Kanstytucyjny sud pryznaŭ, što sankcyi stvarajuć «peŭnyja składanaści» dla ekanomiki i hramadzian, i nazvaŭ ich pieraśledam ludziej za palityčnuju pazicyju

Pra jakija pahrozy kazali pradstaŭniki ŭrada ŭ sudzie? Sankcyi zakranajuć finansavy siektar, siektar strachavańnia, rynak naftapraduktaŭ i kalijnych uhnajeńniaŭ, vytvorčaść tytuniovych vyrabaŭ, internet i telefonnyja kamunikacyi, rynak tavaraŭ i technałohij vajskovaha i dvajnoha pryznačeńnia, rynak avijapieravozak. 

Saviet ministraŭ ličyć, što pryniatyja zachodnimi krainami abmiežavańni supiarečać Statutu AAN, Usieahulnaj dekłaracyi pravoŭ čałavieka, Mižnarodnamu paktu ab ekanamičnych sacyjalnych i kulturnych pravach, Mižnarodnamu paktu ab hramadzianskich i palityčnych pravach.

Kali pahladzieć lubuju spravazdaču ab pravach čałavieka ŭ Biełarusi, u joj budzie pieralik ź dziasiatkaŭ parušeńniaŭ sa spasyłkaj na hetyja ž dakumienty. Ale biełaruskija ŭłady ihnarujuć, naprykład, rašeńni Kamiteta pa pravach čałavieka AAN, bo ličać, što heta ŭsiaho tolki rekamiendacyja. U spravie ž z sankcyjami sami spasyłajucca na hetyja dakumienty. 

Kanstytucyjny sud padzialaje zakłapočanaść urada i ličyć, što sankcyi «stvarajuć peŭnyja składanaści» ŭ dziejnaści arhanizacyj, uskładniajuć realizacyju ekanamičnych, sacyjalnych i hramadzianskich pravoŭ i svabod hramadzian.

Sud spasyłajecca na niekatoryja rezalucyi Hienasamblei AAN, dzie krytykujecca prymianieńnie adnabakovych sankcyj. Zrešty, ciapier zachodnija sankcyi nielha nazvać adnabakovymi — Biełaruś u adkaz uviała svaje abmiežavańni. Taksama Kanstytucyjny sud ličyć, što ŭvodzić abmiežavańni možna tolki sa zhodny Rady biaśpieki AAN, čaho u vypadku ź Biełaruśsiu nie było. 

«Indyvidualnyja abmiežavalnyja miery ES i šerahu dziaržaŭ, nakiravanyja na zamarožvańnie (błakavańnie) aktyvaŭ, jakija ŭvajšli ŭ «sankcyjnyja» śpisy fizičnych i jurydyčnych asob, a taksama handlovyja abmiežavańni pieraškadžajuć hramadzianam i arhanizacyjam svabodna rasparadžacca svajoj majomaściu, handlavać pryrodnymi resursami, što niehatyŭna ŭpłyvaje na žyćciovy uzrovień i ekanamičnuju dziejnaść, — adznačajecca ŭ rašeńni suda. — Zabarona ŭjazdžać na terytoryju ES i paznačanych dziaržaŭ niesumiaščalnaja z pravami čałavieka, u tym liku pravam na svabodu vykazvańnia mierkavańniaŭ, parušaje pryncyp niedyskryminacyi pa prykmiecie palityčnych i inšych pierakanańniaŭ». 

Sankcyi — heta dobra ci drenna? Sprabujem zrazumieć pa zajavach uładaŭ

Ciapierašni sankcyjny cisk samy mocny za ŭsiu historyju niezaležnaj Biełarusi. Adnak va ŭładzie niama adzinaha mierkavańnia i tezisa adnosna abmiežavańniaŭ. Tak, deputaty i čynoŭniki ŭ raznaboj to krytykujuć Zachad, to kažuć, što sankcyi dapamohuć uzmacnić ekanomiku i stać bolš niezaležnymi ad zachodnich partnioraŭ.

U adnym ź intervju Łukašenka zajaviŭ, što ŭron ad sankcyj nastolki niaznačny, što jon navat zabaraniŭ svaim padnačalenym jaho padličvać, maŭlaŭ, daražej budzie ličyć.

Namieśnik kiraŭnika Administracyi Łukašenki Dźmitryj Krutoj zajaŭlaŭ, što Biełaruś prahnazuje straty ad sankcyj dla enerhietyčnaha i chimičnaha ekspartu ŭ sumie 350-300 młn dalaraŭ. 

• 0
• 0
• 0
• 0
• 0
• 0
• 0
• 0