Narkotyki i teror. Pierabiežčyk raskryŭ sakrety paŭnočnakarejskaj palityki
Brytanski resurs VVS zdoleŭ uziać intervju ŭ pierabiežčyka, jaki niekali zajmaŭ pasadu staršaha pałkoŭnika armii KNDR. Žurnalisty śćviardžajuć, što heta pieršy raz, kali bujny miedyjaresurs hutaryć z byłym paŭnočnakarejskim aficeram nastolki vysokaha ranhu.
U materyjale brytancaŭ pierabiežčyk nazvany imiem Kim Kuk Son, adnak sapraŭdnaje imia paŭnočnakarejca zasakrečanaje. Surazmoŭca reparcioraŭ patraciŭ 30 hadoŭ, kab zaniać svajo miesca siarod starejšych aficeraŭ vyviedki KNDR. Jon śviedčyć, što zachoŭvaŭ sakrety paŭnočnakarejskich śpiecsłužbaŭ i rabiŭ šmat złačynstvaŭ dziela dabrabytu režymu, piša VVS.
Kim źbieh z KNDR u 2014 hodzie, bo adčuvaŭ niebiaśpieku dla svajho žyćcia. Z taho času jon žyvie ŭ Sieŭle i pracuje na paŭdniovakarejskuju vyviedku.
Zhodna z surazmoŭcam, kiraŭnictva KNDR zarablaje hrošy lubymi mahčymymi sposabami — ad raspaŭsiudu narkotykaŭ da prodažu zbroi ŭ krainy Blizkaha Uschodu i Afryki.
Teror
Padčas pracy ŭ vyviedcy Kim byŭ śviedkam vykanańnia zahadaŭ, źviazanych ź likvidacyjaj apanientaŭ paŭnočnakarejskaha režymu. Naprykład, u 2009 hodzie ahienctva, dzie jon pracavaŭ, atrymała zahad sfarmiravać śpiechrupu dla zabojstva ŭ Sieŭle byłoha čynoŭnika KNDR, što źbieh u Paŭdniovuju Kareju. Adnak zamach akazaŭsia biespaśpiachovy, i dva majory armii KNDR usio jašče adbyvajuć za jaho termin u turmie ŭ Sieŭle.
Kim patłumačyŭ brytancam, što teraryzm zajmaje nie apošniaje miesca ŭ dziaržaŭnaj sistemie KNDR:
«U Paŭnočnaj Karei teraryzm — heta palityčny instrumient, z dapamohaj jakoha abaraniajuć vyšejšuju hodnaść Kim Čen Ira i Kim Čen Yna. Heta (zamach — zaŭv.) byŭ padarunak, kab prademanstravać addanaść pierajemnika [byłomu] vialikamu lidaru».
Byli i inšyja padobnyja zahady, jakija, pa słovach Kima, mahli być addadzienyja tolki vyšejšym kiraŭnictvam krainy.
U KNDR, raspaviadaje pierabiežčyk, lidar krainy pavinien davać dazvoł navat na budaŭnictva darohi, tym bolš heta datyčycca terarystyčnych zahadaŭ.
Siarod prykładaŭ bolš masavaha teroru Kim zhadvaje historyju 2010 hoda, kali ŭ paŭdniovakarejski vajenny karabiel Cheonan trapiła tarpieda. Sudna patanuła, zahinuli 46 čałaviek. Pchieńjan abviarhaje svajo dačynieńnie da ataki na karabiel.
U listapadzie taho ž hoda dziasiatki paŭnočnakarejskich artyleryjskich snaradaŭ atakavali paŭdniovakarejski vostraŭ Jonpchiondo. Dva aficery i dva hramadzianskija zahinuli. Jak kaža Kim, jon nie ŭdzielničaŭ napramuju ŭ hetych atakach, ale aficery jaho raźviedvalnaj słužby viedali pra ich i ličyli ich pradmietam honaru.
Špijanaž u inšych krainach
Były raźviedčyk śćviardžaje, što ŭ KNDR, aproč inšaha, jon zajmaŭsia arhanizacyjaj sistemy vyviedki ŭ Paŭdniovaj Karei. Ale ž špijony z krainy čučche, jak kaža Kim, jość i ŭ inšych kropkach płaniety — naprykład, u Kitai, Rasii i krainach Paŭdniova-Ŭschodniaj Azii. I heta nie kažučy pra ŭnutranuju vyviedku ŭ samoj KNDR.
Kim raspavioŭ pra vypadak, kali paŭnočnakarejski ahient pracavaŭ u Sinim domie — tak nazyvajuć rezidencyju prezidenta Paŭdniovaj Karei. Heta było ŭ pačatku 1990-ch hadoŭ.
Špijon nibyta zdoleŭ papracavać u Sinim domie piać-šeść hadoŭ, biaśpiečna viarnucca dachaty i praciahnuć pracu na karyść režymu čučche. I taki vypadak, zhodna z Kimam, nie adziny: špijony z KNDR hrajuć aktyŭnuju rol u hramadzianskich arhanizacyjach i dziaržaŭnych instytutach Paŭdniovaj Karei.
KNDR - adna z samych biednych i izalavanych krain śvietu, adnak inšyja pierabiežčyki śviedčać, što na Pchieńjan pracuje ažno 6 tysiač prafiesijnych chakieraŭ.
Kim tłumačyć, što ich pačali navučać jašče ŭ 1980-ja hady pa zapytu Kim Čen Ira, jaki žadaŭ być padrychtavanym dla vajny ŭ kibierprastory. Surazmoŭca VVS śviedčyć, što dla hetaha adbirali lepšych studentaŭ z usioj krainy, jakija paźniej navučalisia šeść hadoŭ.
I niebiespaśpiachova - zachodnija śpiecsłužby ličać, što chakiery z KNDR stajać za šeraham bujnych kibieratak. Naprykład, im prypisvajuć napad 2017 hoda na resursy Nacyjanalnaj słužby achovy zdaroŭja (Brytanija) i inšych arhanizacyj pa ŭsim śviecie, a taksama ataku 2014 hoda na resursy kampanii Sony Pictures.
Prodaž narkotykaŭ
U 1990-ja na terytoryi KNDR mieŭ miesca vialiki hoład, praź jaki zahinuli, pa roznych acenkach, ad 10 tysiač da 3 miljonaŭ čałaviek. U toj čas pierabiežčyk, što hutaryŭ z VVS, atrymaŭ zahad dabyvać hrošy dla viarchoŭnaha lidara krainy, što aznačała prodaž nielehalnych narkotykaŭ.
Jak kaža pierabiežčyk, u pieryjad Ciažkaha pachodu — tak prapahanda nazvała hoład — vyrab narkotykaŭ u KNDR dasiahnuŭ svajho pika.
Kali Kim atrymaŭ zadańnie, jon pryvioz u krainu troch zamiežnikaŭ, pabudavaŭ razam ź imi łabaratoryju i pačaŭ vyrablać narkotyki. Pierabiežčyk kaža, što jany vyrablali mietamfietamin, pradavali jaho i pieradavali hrošy kiraŭniku krainy Kim Čen Iru — były aficer tłumačyć, što lidaru krainy na praktycy naležać usie hrošy na terytoryi KNDR.
U Paŭnočnaj Karei i raniej masava vyrablali narkotyki, u asnoŭnym hierain i opij.
Inšy pierabiežčyk, były dypłamat z KNDR, niekalki hadoŭ tamu raspaviadaŭ, što ŭ krainie isnuje nadta bujnaja śfiera narkahandlu, pryčym jaje kantraluje dziaržava. Praz heta ŭ Paŭnočnaj Karei pačałasia sapraŭdnaja epidemija narkazaležnaści.
Jašče adnoj krynicaj prybytku Kim nazyvaje nielehalny prodaž zbroi ŭ Iran. Naprykład, paŭnočnakarejcy vyrablali zvyšmałyja padvodnyja łodki — Kim upeŭnivaje, što ŭ KNDR takoje vytančanaje abstalavańnie było duža vysokaj jakaści.
Zhodna z surazmoŭcam VVS, Iranam sprava nie abmiažoŭvałasia, i paŭnočnakarejcy pradavali svaju zbroju ŭ krainy z zaciažnymi hramadzianskimi vojnami. Havorka idzie pra Siryju, Mjanmu, Liviju i Sudan. AAN, miž tym, papiaredžvaje, što vyrablenaja ŭ Pchieńjanie zbroja moža akazacca ŭ šmatlikich haračych kropkach pa ŭsim śviecie.
Kamientary