Safija Sapieha nie stała abskardžvać prysud

Hetuju infarmacyju paćvierdziła krynica Zerkalo.io, znajomaja z chodam spravy — treba pahasić iski, a potym chadajničać ab pamiłavańni.

«Prysud Hrodzienskaha abłasnoha suda ad 6 maja 2022 hoda ŭ dačynieńni da Safii Sapiehi nie abskardžany i ŭstupiŭ u zakonnuju siłu», — havorycca ŭ paviedamleńni suda.

«Nie, prysud nie abskardzili. Ciapier abvieščany zbor srodkaŭ na pahašeńnie iskaŭ ad supracoŭnikaŭ pravaachoŭnych orhanaŭ, pakolki pahašeńnie iskaŭ źjaŭlajecca abaviazkovaj umovaj dla padačy chadajnictva ab pamiłavańni», — raspaviała krynica.

Zbor srodkaŭ dla pahašeńnia iskaŭ da Safii Sapiehi abviaściła rasijskaja žurnalistka i hramadski dziejač, člen Savieta pry prezidencie RF pa raźvićci hramadzianskaj supolnaści i pravach čałavieka Kaciaryna Vinakurava.

«Safija była asudžanaja ŭ Minsku na šeść hadoŭ pazbaŭleńnia voli za toje, što viała apazicyjny telehram-kanał. Jana pryznała svaju vinu i atrymała pry hetym vielizarny termin. Zaŭvažu, što režym Łukašenki nie liču choć kolki družalubnym Rasii. My płacim jamu, jon nam uśmichajecca. Safii Sapiezie zdradziŭ jaje ŭłasny małady čałaviek, Pratasievič. Ale samaje hałoŭnaje — jana hramadzianka RF. Hramadzianie RF nie dzielacca na «našych» i «nie našych». Jana ŭ biadzie, i jaje treba ratavać. Ja liču, što treba damahčysia, kab jaje ci pamiłavaŭ Łukašenka, ci departavali da nas, u Rasiju», — zajaviła Vinakurava.

***

23 maja 2021 hoda Raman Pratasievič i Safija Sapieha lacieli rejsam avijakampanii Ryanair pa maršrucie «Afiny — Vilnia». Da Vilni Sapieha i Pratasievič nie dalacieli — samalot pryziamliŭsia ŭ Minsku z-za paviedamleńnia pra bombu na borcie. Maładych ludziej źniali z rejsa i zatrymali.

14 červienia na bryfinhu biełaruskich uładaŭ ab pasadcy samalota, u jakim udzielničaŭ i sam Raman Pratasievič, upieršyniu byli aficyjna nazvanyja artykuły, pa jakich padazrajuć Sapiehu. Kiraŭnik SK Dźmitryj Hara raspavioŭ, što pieršapačatkova dziaŭčynu zatrymali ŭ aeraporcie pa padazreńni ŭ hrubym parušeńni paradku, ale «praktyčna adrazu jana była pryciahnutaja ŭ jakaści abvinavačanaj pa inšaj kryminalnaj spravie» — za raspalvańnie sacyjalnaj varožaści.

Praź niekalki dzion paśla bryfinhu Sapiehu i Pratasieviča pieraviali pad damašni aryšt. Niezadoŭha da zaviaršeńnia rasśledavańnia pa spravie Sapiehi jaje ajčym raspavioŭ, što dziaŭčyna napisała prašeńnie ab pamiłavańni na imia Alaksandra Łukašenki i što ŭžo bolš za dva miesiacy nie žyvie z Pratasievičam i znachodzicca pad chatnim aryštam u kvatery ŭ Lidzie.

U śniežni Safii vystavili abvinavačvańnie pa siami artykułach KK:

— č. 3 art. 130 (raspalvańnie varožaści ŭ składzie hrupy asob),

— č. 4 art. 16 i 364 (arhanizacyja hvałtu i pahroz u dačynieńni da milicyjanieraŭ),

— č. 4 art. 16 i 365 (arhanizacyja pahroz, paklopu ci raspaŭsiudžvańnie źviestak pra milicyjanieraŭ),

— č. 4 art. 16 i 366 (arhanizacyja hvałtu i pahroz u dačynieńni da słužbovych asob),

— č. 4 art. 16 i 389 (arhanizacyja pahrozy zabojstvam ci hvałtu ŭ dačynieńni da sudździaŭ),

— č. 4 art. 16 i 198 (arhanizacyja pieraškod dziejnaści žurnalistaŭ z pahrozaj užyvańnia hvałtu),

— č. 1 i 2 art. 203-1 (naŭmysny zbor infarmacyi i piersanalnych źviestak inšaj asoby).

Safiju Sapiehu pryznali vinavataj pa č. 3 art. 130 i č. 1 art. 179 (niezakonnyja zbor abo raspaŭsiudžvańnie źviestak ab pryvatnym žyćci, jakija składajuć asabistuju abo siamiejnuju tajamnicu inšaj asoby, bieź jaje zhody, jakija pryviali da pryčynieńnia škody pravam, svabodam i zakonnym intaresam paciarpiełych).

• 0
• 0
• 0
• 4
• 1
• 4
• 12
• 0