Hrupa epidemijołahaŭ z roznych krain pastaviła pad sumnieŭ dakładnaść źviestak ab Sputnik V

«Dostup da źviestak, jakija skłali asnovu vyvučeńnia vakcyny, nieabchodny dla pravierki i paćvierdžańnia zajaŭlenych vynikaŭ, tamu abmiežavańnie dostupu da nieabchodnaj infarmacyi padryvaje davier da daśledavańnia. Situacyja stanovicca jašče bolš surjoznaj, kali ŭ apublikavanych statystyčnych źviestkach i vynikach jość vidavočnyja pamyłki i niesupadzieńni ŭ ličbach. Na žal, heta jakraz toje, što adbyvajecca ŭ vypadku z 3-j fazaj vyprabavańniaŭ vakcyny Sputnik V», — śćviardžajecca ŭ artykule.

Pieršaja prablema zaklučajecca ŭ tym, što epidemijołaham nie da kanca zrazumieła, na asnovie jakich źviestak byli zroblenyja vysnovy vyprabavańniaŭ 3-j fazy. Na dumku ekśpiertaŭ, u artykule nie było šerahu važnych źviestak, bieź jakich niemahčyma abjektyŭna acanić efiektyŭnaść vakcyny.

Druhaja prablema datyčyć niesupadzieńniaŭ i nieprazrystaści infarmacyi ŭ pratakole daśledavańnia. Epidemijołahi adznačajuć, što 5 listapada 2020 hoda ŭ daśledavańnie dadali try pramiežkavyja analizy, ale heta źmiena nie była zafiksavanaja na ClinicalTrials.gov.

Akramia hetaha, pieršasnyja vyniki vyprabavańniaŭ musili być acenienyja paśla pieršaj dozy, ale acenku adkłali da ŭviadzieńnia druhoj, adnak pryčyny hetych źmien nie byli paznačanyja. Bolš za toje, na ClinicalTrials.gov pieršasny vynik vyznačany niepaśladoŭna.

Taksama ŭ pratakole paznačana, što było daśledavana 135 963 čałavieki i randamizavanyja 21 977. Adnak u zapisie na ClinicalTrials.gov uzhadvajecca, što było zarehistravana 33 758 pacyjentaŭ. Niama nijakaj infarmacyi nakont taho, čamu byli vyklučanyja 13 986 udzielnikaŭ.

Treciaja prablema, jakaja turbuje daśledčykaŭ, źviazanaja ź niesupadzieńniami ŭ ličbach, jakija paznačajucca ŭ daśledavańni. Naprykład, źviestki dla vakcynavanaj hrupy na 20-y dzień adnosiacca da bolšaj kolkaści ludziej, čym na 10-y dzień. Niezrazumieła, ci to adsutničała infarmacyja pra 100 udzielnikaŭ da dziasiataha dnia, ci to paśla dziesiaci dzion dadali jašče ŭdzielnikaŭ. Heta stavić pad sumnieŭ dakładnaść i inšych źviestak.

Taksama epidemijołahaŭ ździviła, što dla ŭsich uzrostavych hrup efiektyŭnaść vakcyny była amal adnolkavaj. Navukoŭcy pravieryli adnarodnaść efiektyŭnaści vakcyny pa ŭzrostavych hrupach z dapamohaj testaŭ uzajemadziejańnia, u vyniku jakich vyśvietliłasia, što isnuje vielmi małaja vierahodnaść takoj adnarodnaści vakcyny dla ŭsich uzrostavych hrup.

Raniej aŭtary artykuła ŭžo vykazvali sumnieŭ nakont apublikavanych vynikaŭ 1 i 2 faz vyprabavańniaŭ Sputnik V.

• 0
• 0
• 0
• 0
• 0
• 0
• 0
• 0