Isłandskamu elektryku zrabili pieršuju ŭ śviecie apieracyju pa transpłantacyi abiedźviuch ruk i plačej
Dva dziesiacihodździ tamu isłandski elektryk atrymaŭ ciažkija traŭmy ŭ vyniku niaščasnaha vypadku.
Daktary śćviardžajuć, što pakul niezrazumieła, nakolki ŭ kančatkovym vyniku adnovicca ruchomaść ruk 48-hadovaha Fieliksa Hretarsana. Apieracyja była praviedziena ŭ pačatku studzienia ŭ francuzskim horadzie Lijonie, paviedamlaje The Telegraph.
«Kali jon budzie zdolny zhinać łokać, heta źmienić jaho žyćcio», — adznačyŭ na pres-kanfierencyi Aram Hazaran, viadučy chirurh apieracyi.
12 studzienia 1998 hoda Fieliks Hretarsan pracavaŭ na vysakavoltnaj linii elektrapieradač. Raptam chvala napružańnia 11 000 volt abpaliła jaho ruki i skinuła na zaledzianiełuju ziamlu. Elektryk atrymaŭ šmatlikija pierałomy i ŭnutranyja paškodžańni. Na praciahu troch miesiacaŭ jon znachodziŭsia ŭ komie, padčas jakoj daktary byli vymušanyja amputavać jaho abiedźvie ruki. Fieliks Hretarsan pieranios jašče niekalki apieracyj, u tym liku pierasadku piečani.
Kab znajści adpaviednych donaraŭ, spatrebiłasia niekalki hadoŭ, a ŭ padrychtoŭcy da apieracyi ahułam udzielničali nie mienš za 50 miedycynskich rabotnikaŭ. Padčas apieracyi pracavali čatyry chirurhičnyja bryhady, kab minimizavać čas transpłantacyi ad donara da recypijenta.
Praz 9 dzion paśla apieracyi daktary nie vyjavili surjoznych uskładnieńniaŭ. I choć pacyjentu jašče daloka da taho, kab pačać ruchać rukami, Fieliks Hretarsan zadavoleny vynikam. «Heta była jaho samaja vialikaja mara», — adznačaje žonka.
Kamientary