Anatol Labiedźka, były staršynia Abjadnanaj hramadzianskaj partyi, prakamientavaŭ zatrymańnie siońniašniaha jaje lidara Mikałaja Kazłova i inšych partyjcaŭ.
27 lipienia stała viadoma, što zatrymanyja staršynia AHP Mikałaj Kazłoŭ i staršynia minskaj arhanizacyi partyi Aksana Alaksiejeva. Kazłova zatrymali ranicaj u Niaśvižy, dzie jon byŭ u svajoj maci.
«U mianie try viersii, čamu pryjšli da AHP.
Pieršaja: adnaviłasia praca partyi, zapracavali ofisy, Kazłoŭ pajechaŭ pa rehijonach. I ŭ situacyi, kali ŭłada vielmi zakłapočanaja luboj aktyŭnaściu, heta ŭziali na ałovak,
— miarkuje Anatol Labiedźka. — Druhaja viersija: heta źviazana niepasredna z asobaj Mikoły Kazłova. Jon ža pajšoŭ na adkrytaje supraćstajańnie ź siłavikami, kali admoviŭsia stavić podpis ab nierazhałošvańni paśla dopytu, zajaviŭ, što heta supiarečyć zakanadaŭstvu. Tysiačy ludziej padpisvali heta, a Kazłoŭ admoviŭsia.
Paśla byli sproby vycisnuć jaho z krainy, ale jon zaniaŭ pryncypovuju pazicyju zastavacca ŭ Biełarusi. I ciapier jon vyjazdžaŭ z krainy pa pracy, ale viarnuŭsia nazad. Heta stvaraje matyvacyju dla inšych ludziej u situacyi siońniašniaha napaŭkancłahiera: što možna niešta rabić u Biełarusi, možna pracavać i zastavacca čałaviekam.
Treciaja viersija — rychtujecca ž mižnarodnaja kanfierencyja pa situacyi ŭ Biełarusi. I kab u suviazi z hetaj kanfierencyjaj ludzi ŭnutry Biełarusi nie pradprymali aktyŭnaściaŭ, ułada pakazvaje muskuły, ukidvajučy čarhovuju porcyju strachu, pakazvaje hramadstvu, što pa-raniejšamu kantraluje situacyju.
Samaja vidavočnaja viersija, što ŭłada začyščaje palityčnyja partyi, pakul adpadaje. Bo pryjšli b nie kropkava, tolki da Kazłova i jaho atačeńnia, a i da inšych palityčnych struktur i ŭ rehijonach taksama».
Viadoma, što akramia Kazłova i Alaksiejevaj, nie vychodziać na suviaź jašče dva čałavieki z AHP.
Los zatrymanych na hety momant nieviadomy. U čym ich abvinavačvajuć — taksama.
«Sprabujem dałučyć advakataŭ, ale ź vierahodnaściu 90% zatrymanyja na Akreścina», — kaža Anatol Labiedźka.
Ciapier čytajuć
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary