Viadomy šoŭmien vykazaŭ zachapleńnie žycharami biełaruskaj pravincyi
Paet, šoŭmien, televiadučy Usievaład Ścieburaka padzialiŭsia emocyjami ŭ fejsbuku, jakija ŭ jaho vyklikajuć žychary małych haradoŭ i miastečak, jakija vychodziać na pratest.
Samaje vialikaje majo ŭražańnie ŭ sioletnich pratesnych padziejach ad sapraŭdnaj biełaruskaj pravincyi. Taja, pra jakuju Viktar Šałkievič napisaŭ hienijalnuju i balučuju svaju adnajmiennuju pieśniu, dzie «na šybienicach hajdalisia najlepšyja chłopcy», taja, vyračanaja na hałotu i biespracoŭje, vysmaktanaja vialikimi haradami, pazbaŭlenaja mnohich dabrotaŭ cyvilizacyi, a časta i banalnych lichtaroŭ na vulicy, jana — majo uražańnie №1!
Maładziečna i Pinsk, Žodzina i Salihorsk, Žłobin i Hancavičy, dziasiatki haradkoŭ, miastečak i navat viosak — vy maje hieroi!
Vy štoraz robicie maleńki podźvih.
U vas ludzi vychodziać na pratest, jak na pracu, navat nie spadziejučysia trapić u naviny ci choć imklivuju stužku bujnoha th-kanała, pierad razhonam ci aryštam. U vas pratestoŭcy vitajucca za ruku, bo vas možna pieraličyć pa hałovach. U vas vyjści — aznačaje amal aŭtamatyčna trapić u pole zroku ci na sutki, bo niama natoŭpu, dzie možna schavacca.
U vas radaść i strach dzielacca miž niamnohimi i tamu majuć vysoki košt.
Dziakuj tabie, maja šlachietnaja Vialejka, što ty źbiraješsia ad samaha pačatku! Što šychtavała vykankamaŭcaŭ u zale DK, što stajała ŭ łancuhach i źbirała mitynhi, što hodna ŭšanoŭvała pamiać zabitych — ziemlaka Mikity Kryŭcova, a zaraz Ramana Bandarenki…
Dziakuj vialejskim chłopcam, jakija cierpiać pieraśled, štrafy, nie vyłaziać z sutak, ale nie maŭčać — Alaksiej Siudak, Andrej Kudzik, Vital Sałaniec, Pavał Chavanski i inšyja, tyja, ź jakimi maju honar być znajomym, i tyja, kaho viedaju zavočna. Dziakuj vam, bratočki!
Trymajciesia! Mnie mała što jość dadać vam… Chiba adno: u słoŭniku novaj Biełarusi słova prezident budzie znoŭ pisacca z małoj litary, a voś Pravincyja nazaŭždy — ź vialikaj!
Biznesmien, biełaruska sa Šviecyi, chłopiec, asudžany za čat na piaciarych. Kaho jašče vyzvalili i vyvieźli ŭ Vilniu razam ź Siarhiejem Cichanoŭskim1212
Kamientary