Да 6 з паловай гадоў зняволення. Вынеслі прысуд 14 фігурантам «пінскай справы»
Сёння ў судзе Маскоўскага раёна Брэста вынеслі прысуд 14 фігурантам пінскай справы (падзеі 9-10 жніўня). Усіх іх прызналі вінаватымі ва ўдзеле ў масавых беспарадках (ч. 2 арт. 293 Крымінальнага кодэкса), паведамляе Радыё Свабода.
Суддзя Яўген Брэган прысудзіў:
- Сяргею Маўшуку і Аляксандру Цярэшку — 6 з паловай гадоў калоніі ўзмоцненага рэжыму.
- Раману Багнаўцу, Даніілу Богнату, Рыгору Гунько, Сяргею Ляжэнку, Станіславу Міхайлаву, Вячаславу Рагашчуку, Ігару Салаўю, Артуру Халімончыку — 6 гадоў калоніі ўзмоцненага рэжыму.
- Шматдзетнай маці Алене Маўшук — 6 гадоў калоніі агульнага рэжыму.
- Давіду Масціцкаму, Алегу Рубцу, Вячаславу Шэлямету — 5 з паловай гадоў калоніі ўзмоцненага рэжыму.
Раней такія ж самыя тэрміны для абвінавачаных запатрабаваў пракурор.
Суды над 14 пінскімі палітвязнямі працягваліся з 23 сакавіка. У ходзе судовых паседжанняў віну прызналі Артур Халімончык і Сяргей Ляжэнка. Цалкам не прызналі — Ігар Салавей, Станіслаў Міхайлаў, Данііл Богнат, Аляксандр Цярэшка. Астатнія абвінавачаныя прызналі віну часткова.
Іх абвінавачвалі ва ўдзеле ў несанкцыянаванай масавай акцыі, закліках дэмантаваць тратуарную плітку, закліках «біць сілавікоў», пашкоджанні маёмасці, кіданні камянёў, фрагментаў тратуарнай пліткі, палак, бутэлек, ударах па сілавіках рукамі і нагамі.
Паводле абвінавачання, падсудныя далучыліся да дзеянняў іншых асоб і адзін да аднаго «ў мэтах дасягнення адзінага выніку, што выразілася ў непасрэдным гвалце над асобай, а таксама ў пагромах, пашкоджаннях і знішчэнні маёмасці».
Пацярпелымі па справе прызнаныя 109 супрацоўнікаў міліцыі і чыноўнікаў.
На першым пасяджэнні пракурор распавядаў, хто з пінчукоў у чым абвінавачваецца. Такім чынам, па версіі следства:
Ляжэнка выламаў палку з лаўкі і нанёс ёю не менш за 10 удараў па супрацоўніках міліцыі, потым дастаў іншую палку і нанёс яшчэ не менш за тры ўдары.
Багнавец выламаў кол для падвязкі дрэў і кінуў у пастраенне сілавікоў.
Халімончык шпурнуў у міліцыянтаў пластыкавую бутэльку і палку, нанёс не менш за два ўдары палкай.
Гунько ўдарыў адзін раз рукой у шчыт, потым вырваў з клумбы кветкі з каранямі і зямлёй «вырабіўшы тым самым прыладу злачынства», і кінуў у сілавікоў. Туды ж кінуў і металічную скрыню.
Шэлемет кінуў у міліцыянтаў камень, пластыкавую бутэльку, падпалены пачак цыгарэт і дошку.
Рагашчук кінуў неўсталяваны прадмет, спрабаваў вырваць скрыню, не менш за пяць разоў ударыў палкай па супрацоўніках АУС.
Рубец кінуў у шарэнгу міліцыянтаў жменю зямлі з клумбы і камень.
Цярэшка кінуў палку і неўсталяваныя прадметы.
Богнат кінуў камень, фрагмент разбітай шкляной бутэлькі і неўсталяваны прадмет.
Міхайлаў біў нагой у шчыты, падняў бетонную паўсферу і шпурнуў яе ў бок міліцыянтаў.
Масціцкі ударыў чатыры разы палкай.
Салавей заклікаў дэмантаваць плітку, кінуў неўсталяваны прадмет.
Алена Маўшук падышла да шарэнгі сілавікоў і ўдарыла па шчытах рукамі, драўляным калом і палкай. Яе муж Сяргей кінуў у міліцыянтаў палку.
Каментары