Spravu žurnalistki Ciny Pałynskaj usio ž pieradali ŭ prakuraturu
Spravu Ciny Pałynskaj z nahody dopisu pra patryjarcha Kiryła ŭ Fejsbuku śledčyja ŭsio ž pieradali ŭ prakuraturu.
Siłaviki pryjšli da połackaj žurnalistki Ciny Pałynskaj u niadzielu, 5 červienia. Nahodaj dla pieratrusu staŭ krytyčny post u Fejsbuku pra vizit u Biełaruś patryjarcha Kiryła.
U Ciny zabrali kampjutar. Pakolki ŭ sumcy i na fotaaparacie siłaviki znajšli stužki koleraŭ ściaha Ukrainy, heta stała dadatkovaj padstavaj dla sudovaha razhladu. Paśla pieratrusu žurnalistku advieźli na dopyt dy adpuścili.
Sud za stužki niapravilnych koleraŭ adbyŭsia 7 červienia — vynikam sudovaha razhladu staŭ štraf u 3200 rubloŭ.
Tady ž Cina Pałynskaja paviedamiła, što na jaje moža być zaviedzienaja kryminalnaja sprava. Havorka jakraz išła pra dopis, jaki na toj čas byŭ vydaleny, pra patryjarcha RPC Kiryła: «Sprava vyviedzienaja ŭ kampietencyju Śledčaha kamiteta. Usio budzie vyrašać linhvistyčnaja ekśpiertyza. Razam z tym buduć daśledavacca maje pavodziny ŭ sacsietkach na praciahu ŭsiaho… niespakojnaha času», — napisała žurnalistka.
U aŭtorak śledčyja prapanavali Cinie pryjści da ich, kab zabrać kampjutar. Kali žurnalistka pryjšła pa svaju techniku, daviedałasia, što sprava jaje zusim nie zakrytaja, jak jana spadziavałasia, a pieradajecca dalej u prakuraturu.
Pra heta Cina Pałynskaja paviedamiła na svajoj staroncy ŭ Fejsbuku: «Maja sprava pieradadzienaja ŭ prakuraturu. Ja nie tak zrazumieła ranišniuju razmovu pa telefonie: «Pryjdzicie za rečami. — I ŭsio? — I ŭsio». Nie. Prosta «ŭsio» śledčaha — heta nie toje, što razumieńnie vyznačeńnia «ŭsio» z punktu hledžańnia toj, kaho dapytvajuć, padazravanaj — ja nie viedaju, jak jany heta nazyvajuć. Dalej ci novy štraf źbirajem. Ci rečy źbirajem (heta ja ŭžo ravu)!! Siońnia mnie prosta viarnuli techniku (biaskonca doŭhi praces) i praviali ŭłasna daznańnie. U sensie, jany pytalisia, ja adkazvała… «Dalej, Cina Zacharaŭna, usio vyrašyć prakuratura».
Žurnalistka spadziavajecca, što ŭ prakuratury joj taksama pašancuje na «dobrych ludziej». «Pakul što ŭsie, kaho ja sustreła za hetuju historyju, — dobryja ludzi. Nie tyja, kamu za radaść mučyć inšych».
Ciapier čytajuć
Siłaviki śćviardžajuć, što zatrymali dvuch mužčyn za hałasavańnie na vybarach u KR. Ale ci možna hetamu vieryć?14
Kamientary