U internecie źbirajuć hrošy na vydańnie kazki Astryd Lindhren «Ronia, dačka razbojnika» pa-biełarusku
Da 14 listapada, dnia narodzinaŭ znakamitaj šviedskaj piśmieńnicy Astryd Lindhren, rychtujecca vydańnie biełaruskaha pierakładu jaje čaroŭnaj apovieści «Ronia, dačka razbojnika». Srodki na vydańnie źbirajucca praz kraŭdfandynh.
Hety tvor — pra staleńnie, stasunki z baćkami ŭ čas, kali dzicia pačynaje šukać samastojny šlach u žyćci, pra varažnieču i prymireńnie, luboŭ i kachańnie, viernaść, advahu, pra toje, jak lohka ŭsio razburyć praz drobiazi, i pra kaštoŭnaść žyćcia. Ale adnačasova i pra viasiołyja pryhody, bo hałoŭnyja hieroi ŭsio jašče dzieci. Jany pryručajuć dzikich koniej, uciakajuć ad lutych viatruńniaŭ i žyvuć u piačory pasiarod dzikaha lesu. Tamu dla maleńkich čytačoŭ heta čaroŭnaja kazka, dla starejšych — nahoda zadumacca pra sapraŭdy kaštoŭnyja ŭ žyćci rečy, a dla baćkoŭ — vydatnaja mahčymaść i parazmaŭlać ź dziećmi na składanyja temy, i pravieści niekalki viečaroŭ u kazačnym śviecie.
Kniha całkam hatovaja da druku, ale dla taho, kab jana vyjšła, patrebnaja vaša dapamoha. Na admysłovaj staroncy kraŭdfandynhu vy možacie zamović asobnik pa samaj vyhadnaj canie i pračytać vodhuki na knihu dy vytrymki ź jaje. Zbor hrošaŭ skančajecca ŭžo ŭ piatnicu, zastaŭsia tolki adzin dzień!
Kamientary