Skurko: Nie varta na budučyniu nakoplivać u sabie niejkuju złość ci nianaviść
Paŭlina Skurko, žonka palitźniavolenaha redaktara «Našaj Nivy» Andreja Skurko, atrymała ad muža z-za krataŭ list pad kruhłym numaram 100. Jon apisvaje svaje turemnyja budni ŭ kałonii pad Mahilovam i adnačasova, jak zaŭsiody, dzielicca histaryčnymi i fiłasofskimi refleksijami.
Atrymaŭ siońnia tvoj list i tak radavaŭsia, čytajučy, jak vy tam bavicie čas z kłubnicami, vaviorkami, zajcami i jak mały spaznaje śviet! Abaviazkova pachvali za mianie małoha. Jon taki małajčyna ŭ nas! (A my ŭ jaho)…
* * *
Siońnia samy doŭhi dzień hoda (i Kupalle). U nas uvieś čas idzie doždž, časam pieratvarajučysia ŭ zalevu. Trochi pachaładnieła — ale i dobra, što niama takoj haračyni, jak minułyja dni… Užo kala 8-j viečara, dzień byŭ doŭhi i nie tolki astranamična:).
* * *
Skončyŭsia karancin, mianie pieraviali ŭ atrad №7, bryhada 1. Umovy pobytavyja tut narmalnyja, kalektyŭ taksama, jość navat akvaryum z rybkami ŭ spalni.
Mnoha śviežaha pavietra — u pamiaškańniach tut, kaniečnie ž, nichto nie kuryć, [jak u SIZA]. Na terytoryi jość sportharadok z turnikami i trenažorami — pasprabuju schadzić, kali doždž ścichnie:)
Tut jość taksama stadyjon, dzie možna biehać — vyśvietlu ŭ dalejšym, jak tudy traplać. U atradzie vielmi čysta, jość sušyłki, kab sušyć rečy, pralnaja mašyna, chaładzilniki, televizar. Słovam, budu pakul abžyvacca:)…
* * *
Ad usich nas hety čas patrabuje ciarpieńnia i vytrymki. Škaduju strašna, što nie mahu vam tam dapamahać i padstrachoŭvać.…Užo ranica nastupnaha dnia. Spałasia dobra.
Usiu noč liŭ doždž, zaraz jon praciahvajecca. Schadziŭ na śniadanak — dyjabietyki tut charčujucca asobna. Dali ŭ dadatak da kašy masła, jajko i sok — słovam, možna žyć.
Zdaŭ siońnia ŭsie nieabchodnyja zajavy na zvanki i videazvanki, budu čakać zaćviardžeńnia…
* * *
Pa televizary zaraz pakazvali pieradaču pra vostraŭ Tenieryfie. Akazvajecca, u ich niama svajho piasku ŭ dastatkovaj kolkaści, i ŭłady zakuplali jaho ŭ Zachodniaj Sachary, kab zrabić plaž:)) Skazali taksama, što na vostravie žyvie kala miljona čałaviek — ja dumaŭ, razoŭ u dziesiać mieniej.
* * *
Taksama my chadzili siońnia ŭ kłub na videalekcyju pra škodu nakotykaŭ — na vialikim ekranie. Ja atrymaŭ vializnaje zadavalnieńnie — i infarmacyja novaja, i samo pačućcie, što ty možaš pajści ŭ kino. Niby jašče adzin krok da viartańnia ŭ narmalnaje žyćcio…
Da siaredziny dnia istotna schaładała ŭ nas — imža, viecier. Spadziajusia, u vas tam u dastatkovaj kolkaści jość švedryki, šapki, kurtki i čaj.
Zaŭtra 23-je — dzień naradžeńnia Mikoły Šakiela. Staŭ uspaminać, jak vinšavali jaho hod tamu. Kolki ŭsiaho adbyłosia za hety čas! A kolki za nastupny hod moža ŭsiaho novaha adbycca!
Ja, jak i ty, ščyra vieru, što ŭsio, Boh daść, skončycca dobra i my skora znoŭ budziem razam. Hałoŭnaje — bierahčy zdaroŭje i blizkich, zachoŭvać spakoj i ciarpieńnie. «Maksimalna zachavać siabie dla dalejšaha žyćcia», jak ty niekali skazała.
Dla mianie heta, u tym liku — napaŭnieńnie sensam i źmiestam majho ciapierašniaha pierabyvańnia. Usie drobnyja niazručnaści minajuć, a naźbiranaje ŭ sabie na budučyniu — zastajecca. Mienavita tamu, mnie zdajecca, nie varta na budučyniu nakoplivać u sabie niejkuju złość ci nianaviść. Zhadajem Mandełu ci Handzi.
Pisać Andreju Skurko treba na adras: Papraŭčaja kałonija №15, atrad 7 212013, Słaŭharadskaja šaša, 183, p/a Viejna, h. Mahiloŭ. Skurko Andreju Hienadzieviču
Ciapier čytajuć
Nad šerym kardynałam Nacbanka zhuścilisia chmary? Zatrymali jaho siabra, byłoha vykanaŭčaha dyrektara Banka raźvićcia7
Kamientary