzicca pad rasijskaj akupacyjaj. Pa moście vojski Rasii pieravoziać techniku i bojeprypasy.
Brytanskaja raźviedka ličyć kantrol nad pierapravaj praz Dniapro klučavym faktaram zychodu bajoŭ na poŭdni Ukrainy. U Instytucie vyvučeńnia vajny (ISW) zajaŭlali, što ŭdary USU pa mastach vakoł Chiersona nakiravany na toje, kab pieraškodzić Rasii pierakinuć techniku, nie spyniŭšy pry hetym pastaŭku charčavańnia.
Ciapier čytajuć
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2121
Kamientary