Kitajskija ŭłady pačali rasśledavańnie suprać papularnaha startapa paśla zhadki padziej na płoščy Ciańańmeń
Akaŭnt kampanii Xiaohongshu byŭ zabłakavany paśla dopisu, zroblenaha ŭ dzień hadaviny razhonu mirnych pratestoŭcaŭ na płoščy Ciańańmeń.
Šanchajski stratap Xiaohongshu — papularnaja kitajskaja płatforma dla sacyjalnych sietak i elektronnaj kamiercyi. U piatnicu, 4 červienia, na aficyjnym akaŭncie kampanii ŭ Weibo — kitajski anałah Twitter — źjaviłasia paviedamleńnie: «Skažycie, što za data siońnia?»
Heta paviedamleńnie, apublikavanaje ŭ 32-ju hadavinu padziej na płoščy Ciańańmeń, było vydalena ŭ chutkim časie, a akaŭnt kampanii byŭ zabłakavany kitajskimi cenzarami, paviedamlaje The Wall Street Journal.
Ciapier Administracyja kibierprastory Kitaja pravodzić rasśledavańnie nakont incydentu z dopisam kampanii Xiaohongshu.
Xiaohongshu, zasnavanaja ŭ 2013 hodzie, maje bolš za sto miljonaŭ aktyŭnych karystalnikaŭ štomiesiac. Heta adna z samych papularnych prahram siarod maładych ludziej u Piekinie i Šanchai.
Pakul niezrazumieła, jakaja była pieršapačatkovaja meta hetaha paviedamleńnia, ale adzin ź ludziej, daśviedčanych u rasśledavańni, śćviardžaje, što paviedamleńnie nie było spasyłkaj da padziej 1989 hoda. Apošnim časam kampanija časta rabiła padobnyja pasty štopiatnicu z nahody vychadnych.
Razhon Kamunistyčnaj partyjaj Kitaja mirnych pratestoŭcaŭ, bolšaść ź jakich byli studenty, u 1989 hodzie na płoščy Ciańańmeń źjaŭlajecca adnoj z samych palityčna dalikatnych padziej u sučasnaj kitajskaj historyi. Urad na praciahu mnohich hadoŭ imkniecca zdušyć luboje ŭšanavańnie pamiaci tych padziej, kali zahinuli ad socień da tysiač mirnych pratestoŭcaŭ, a tysiačy paśla byli represavanyja.
U kitajskich padručnikach historyi niama nijakich zhadak pra padziei na płoščy Ciańańmeń, a štohod pierad 4 červienia ŭsie paviedamleńni ŭ sacyjalnych sietkach, źviazanyja z pratestami 1989 hoda, aŭtamatyčna vydalajucca. Bolš za toje, ciapier karystalniki papularnych sacsietak navat nie mohuć źmianić fota profilu pierad 4 červienia, bo ŭ minułyja hady mnohija stavili vyjavu zapalenaj śviečki, što śviedčyła pra ŭšanavańnie pamiaci tych padziej.
Takija miery kantrolu ŭskładniajuć novamu pakaleńniu atrymać infarmacyju pra tyja pratesty i represii, jakija byli paśla ich. Bolšaść maładych ludziej u Kitai mała viedaje pra padziei na płoščy Ciańańmeń.
Kamientary