Maryju Kaleśnikavu asudzili na 11 hadoŭ kałonii, Maksima Znaka — na 10
Siońnia ŭ sudzie Minskaha rajona byŭ vyniesieny prysud Maryi Kaleśnikavaj i Maksimu Znaku. Ich pryznali vinavatymi pa troch artykułach Kryminalnaha kodeksa: zmova z metaj zachopu ŭłady, zakliki da dziejańniaŭ, skiravanych na pryčynieńnie škody nacyjanalnaj biaśpiecy, stvareńnie ekstremisckaha farmiravańnia albo kiraŭnictva im.
Praces byŭ zakrytym, na jaho nie puścili navat rodnych Znaka i Kaleśnikavaj. Prakuror prasiŭ pakarać kožnaha 12 hadami kałonii.
Advakaty zajavili, što buduć abskardžvać vyniesieny prysud u Viarchoŭnym sudzie. Na abskardžańnie dajecca 10 dzion.
Maryja Kaleśnikava i Maksim Znak byli tvaram vybarčaj kampanii Viktara Babaryki. Jany dałučylisia da jaho kamandy ŭ mai 2020 hoda — prychodzili na padaču dakumientaŭ u CVK, kamientavali biahučyja padziei.
Paśla taho, jak Babaryka byŭ aryštavany, Maryja Kaleśnikava razam ź Cichanoŭskaj i Vieranikaj Capkała jeździła pa haradach Biełarusi, dzie vystupała pierad ludźmi.
Paśla stvareńnia Kaardynacyjnaj rady Znak i Kaleśnikava ŭvajšli ŭ jaje prezidyum. Maryju zatrymali hod tamu, 7 vieraśnia, pobač z budynkam Nacyjanalnaha mastackaha muzieja. Niekalki hadzin pra jaje ničoha nie było viadoma, a potym vyśvietliłasia, što jaje źbiralisia vydvaryć va Ukrainu, ale Maryja parvała svoj pašpart i viarnułasia ŭ Biełaruś. Z taho momantu jana amal uvieś čas praviała ŭ turmie ŭ Žodzinie.
Maksim Znak byŭ zatrymany 9 vieraśnia 2020 hoda ŭ štabie Viktara Babaryki.
Dzień u SIZA zaličvajecca za paŭtara dni ŭ kałonii.
***
Sud nad Maksimam i Maryjaj raspačaŭsia 4 žniŭnia. Jon byŭ zakrytym. Im stavili ŭ vinu złačynstvy pa troch artykułach Kryminalnaha kodeksa:
— č. 1 art. 357 — zmova abo inšyja dziejańni, učynienyja z metaj zachopu ci ŭtrymańnia dziaržaŭnaj ułady niekanstytucyjnym šlacham (da 12 hadoŭ pazbaŭleńnia voli);
— č. 3 art. 361 — zakliki da dziejańniaŭ, skiravanych na pryčynieńnie škody nacyjanalnaj biaśpiecy (da 5 hadoŭ pazbaŭleńnia voli);
— č. 1 art. 361-1 — stvareńnie ekstremisckaha farmiravańnia albo kiraŭnictva im (da 7 hadoŭ pazbaŭleńnia voli).
Advakatam zabaranili paviedamlać abstaviny i chod pracesu.
***
Nahadajem, što Viarchoŭny sud 6 lipienia pryznačyŭ Viktaru Babaryku 14 hod źniavoleńnia. Jaho pryznali vinavatym u atrymańni chabaru ŭ asabliva bujnym pamiery (č. 3 art. 430 KK) i ŭ lehalizacyi srodkaŭ, atrymanych złačynnym šlacham (č. 2 art. 235 KK). Da taho ž jaho faktyčna pazbavili prava abskardžvać prysud.
Ciapier čytajuć
Biełarusy horača spračajucca, ci varta pryviazvać dapamohu na dzicia da zarobku maci47
Biełarusy horača spračajucca, ci varta pryviazvać dapamohu na dzicia da zarobku maci
U Biełarusi zaćvierdzili praviły evakuacyi kaštoŭnaściaŭ na vypadak vajny: cehłu z Bresckaj krepaści z nadpisami buduć ratavać pierš za karciny Šahała i Sucina1313
Kamientary