€3,5 miljona za preparat. Novy rekordny zbor na lačeńnie dziciaci zakryty ŭsiaho za piać tydniaŭ
U pačatku krasavika byŭ zapuščany zbor srodkaŭ na lačeńnie 10‑miesiačnaha Alaksandra Jarša sa Słonima. U jaho redkaje hienietyčnaje zachvorvańnie — deficyt dekarbaksiłazy aramatyčnych L-aminakisłot (AADC).
Siońnia baćki dziciaci abviaścili pra zakryćcio zboru. Nieabchodnaja suma — €3,5 miljona — za piać tydniaŭ była całkam sabrana dziakujučy dapamozie nieabyjakavych ludziej i padtrymcy Ministerstva abarony Biełarusi, piša Onliner.by.
Deficyt dekarbaksiłazy aramatyčnych L-aminakisłot — heta spadčynnaja niejramietabaličnaja patałohija, źviazanaja z mutacyjaj hiena DDC. Chvaroba pryvodzić da parušeńnia vypracoŭki dofamina i sieratanina, z-za čaho ŭ dziaciej ź pieršych miesiacaŭ žyćcia raźvivajucca ciažkaja myšačnaja hipatanija, zatrymka raźvićcia i inšyja surjoznyja parušeńni.
Lačeńnie praduhledžvaje ŭviadzieńnie sučasnaha hienietyčnaha preparata «Eładakahien ekzuparvaviek». Pa sutnaści, heta štučny hien, jaki ŭvodzicca niepasredna ŭ hałaŭny mozh i zamianiaje paškodžany hien, dapamahajučy adnavić vypracoŭku nieabchodnych niejramiedyjataraŭ.
Sabranyja srodki dazvolać chłopčyku prajści lačeńnie ŭ Maskvie. U bližejšy čas jon adpravicca tudy dla pačatku terapii.
— Pa vynikach MRT z kantrastam Saša hatovy da apieracyi. Nam nie treba čakać 18 miesiacaŭ, chirurhi ŭžo hatovyja ŭziać jaho dla ŭviadzieńnia preparata. Pa słovach daktaroŭ, Saša vielmi dobry ŭ płanie raźvićcia, navat dla jaho dyjahnazu, u jaho jość vialikija šancy na paŭnavartasnaje žyćcio, — pisała maci chłopčyka ŭ kancy krasavika.
Paviedamlajecca taksama, što srodki, jakija zastanucca na dabračynnym rachunku, buduć nakiravanyja na dapamohu inšym dzieciam, jakija majuć patrebu ŭ lačeńni.
€3,5 miljona — novaja samaja vialikaja suma, jakuju źbirali na lačeńnie dziciaci ŭ Biełaruś. Raniej rekordnaj ličyłasia suma ŭ $2,9 miljona, jakuju na praciahu 9 miesiacaŭ udałosia sabrać dla Arcioma Padjałoŭskaha.
Kamientary