U śpievaka ŭ čaćvier spyniłasia serca, a daktary tak i nie zdoleli jaho zapuścić.
Viadomy amierykanski pop-śpiavak Majkł Džeksan pamior 25 červienia ŭ balnicy Univiersiteta Kalifornija, što ŭ Łos-Andžełasie.
U čaćvier u jaho spyniłasia serca — śpievaka znajšli ŭ jaho domie, jon nie dychaŭ.
Džeksana adrazu špitalizavali, adnak serca zapuścić nie zdoleli. U balnicu śpiavak pastupiŭ u stanie hłybokaj komy.
Majkłu Džeksanu było 50 hadoŭ (naradziŭsia 29 žniŭnia 1958 h.). Uviesnu paviedamlałasia, što ŭ jaho byŭ vyjaŭleny rak skury, ale potym infarmacyja była abvierhnutaja.
***
Piter Pen, jakoha zvali Majkł
Piter Pen — chłopčyk, jaki nie žadaŭ być darosłym — heta mianuška zastałasia za Majkłam Džeksanam, niahledziačy na toje, što ŭ minułym hodzie jamu spoŭniłasia 50 hadoŭ.
Ciomnaskury chłopčyk ź niebahataj siamji ŭpieršyniu źjaviŭsia na scenie ŭ 1964 h. razam z čatyrma bratami, što stvaryli hurt The Jackson Five.
Tytuł karala pop-muzyki jon atrymaŭ šmat paźniej, paśla niečuvanaha pośpiechu jaho treciaha solnaha alboma«Thriller», jaki i da siońnia zastajecca samym pradavanym u śviecie.
Usio svajo žyćcio Majkł Džeksan nie pierastavaŭ ździŭlać svaich fanataŭ, i zavodzić vorahaŭ. Złyja jazyki kazali pra mnostva płastyčnych apieracyj, u vyniku jakich u śpievaka pabialeła skura i źmianiłasia forma nosa. Jaho niepraciahły šlub z dačkoj Ełvisa Preśli nazyvali sprobaj schavać jaho cikavaść da maleńkich chłopčykaŭ.
Majkł Džeksan sapraŭdy lubiŭ dziaciej.
Jon achviaravaŭ vielizarnyja sumy dzieciam Sarajeva, kosaŭskim uciekačam. U 1999 h. u Miunchienie śpiavak zładziŭ viadomy kancert «Džeksan i siabry». Prybytki pajšli ŭ fond JUNIESKA, arhanizacyi Čyrvonaha Kryža i ŭ Dziciačy fond Nielsana Mandeły.
U 1993 h. Džeksana abvinavacili ŭ seksualnych zalacańniach da 13-hadovaha chłopčyka. Novy skandał razhareŭsia ŭ 2003 h., kali jaho abvinavacili ŭ razbeščvańni małaletnich, što načavali ŭ jaho majontku Neverland, dzie jon pabudavaŭ dla dziaciej park atrakcyjonaŭ i zaapark.
Majkł byŭ aryštavany, ale chutka adpuščany pad zakład.
Sud praciahvaŭsia piać miesiacaŭ, paśla čaho z Džeksana byli źniatyja ŭsie abvinavačańni.
13 lipienia Majkł Džeksan pavinien byŭ vystupić z kancertam u Vialikabrytanii — pieršym u vialikim turne pa śviecie, jakoje pavinna było praciahnucca da 2010 h.
Ciapier čytajuć
Kaledž chacieŭ zasudzić studenta i spahnać ź jaho 13 tysiač rubloŭ — ale junak daŭ adpor sistemie1
Kamientary