KDB aryštavaŭ hałoŭnaha syščyka

Kamitet dziaržaŭnaj biaśpieki nanios čarhovy ŭdar pa sistemie Ministerstva ŭnutranych spraŭ. Jak stała viadoma «Je», čekisty pry padtrymcy Savieta biaśpieki aryštavali načalnika Hałoŭnaha ŭpraŭleńnia apieratyŭna‑vyšukovaj dziejnaści (HUAVD) MUS pałkoŭnika milicyi Ivana Šyšłu.

U MUS užo praktyčna adkryta havorać, što Kamitet dziaržbiaśpieki pačaŭ masiravanuju ataku suprać klučavych fihur milicejskaha viedamstva. Zrešty, hety fakt i biez taho staŭ zanadta vidavočnym.

Za apošni miesiac heta ŭžo treciaja bujnaja apieracyja KDB suprać kiraŭnikoŭ MUS.

Štoraz čekisty karaskajucca ŭsio vyšej i vyšej. Spačatku jany praviali apieracyju ŭ Homielskaj vobłaści, u vyniku čaho byli aryštavanyja dva kiraŭniki sistemy Kiravańnia pa baraćbie z karupcyjaj i ekanamičnymi złačynstvami (KBKiEZ). Potym front bajavych dziejańniaŭ pieramiaściŭsia ŭ Miensk, dzie byŭ zatrymany načalnik KBKiEZ pałkoŭnik Viktar Jermakoŭ. Jaho praz try dni adpuścili, a samu raspačatuju kryminalnuju spravu pieradali na rasśledavańnie ŭ Hienieralnuju prakuraturu, ale fakt zastajecca faktam.

Z aryštam pałkoŭnika Ivana Šyšły KDB padniałosia jašče vyšej.

Hety čałaviek adkazvaŭ za apieratyŭna‑vyšukovuju dziejnaść usiaho milicejskaha viedamstva, mienavita pad jaho kiraŭnictvam pracavała kryminalnaja vyviedka MUS i pravodzilisia samyja hučnyja apieracyi.

I.Šyšła paźbiahaŭ niejkich publičnych vystupaŭ (praca takaja), tamu zvyčajnamu čałavieku jon całkam nieznajomy. Ale ŭ MUS jon dobra viadomy. I.Šyšła pačynaŭ svaju milicejskuju karjeru ŭ Barysavie prostym apieratyŭnikam kryminalnaha vyšuku. Potym staŭ načalnikam adździeła, zatym — kiraŭnikom barysaŭskaj milicyi. Jak ni dziŭna, ale navierch I.Šyšła ŭźlacieŭ paśla «zalotu», kali jaho namieśnikaŭ razam ź inšymi słužboŭcami Barysava zaśpieli za kalektyŭnaj pjankaj u padatkovaj inśpiekcyi. Paśla hetaha I.Šyšła źniali i… pieraviali va UUS vobłaści, adtul jon pierajšoŭ užo ŭ MUS.

Kalehi charaktaryzujuć I.Šyšłu jak prafiesijanała ź vialikaj litary, jaki akramia ŭsiaho inšaha nikoli nie zabyvaŭ ab prostych prablemach padnačalenych i zaŭsiody dapamahaŭ im pry nieabchodnaści. Z aryštam pałkoŭnika ŭ MUS zusim zasumavali, i navat tyja, chto ciešyŭsia z adstaŭki Ŭładzimira Naumava, zaraz z adčajem kažuć: voś, kinuŭ na źjadzieńnie…

Što dyčycca matyvaŭ aryštu pałkoŭnika, to tut usio pakryta tajamnicaj. Viadoma tolki, što pytańnie ab aryšcie I.Šyšły vyrašałasia na admysłova sklikanaj naradzie ŭ Saviecie biaśpieki. I tolki kali sam dziaržsakratar Savieta biaśpieki Jury Žadobin daŭ dabro na aryšt, čekisty pačali apieracyju.

Pavodle niepaćvierdžanych pakul źviestkach, I.Šyšłu raspracoŭvajuć pa dvuch kirunkach. Pieršy tyčycca niejkaj daŭniaj spravy, źviazanaj z pabudovaj doma.

A voś druhi moža kaštavać vialikich pierturbacyj va ŭsim MUS.

Havorka idzie ab kradziažach srodkaŭ admysłovaha artykuła vydatkaŭ MUS, jakija nakiroŭvalisia na apieratyŭna‑vyšukovuju dziejnaść: praca z krynicami infarmacyi, ukaranieńnie ŭ złačynnyja hrupy i arhanizacyi i h.d. U kryminalnaj vyviedcy hety artykuł vydatkaŭ vielmi salidny i, kažuć, im karystalisia vielmi volna. Zrešty, takaja ža situacyja i va ŭsich inšych siłavych viedamstvach, dzie viadziecca apieratyŭna‑vyšukovaja dziejnaść, u tym liku i ŭ KDB. Adzin Boh viedaje, kolki z tych krynic infarmacyi, na jakich śpisvajucca hrošy, na samaj spravie źjaŭlajucca «miortvymi dušami». Tym nie mienš kažuć, što KDB atrymała dabro na pravierku taho, jak u MUS vykarystoŭvaŭsia dadzieny artykuł ź identyfikacyjaj usich asob, na jakich śpisvalisia srodki. Pa sutnaści heta aznačaje, što KDB atrymaje dostup da sakretnaj infarmacyi MUS, praź jakuju voźmie pad kantrol usiu apieratyŭna‑vyšukovuju dziejnaść viedamstva.

U MUS kažuć, što heta ŭdar u samaje serca i što metaj napadu źjaŭlajecca prasoŭvańnie ŭ ministerskaje kresła staršyni Dziaržaŭnaha pamiežnaha kamiteta Ihara Račkoŭskaha.

Zrešty, heta chutčej za ŭsio moža być tolki čutkami ‑‑ apošniaja sproba pieramožanych choć niejak abaranicca. Pa dziŭnym supadzieńni adnačasova z aryštam I.Šyšły pa Minsku raspaŭsiudziŭsia słych ab padrychtavanym płanie niečuvanaha skaračeńnia orhanaŭ unutranych spraŭ. Niby i da hetaha taksama prykłali ruku čekisty z pamiežnikami

Hieorhi Dań, Ježiednievnik

• 0
• 0
• 0
• 0
• 0
• 0
• 0
• 0