Da 6 z pałovaj hadoŭ źniavoleńnia. Vynieśli prysud 14 fihurantam «pinskaj spravy»
Siońnia ŭ sudzie Maskoŭskaha rajona Bresta vynieśli prysud 14 fihurantam pinskaj spravy (padziei 9-10 žniŭnia). Usich ich pryznali vinavatymi va ŭdziele ŭ masavych biesparadkach (č. 2 art. 293 Kryminalnaha kodeksa), paviedamlaje Radyjo Svaboda.
Sudździa Jaŭhien Brehan prysudziŭ:
- Siarhieju Maŭšuku i Alaksandru Ciarešku — 6 z pałovaj hadoŭ kałonii ŭzmocnienaha režymu.
- Ramanu Bahnaŭcu, Daniiłu Bohnatu, Ryhoru Huńko, Siarhieju Laženku, Stanisłavu Michajłavu, Viačasłavu Rahaščuku, Iharu Sałaŭju, Arturu Chalimončyku — 6 hadoŭ kałonii ŭzmocnienaha režymu.
- Šmatdzietnaj maci Alenie Maŭšuk — 6 hadoŭ kałonii ahulnaha režymu.
- Davidu Maścickamu, Alehu Rubcu, Viačasłavu Šelamietu — 5 z pałovaj hadoŭ kałonii ŭzmocnienaha režymu.
Raniej takija ž samyja terminy dla abvinavačanych zapatrabavaŭ prakuror.
Sudy nad 14 pinskimi palitviaźniami praciahvalisia z 23 sakavika. U chodzie sudovych pasiedžańniaŭ vinu pryznali Artur Chalimončyk i Siarhiej Laženka. Całkam nie pryznali — Ihar Sałaviej, Stanisłaŭ Michajłaŭ, Daniił Bohnat, Alaksandr Ciareška. Astatnija abvinavačanyja pryznali vinu častkova.
Ich abvinavačvali va ŭdziele ŭ niesankcyjanavanaj masavaj akcyi, zaklikach demantavać tratuarnuju plitku, zaklikach «bić siłavikoŭ», paškodžańni majomaści, kidańni kamianioŭ, frahmientaŭ tratuarnaj plitki, pałak, butelek, udarach pa siłavikach rukami i nahami.
Pavodle abvinavačańnia, padsudnyja dałučylisia da dziejańniaŭ inšych asob i adzin da adnaho «ŭ metach dasiahnieńnia adzinaha vyniku, što vyraziłasia ŭ niepasrednym hvałcie nad asobaj, a taksama ŭ pahromach, paškodžańniach i źniščeńni majomaści».
Paciarpiełymi pa spravie pryznanyja 109 supracoŭnikaŭ milicyi i čynoŭnikaŭ.
Na pieršym pasiadžeńni prakuror raspaviadaŭ, chto ź pinčukoŭ u čym abvinavačvajecca. Takim čynam, pa viersii śledstva:
Laženka vyłamaŭ pałku z łaŭki i nanios joju nie mienš za 10 udaraŭ pa supracoŭnikach milicyi, potym dastaŭ inšuju pałku i nanios jašče nie mienš za try ŭdary.
Bahnaviec vyłamaŭ koł dla padviazki dreŭ i kinuŭ u pastrajeńnie siłavikoŭ.
Chalimončyk špurnuŭ u milicyjantaŭ płastykavuju butelku i pałku, nanios nie mienš za dva ŭdary pałkaj.
Huńko ŭdaryŭ adzin raz rukoj u ščyt, potym vyrvaŭ z kłumby kvietki z karaniami i ziamloj «vyrabiŭšy tym samym pryładu złačynstva», i kinuŭ u siłavikoŭ. Tudy ž kinuŭ i mietaličnuju skryniu.
Šelemiet kinuŭ u milicyjantaŭ kamień, płastykavuju butelku, padpaleny pačak cyharet i došku.
Rahaščuk kinuŭ nieŭstalavany pradmiet, sprabavaŭ vyrvać skryniu, nie mienš za piać razoŭ udaryŭ pałkaj pa supracoŭnikach AUS.
Rubiec kinuŭ u šarenhu milicyjantaŭ žmieniu ziamli z kłumby i kamień.
Ciareška kinuŭ pałku i nieŭstalavanyja pradmiety.
Bohnat kinuŭ kamień, frahmient raźbitaj šklanoj butelki i nieŭstalavany pradmiet.
Michajłaŭ biŭ nahoj u ščyty, padniaŭ bietonnuju paŭśfieru i špurnuŭ jaje ŭ bok milicyjantaŭ.
Maścicki udaryŭ čatyry razy pałkaj.
Sałaviej zaklikaŭ demantavać plitku, kinuŭ nieŭstalavany pradmiet.
Alena Maŭšuk padyšła da šarenhi siłavikoŭ i ŭdaryła pa ščytach rukami, draŭlanym kałom i pałkaj. Jaje muž Siarhiej kinuŭ u milicyjantaŭ pałku.
«Mis Biełaruś» usio bolš nahadvaje konkurs pryhažości ŭ haremie23
Kamientary