Palityki i ekśpierty ličać, što ŭvarvańnie Rasii va Ukrainu pierachodzić u novuju fazu. Rasijskija vojski pierahrupoŭvajucca va ŭschodnija rajony krainy, na Danbas, i tam zaraz skancentrujecca ich nastup.
Vadzim Dzienisienka, daradca kiraŭnika ŭkrainskaha MUS, padkreślivaje, što chod dalejšych bajavych dziejańniaŭ na Danbasie vyznačyć vyniki ciapierašniaj stadyi vajny ci całkam usiaho supraćstajańnia.
Polski hienierał Miečysłaŭ Bieniek, były namieśnik kiraŭnika stratehičnych siłaŭ NATA, i analityk Jarasłaŭ Volski prakamientavali dla onet.pl situacyju na ŭschodnim ukrainskim froncie.
Hienierał Bieniek vyznačaje pryčyny, jakija vymusili rasijskuju armiju pierahrupavacca na Danbas. Zhodna ź im, rasijskaje kamandavańnie narešcie zrazumieła, što jano nie moža vieści hetuju vajnu ŭ niekalkich kirunkach i pavinna skancentravacca na adnym. Akramia hetaha, rasijanie atrymali nastolki vialikija straty, što dla ich heta stała prosta haniebnaj situacyjaj. Ciapier jany vyrašyli atakavać uschod Ukrainy i pašyrać pamier akupavanych terytoryj Danieckaj i Łuhanskaj abłaściej, a taksama sprabavać stvaryć suchaputny kalidor ad Kryma da Rastova-na-Danu.
Abodva analityki ličać, što
meta rasijan numar adzin — zachapić Maryupal, pryčym nie tolki pa stratehičnych pryčynach, ale i praz toje, što dla ich heta ciapier «sprava honaru». Bieniek dadaje, što, napeŭna, u Maryupali nie budzie pałonnych i što ruskija, chutčej za ŭsio, pažadajuć źniščyć usich bajcoŭ pałka «Azoŭ», jaki abaraniaje horad.
Volski ličyć, što Rasija moža nacelvacca na pramysłova raźvityja rajony ŭschodu Ukrainy, bo ich strata doraha abydziecca Ukrainie. Razmova idzie pra trochkutnik pamiž haradami Dniepr, Zaparožža i Danieck, dzie, chutčej za ŭsio, i buduć skancentravanyja asnoŭnyja ŭdary rasijan.
Ale ž akupacyja hetych terytoryj moža akazacca dla Rasii niaprostaj zadačaj. Na ŭschodzie rasijanie nie majuć dastatkovych dla hetaha resursaŭ, i im treba jašče niedzie miesiac, kab pierahrupavacca i dasłać na front śviežyja siły. Tamu pytańnie ŭ tym, jakim budzie stanovišča na froncie praź miesiac.
Abnavić siły ruskim budzie nie tak prosta. U bližejšy čas, kaža Bieniek, Rasija zdoleje pryciahnuć tolki tych vajskoŭcaŭ, što ŭžo pryzvanyja na vajennuju słužbu, to-bok prykładna 50 tysiač čałaviek. Na toje, kab papoŭnić imi armiju, Kramlu treba nie mienš za čatyry miesiacy, i nieviadoma, nakolki novyja sałdaty buduć hatovyja vajavać.
Pucin staŭ achviaraj svajoj prapahandy
Polski hienierał raspaviadaje, što nie čakaŭ ad Rasii sproby šyrokamaštabnaha nastupleńnia, a chutčej vieryŭ, što Maskva adrazu skancentrujecca na suchaputnym kalidory ŭ Krym. Ale ž Rasija admoviłasia ad stratehij, jakija rasijskija aficery vučyli ŭ vajennych akademijach, i paličyła, što ŭkraincy buduć sustrakać akupantaŭ z kvietkami.
Pucin niedaacaniŭ rašučaść ukraincaŭ i Zachadu, jaki akazvaje im padtrymku, a taksama pieraacaniŭ moc rasijskaj armii. Palityk staŭ achviaraj svajoj prapahandy pra toje, što rasijskaja armija — mocnaja, niepieramožnaja i sučasnaja.
Praz hetyja pamyłki rasijanie nie zdoleli ni zachapić usiu Ukrainu, ni padzialić jaje pa linii Dniapra. Zastaŭsia treci varyjant — nastup na Danbas, jaki pradstaŭlajuć rasijskamu narodu jak «vyzvaleńnie našych bratoŭ».
Bieniek ličyć, što rasijanie buduć ciahnuć čas, kab atrymać jak maha bolš spryjalnyja ŭmovy dla budučaha pieramirja, i paralelna z hetym udzielničać u pieramovach.
Chutčej za ŭsio, jany pažadajuć aficyjnaha pryznańnia niezaležnaści akupavanych terytoryj Danbasa, aneksii Kryma i suchaputnaha kalidora. Taksama Maskva, napeŭna, choča dakładnych śviedčańniaŭ taho, što Ukraina nie dałučycca da NATA. Paśla hetaha, mierkavana, Kreml paličyć mahčymym abvieścić ab svajoj «pieramozie».
Ale ž nie fakt, što Ukraina prajhraje schvatku z Rasijaj na Uschodzie, tłumačyć Jarasłaŭ Volski. Ukrainskaja armija padrychtavanaja našmat lepiej, čym heta zdavałasia da pačatku vajny, i NATA jaje vielmi padtrymlivaje.
Zaraz, napeŭna, ukrainskija vojski pieraviaduć častku svaich siłaŭ na ŭschod, kab padtrymać tyja siły, što ŭžo znachodziacca na Danbasie. Ukraincy mohuć skancentravać u tym rajonie šmat vojskaŭ, tamu schvatka za Danbas moža akazacca bolš roŭnaj pa siłach, čym zdajecca zaraz.
Rasija vykarystoŭvaje kasietnyja bojeprypasy va Ukrainie. Čamu jany takija niebiaśpiečnyja
Kolki zapłacili za pierasyłku rečaŭ rasijskija sałdaty-maradziory?
«Naša Niva» adnaŭlaje zbor danataŭ — padtrymać prosta
Ciapier čytajuć
Kiełahu pakazali kampramietujučyja videamateryjały na biełaruskuju apazicyju? Tak miarkuje Łatuška18
Kamientary