Ci lohka Kramlu skinuć Łukašenku?
Kreml zakusiŭ hubu. «Vyhladaje na toje, što niekamu prosta nadakučyła być prezidentam hetaj krainy», — złaviesna zajaviła krynica ŭ atačeńni Miadźviedzieva. Ale ci tak lohka Maskvie skinuć Łukašenku? Piša ŭ svaim błohu na NN Alaksandr Kłaskoŭski.
Kreml zakusiŭ hubu. «Vyhladaje na toje, što niekamu prosta nadakučyła być prezidentam hetaj krainy», — złaviesna zajaviła krynica ŭ atačeńni Miadźviedzieva. Heta adbyłosia paśla taho, jak Łukašenka bajkatavaŭ samit ADKB i daŭ zrazumieć, što hatovy pastavić pahrancoŭ dy mytnikaŭ na rasijskaj miažy.
U roli Kasandry tradycyjna vystupaje «Kommiersant'». Padtekst zajavy kramloŭskaha ananima bolej čym prazrysty. Ź jaho vynikaje, što pamianiać fihuru na čale našaj krainy kramloŭcam jak raz plunuć.
Ale ci sapraŭdy tak? Ci sapraŭdy Kreml zdolny skinuć Łukašenku adnoj levaj? Narešcie, nakolki rasijskaja kiroŭnaja elita ŭ hetym zacikaŭlena?
Łukašenka ž jašče dla Pucina staŭ kostkaj u horle. Adnak uziać PPRB ni hołymi rukami, ni ŭ jažovych rukavicach tak i nie pašenciła.
Sproby stvaryć u nas niejkuju prarasijskuju piatuju kałonu za ŭvieś pastsaviecki čas nie prynieśli bačnaha plonu. Usie adpaviednyja hramadska-palityčnyja struktury byli marhinalnymi i cicha zaviali. Mocnaha prarasijskaha kandydata na vybarach taksama vyłučyć nie atrymałasia. Dy i jakija tut, k čortu, vybary?
Varyjanty niejkaj śpiecapieracyi ci pałacavaha pieravarotu taksama małaimaviernyja (čamu — asobnaja tema).
Puścić tanki, jak na Tbilisi? Ale ž pierad hetym treba zrabić sieparatyscki ankłaŭ ź jakoha-niebudź tam Škłoŭskaha rajona. Nie, i hety scenar nie kocić :)
Dyk jak ža tady, kažučy pa-kramloŭsku, «mačyć u sarciry»?
Zastajecca ekanamičnaja dušyłaŭka. Toj samy «Kommiersant'» užo pradrakaje hazavuju vajnu. Ale ž heta bumieranh. Tym bolej na fonie ciapierašniaha aljansu Minska z Kijevam. Dy i Jeŭropa na dybki ŭzdymiecca.
Darečy, mienavita jeŭrapiejski, zachodni čyńnik zaraz vyhladaje vyratavalnym. Zachad moh by navat adkłaści vychavaŭčyja razmovy i prosta dapamahčy ŭtrymać niezaležnaść. Ale unikalny histaryčny šaniec na rezkaje zbližeńnie ź Jeŭropaj — nie dla hetaha palityčnaha režymu. Piersanalisckaj, antydemakratyčnaj sistemie niama čaho łavić u sadružnaści Staroha Śvietu. Chacia hulnia na jeŭrapiejskim čyńniku zaraz, kaniečnie, aktyvizujecca.
Razam z tym, najbolej imaviernym vyhladaje varyjant, što paśla abmienu ŭdarami adbudziecca niejkaje ŭłahodžvańnie stasunkaŭ z Rasijaj. Tam spracujuć tradycyjnyja vialikadziaržaŭnyja fobii. Pryčym strašna stracić nie tolki RŁS pad Hancavičami, abjekt pad Vilejkaj, uvohule uvieś hety stratehičny «biełaruski bałkon». Musić, najstrašniej, što inšy ŭrad sapraŭdy voźmie kurs na Jeŭropu.
Jašče i tamu Rasii niavyhadna abvalvać biełaruskuju ekanomiku.
Tak što paśla fazy vajny čakajma niejkich uzajemnych sastupak, niejkaha varyjantu zamireńnia. I znoŭ budzie pocisk ruk z kryvymi ŭśmieškami dy poŭnymi nianaviści pohladami.
Kamientary