Žychara Kalinkavičaŭ Andreja Zachareviča pačali sudzić u Mahiloŭskim abłasnym sudzie. Jamu stavicca ŭ vinu kamiercyjny špijanaž, niesankcyjanavany dostup da bankaŭskich kartak, uzłom sajtu Life, iłžyvaje miniravańnie z vykarystańniem asabistych źviestak starońnich asob, u pryvatnaści, Siarhieja Cichanoŭskaha, a taksama padrychtoŭka da źbićcia hramadzianina Kazachstana, piša 6tv.
Pavodle śledstva, z 2014 hoda Zacharevič, jaki pracavaŭ na inžynierna-techničnaj pasadzie ŭ adździele adukacyi Kalinkavickaha rajvykankama, zdabyŭ niezakonnym šlacham danyja 250 tysiač kartak žycharoŭ 114 krain śvietu. Piersanalnyja źviestki jon pradavaŭ, atrymaŭšy kala 25 młn dalaraŭ u kryptavalucie.
U 2019 hodzie Zacharevič źviarnuŭsia ŭ Mazyrski rajonny sud, adnu sielskuju škołu Kalinkavickaha rajona i inšyja ŭstanovy ź iłžyvaj infarmacyjaj ab miniravańni. Pahrozy jon pisaŭ ad imionaŭ deputata sielskaha savieta Rozy Strelčanki, błohieraŭ Siarhieja Cichanoŭskaha, Andreja Pavuka, Uładzimira Cyhanoviča, Arcioma Šaparava.
Adkazvajučy na pytańni prakurora ab mecie takich iłžyvych paviedamleńniaŭ, Zacharevič kazaŭ, što takim čynam chacieŭ vyklikać hramadski rezanans da ich dziejnaści, jakuju jon nazyvaje destruktyŭnaj u adnosinach da ŭłady. «Kab im zadavali pytańni i na ich reahavali», — skazaŭ padsudny.
Taksama ŭ spravie Zacharevič sprabavaŭ za 5 tys dalaraŭ arhanizavać źbićcio hramadzianina Kazachstana, adnak realizacyi zadumanaha pieraškodziła pandemija karanavirusa.
U pracesie, jaki viadzie sudździa Siarhiej Mazuraŭ, ahułam razhladajuć 21 epizod złačynnaj dziejnaści, pryčym 17 ź ich — zaviedama iłžyvyja paviedamleńni pra niebiaśpieku i akty teraryzmu. Zacharevič pryznaje vinu častkova.
Ciapier čytajuć
Što za 17-hadovy startapier, jaki vyliŭ cebar chłuśni na Libiera na radaść biełaruskim śpiecsłužbam7
Kamientary