«U vašym rajonie pracuje HUBAZ». Zatrymany i aštrafavany bard i piśmieńnik Anatol Kudłasievič, jaho kvateru razhramili
Žonka pryjšła z pracy 29 vieraśnia i ŭbačyła, što doma pahrom, a muž źnik.
«Dakładnaj infarmacyi niama. Ale situacyja takaja: maci viarnułasia dadomu, a tam usio razburana, rečy raskidanyja pa padłozie. Raskidanaje absalutna ŭsio, navat niejkija krupy i śpiecyi.
Niama baćki, niama dvuch noŭtbukaŭ, mabilnika, baćkavych tabletak ad cisku, niekatorych asabistych rečaŭ. Pry hetym kaštoŭnaści nie kranutyja, — kaža Mikałaj, syn Anatola Kudłasieviča. — Ja źviazaŭsia z advakatam, zvaniŭ u milicyju. Jaho pačali šukać, mnie pazvaniŭ dziažurny i skazaŭ, što ŭ tym rajonie, dzie žyvuć baćki, pracuje HUBAZ.
I situacyja ŭ kvatery padobnaja na pieratrus paśla HUBAZa, plus u baćki aktyŭnaja hramadzianskaja pazicyja, jon nie saromiejecca pisać u fejsbuku… I byŭ paru dzion u kamandzie Cichanoŭskaha minułaj viasnoj, kataŭsia pa Biełarusi…
Tamu miarkujem, što tata zatrymany. Ale pakul ničoha kankretnaha niama».
Kudłasievič maje invalidnaść druhoj hrupy, u jaho vydalenaje adno lohkaje praz ankałohiju.
«Taksama baćka maje prablemy ź ciskam, jamu treba pastajanna prymać leki, inakš pačynaje zadychacca», — raskazvaje syn.
U minułym hodzie, niahledziačy na invalidnaść, 60-hadovy Anatol Kudłasievič byŭ asudžany na 10 sutak za «mitynh» padčas zboru podpisaŭ za Śviatłanu Cichanoŭskuju.
«A viasnoju 2021 hoda ŭ kvatery baćki ŭžo prachodziŭ pieratrus u suviazi sa spravaj Aŭtuchoviča. Nahodaj stała toje, što jany pierapisvalisia niedzie ŭ siecivie. Ale tady pravodzili pieratrus davoli dalikatna, baćku dapytali i adpuścili», — kaža syn.
Paźniej stała viadoma, što Anatola Kudłasieviča aštrafavali na 2900 rubloŭ.
Pratakoł na Anatola skłali pa artykule 24.23 KaAP (niesankcyjanavanaje pikietavańnie). Jaho abvinavacili ŭ tym, što jon raźmiaściŭ BČB-ściah na bałkonie svajoj kvatery.
Kudłasievič raspavioŭ, što supracoŭniki milicyi pryjšli da jaho ranicaj 29 vieraśnia, a ściah u kvatery visieŭ jašče z 2020 hoda.
Sudździa Ała Skuratovič zrabiła niekalki zaŭvah Anatolu, kab jon «havaryŭ pa sutnaści», bo toje, što «narod padmanuli» nie maje dačynieńnia da spravy. Vynikam suda staŭ štraf 2900 rubloŭ (100 bazavych vieličyniaŭ).
Kamientary