«Maralna-psichałahičny stan asabovaha składu najvyšejšy». Hienierał-majoru zadali pytańni pra biełaruskaje vojska. Voś što jon adkazaŭ
U kancy sakavika čytačka «Našaj Nivy» patelefanavała na pramuju liniju Ministerstva abarony. Na jaje pytańni adkazali piśmova. Publikujem hety list.
Čytačka Luboŭ pacikaviłasia, jaki ciapier maralny nastroj u biełaruskich sałdat i ci nakiroŭvajecca ŭ poŭnym pamiery hrašovaje finansavańnie «dla zabieśpiačeńnia vajskovaj achovy mirnaha nieba krainy». Adkaz žančyna atrymała ad hienierał-majora Leanida Kasinskaha, načalnika hałoŭnaha ŭpraŭleńnia ideałahičnaj pracy Ministerstva abarony.
«Maralna-psichałahičny stan asabovaha składu najvyšejšy. Uzbrojenyja siły hatovyja vykanać zadačy, pastaŭlenyja prezidentam Respubliki Biełaruś i ministram abarony.
Vas nie pavinna turbavać, ci ŭ poŭnym abjomie ažyćciaŭlajecca finansavańnie Uzbrojenych sił Respubliki Biełaruś. Hałoŭnaje, što jany zabiaśpiečvajuć mirnaje nieba nad hałovami našych hramadzian».
Hienierał-major Leanid Kasinski ŭ liście ŭdakładniŭ, što «biełaruskija vajennasłužačyja vykonvajuć zadačy ŭ adpaviednaści z płanam padrychtoŭki Uzbrojenych sił pa pryznačeńni ŭ 2021/2022 navučalnym hodzie, a taksama ŭ chodzie mierapryjemstvaŭ pa ŭzmacnieńni achovy Dziaržaŭnaj miažy Respubliki Biełaruś tolki ŭ miežach terytoryj našaj krainy i ŭdzieł u śpiecyjalnaj vajennaj apieracyi Uzbrojenych sił Rasijskaj Fiederacyi na terytoryi Ukrainy nie prymajuć».
Taksama na pramoj linii čytačka spytała, kali pierastanuć adpraŭlać na navučańnie biełaruskich vajskoŭcaŭ va ŭstanovy Rasijskaj Fiederacyi.
«Respublika Biełaruś nakiroŭvała i budzie nakiroŭvać na navučańnie svaich vajskoŭcaŭ u Rasijskuju Fiederacyju», — skazana ŭ adkazie.
Kamientary