Sfatahrafavaŭsia biez dazvołu čynoŭnikaŭ. Mahiloŭca asudzili na 10 sutak za fota z nacyjanalnym ściaham
U Mahilovie za fatahrafavańnie ź bieł-čyrvona-biełym ściaham asudzili na 10 sutak 34-hadovaha Alaksandra Saŭčanku.
Kastryčnicki sud uhledzieŭ u dziejańniach mahiloŭca parušeńnie paradku arhanizacyi i praviadzieńnia masavaha mierapryjemstva. Spravu razhladała sudździa Žanna Puškina, piša «Radyjo Svaboda».
Da suda Alaksandra Saŭčanku try dni trymali ŭ izalatary.
Svajoj viny aktyvist nie pryznaŭ, ale admoviŭsia davać tłumačeńni suda.
Jak vynikaje z materyjałaŭ spravy, jon sfatahrafavaŭsia kala steły na ŭjeździe ŭ Babrujsk sa ściaham, na jakim byŭ nadpis «Jamnicki fłot». Hetaje fota apublikavaŭ adzin z babrujskich telehram-kanałaŭ.
Jak jon fatahrafavaŭsia sa ściaham, zaŭvažyli milicyjanty, jakija jechali mima. Paźniej na mahiloŭca skłali administracyjny pratakoł. U materyjałach spravy jość daviedka, što jon nie źviartaŭsia ŭ Babrujski rajvykankam pa dazvoł na praviadzieńnie masavaha mierapryjemstva.
Sudzili Saŭčanku praz skajp. Upieršyniu na administracyjnym pracesie abvinavačanaha zmahli bačyć tyja, chto znachodziŭsia ŭ zale pasiadžeńniaŭ. Raniej takaja mahčymaść była tolki ŭ sudździ.
Heta ŭžo treci prysud Alaksandru Saŭčanku za pratesty, raniej jon adbyŭ pad aryštam 6 dzion.
Bieł-čyrvona-bieły ściah z nadpisam «Jamnicki fłot» staŭ niefarmalnym ściaham pasiołka Jamnicki, što na ŭskrajku Mahilova, paśla masavaha zatrymańnia tut prychilnikaŭ pieramienaŭ. U kastryčniku 13 mahiloŭcaŭ sabrałasia na miascovaj sažałcy, kab spuścić na vadu bieł-čyrvona-biełyja karabliki i nievialiki płyt. Niečakana na miescy akcyi źjavilisia na dźviuch mašynach amapaŭcy i zatrymali ŭsich udzielnikaŭ. Siarod ich byli šeść žančyn. Bolšaść udzielnikaŭ praviali pa niekalki dzion u izalatary časovaha ŭtrymańnia.
Kamientary