«Z takim abjomam chejtu sutyknuŭsia ŭpieršyniu». Miełkazioraŭ paabiacaŭ za padpisku vypuścić videa pa-biełarusku — i atrymaŭ šmat krytyki

Mikita — aŭtar kanała «Žizń-malina». Jahonyja intervju ź viadomymi biełarusam źbirajuć sotni tysiač prahladaŭ. Hutarki vychodziać pa-rusku, u niadaŭnim vypusku viadučy prapanavaŭ: kali na jaho instahram padpišucca 30 tysiač čałaviek, jon hatovy zapisać nastupnaje intervju pa-biełarusku. 

Pavialičyć

Pavieł Biełavus padtrymaŭ ideju i na svajoj staroncy ŭ Fejsbuku zaklikaŭ padtrymać Mikitu. Ale nie ŭsie ŭchvalili ideju. «Što zaminaje biez hetaha zrabić videa pa-biełarusku?» — pytajuć ludzi.

Błohierka Hanna Bond aburyłasia, što takim čynam žurnalist sprabuje chajpanuć, kab paśla pradavać rekłamu ŭ akaŭncie, z aŭdytoryjaj u 30 tysiač zarabić možna bolš.

«Piersanaž prymušaje nas uprošvać jaho pryspuścicca z vyšyniaŭ da ŭzroŭniu biełaruskaj movy. Brydota. Chaj sabie praciahvaje na svajoj vialikadziaržaŭnaj. A ja lepš na joj Dudzia pahladžu», — adreahavaŭ žurnalist Aleś Pilecki.

Zastupiŭsia za błohiera hałoŭny redaktar «Trybuny» Aleh Harunovič, dzie ŭ svoj čas pracavaŭ žurnalistam Miełkazioraŭ.

«Asabliva aburajucca tyja, chto daŭno razmaŭlaje pa-biełarusku. Łohiku ich emocyj uvohule nie mahu spaścihnuć.

Čałaviek robić jakasny prajekt. U prajekta vielmi prystojnaja pa kolkaści aŭdytoryja. I kali hetuju aŭdytoryju chacia b raz «apylić» biełaruskaj movaj, heta budzie prosta cudoŭna (abo jość inšyja mierkavańni?). Tym bolš nie fakt, što tolki raz.

Nu i śmiešna kazać pra chajp na biełaruščynie. Kali daješ post na movie — heta amal harantavanaje źnižeńnie prahladaŭ adsotkaŭ tak na 60. Mudrahielisty taki chajp».

«Naša Niva» spytała samoha Mikitu, ci byŭ jon hatovy da takoj reakcyi.

«Kali ŭ ciabie raście publika, naturalna, što ź joj raście i kolkaść chejtu. Plus treba razumieć, što my ŭsie, niezaležna ad statusu, u jakim znachodzimsia, (emihranty, tyja, chto siadzieŭ, paciarpiełyja ad režymu ci nie) traŭmavanyja (Miełkazioraŭ źjechaŭ za miažu — NN). U kožnaha svoj bol, jaki detanuje ŭ zaležnaści ad situacyi. 

U hetym chalivary absalutna roznyja pretenzii. I što Saša Ivulin siadzić, a ja klanču padpisku, i toje, što ja byccam spuskajusia na ŭzrovień biełaruskaj movy. Z takim abjomam chejtu ja sutyknuŭsia ŭpieršyniu. Było krychu dziŭna.

Kali ty ničoha nie robiš ź biełaruskaj movaj, to ciabie nie čapajuć. Jak tolki zachodziš na hetu terytoryju — źjaŭlajucca adepty, jakija žorstka chejciać ci sprabujuć teściravać nieafitaŭ, jakim u dadzienym momancie akazaŭsia ja.

Takim dośviedam prykolna vałodać, ale nie zaŭsiody prykolna znachodzicca ŭ stadyi jaho nazapašvańnia. Biezumoŭna, heta zrobić mianie macniejšym, pojdzie na karyść, i ŭ płanie prasoŭvańnia kanała nam tak ci inakš patrebna ahałoska i važna, što my vyklikajem reakcyi.

Mnie, kaniečnie, niepryjemna. I kali ja kahości pakryŭdziŭ, to prašu prabačeńnia, ale ahułam vykazvaju ŭsim padziaku za nieabyjakavaść. Śpiekulavać na matčynaj movie my nijakim čynam nie chacieli».

Błohier tłumačyć: składanaści pierachodu na biełaruskuju movu dla jaho, pierš za ŭsio, u emacyjnym błoku. I spadziajecca, što inšym achvotnym hety šlach budzie prajści lahčej.

«Soramna pamylacca, być nie vielmi ŭpeŭnienym. I ŭ kadry budzie niajomka hublać niekatory čas na tupniak i padbor biełaruskich słoŭ. Heta asabista dla mianie vyklik».

Chapaje i tych, chto padtrymaŭ Mikitu. Da žadanaj ličby jamu zaraz nie chapaje 700 padpisantaŭ.

• 1
• 0
• 0
• 0
• 0
• 0
• 0
• 0