«Usie vašy mary pavinny być uzhodnienyja z administracyjaj rajona». Jak u Biełarusi karajuć za žarty
1 vieraśnia byŭ pryznany ekstremisckim papularny telehram-kanał «Čaj z malinavym vareńniem». Na jaho byli padpisanyja 138 tysiač čałaviek, za sutki paśla «zabarony» kanał pryros jašče piaćciu tysiačami padpisčykaŭ.
Pa viersii siłavikoŭ, humarystyčny kantent «byŭ nakiravany na abrazu pradstaŭnikoŭ ułady ŭ suviazi z vykanańniem imi svaich słužbovych abaviazkaŭ, destabilizacyju hramadska-palityčnaj situacyi ŭ krainie, raspalvańnie sacyjalnaj i palityčnaj varožaści».
Heta nie adziny vypadak, kali humar stanovicca padstavaj dla represij. «Naša Niva» zhadała inšyja historyi, jak režym karaje za žarty.
Zabarona kancertaŭ papularnaha stendap-komika
Papularny komik Słava Kamisaranka ŭ jutub-šou «Čto było dalšie?» vykazaŭsia pra situacyju ŭ Biełarusi i Łukašenku, tak uźnik miem «čyk-čyryk».
Paśla Kamisaranka raspavioŭ, što jamu zabaranili vystupać na radzimie:
«Voś što adbyłosia: ciapier maje kancerty ŭ Biełarusi zabaronienyja, admianili majo hastrolnaje paśviedčańnie. I zdajecca, ja viedaju, chto pastaviŭ adzin «dyzłajk». Iranična, što ŭsim kancerty admianiaje karanavirus, a mnie — hałoŭny kavid-dysident. Tak što ja ciapier nie baču sensu strymlivacca».
Admienu kancertaŭ u Minsku ŭłady rastłumačyli nieadpaviednym uzrostavym abmiežavańniem, chacia jano i tak było maksimalnym (18+). Vystupy ŭ rehijonach admianili sami arhanizatary.
Hod «chatniaj chimii» za pieraroblenyja słovy himna
28 krasavika zatrymali 26-hadovuju nastaŭnicu muzyki Hannu Važnik.
Pryčynaj staŭ jaje post u tvitary. U im Hanna pierarabiła paru radkoŭ ź dziaržaŭnaha himna. Post davoli šyroka razyšoŭsia.
Na Važnik zaviali kryminalnuju spravu za «ździek ź dziaržaŭnych simvałaŭ». U kancy červienia joj prysudzili hod «chatniaj chimii».
U viciebskich komikaŭ źnikli z kanała roliki
Viciebskija viadučyja mierapryjemstvaŭ Edzik i Saniok u sakaviku 2020 hoda vypuścili pieršy rolik u stylistycy pravincyjnyha telebačańnia.
Vykarystańnie typovych televizijnych štampaŭ i prostych ludziej u jakaści akcioraŭ rabiła roliki vielmi praŭdapadobnymi.
Paśla prezidenckich vybaraŭ Edzik i Saniok stali rabić roliki i na kalapalityčnyja temy: praterminavanaje hałasavańnie, inaŭhuracyja Łukašenki, rełakacyja ajcišnikaŭ, adličeńni studentaŭ i «Usiebiełaruski narodny schod».
U intervju komiki razvažali nakont mahčymych represij. Jany kazali, što imknucca nie pierachodzić miežy žartami pra čynoŭnikaŭ, ale razumiejuć, što kali niešta zachočuć znajści, to znojduć. Pa ich mierkavańni, hłupstva — karać ludziej za humar.
Ale ciapier na Jutubie znajści roliki niemahčyma — aŭtary abmiežavali dostup da ich.
Źniščeńnie «Sovietskoj Biełoruśsii»
Telehram-kanał «Sovietskaja Biełoruśsija» praz satyru refleksavaŭ na biahučyja padziei, imitujučy dziaržaŭnuju prapahandu. Časam ludzi vieryli absurdnym dopisam, i jany pačynali virusicca pa sacyjalnych sietkach i miesiendžarach, satyryčnyja dopisy repościli navat prapahandysty.
U kancy krasavika ŭ kanale pačali źjaŭlacca dopisy, dalokija ad satyry, u jakich abražali apazicyjanieraŭ. Čytačy adrazu pačali adpisvacca. Za dva dni kolkaść padpisčykaŭ śpikiravała z 30 da 13 tysiač.
Akazałasia, što admin kanała byŭ zatrymany. Pryčym za raźmiaščeńnie karcinak nacysckaha kštałtu ŭ inšych kanałach. Padobna, što hałoŭnaha satyryka biełaruskaha telehrama siłaviki zatrymali vypadkova.
Mužčyna atrymaŭ 25 sutak aryštu, a aryhinalnaja «SB» pierajšła pad kantrol inšych ludziej, jakija, viadoma, nie spravilisia. Ciapier isnuje druhi padobny kanał z takoj ža nazvaj.
Ciapier čytajuć
Stała viadoma, chto lotaŭ na Šry-Łanku razam z Anžalikaj Mielnikavaj i jaje ahientam15
Kamientary