Siaredniaviečnaje zielle vyjaviłasia macniejšym za antybijotyki
Pakolki śmiarotna niebiaśpiečnyja bakteryi stanoviacca ŭsio mienš adčuvalnymi da antybijotykaŭ, navukoŭcy, jakija nie paśpiavajuć stvarać novyja pakaleńni efiektyŭnych lekaŭ, u rospačy vyrašyli źviarnuć uvahu na staradaŭnija znacharskija knihi. I znajšli patrebnuju formułu ŭ tak zvanaj Lekarskaj knizie Balda, jakoj kala tysiačy hadoŭ, piša bbc.com.
Usie recepty, jakija źmiaščajucca ŭ siaredniaviečnym anhlijskim manuskrypcie, prajšli vyprabavańnie časam.
Ale chaj maź ad načnych naviedvańniaŭ hoblinaŭ siońnia nie maje popytu, zatoje tak zvanaja maź dla vačej Balda vyjaviłasia vielmi dziejsnym srodkam.
Raniej navukoŭcy ŭžo vyśvietlili, što hetaje zielle zabivaje załacisty stafiłakok Staphylococcus aureus, adnak padčas novaha daśledavańnia Džesika Fiernier-Pardou z Uorykskaha ŭniviersiteta nie tolki paćvierdziła hetyja vyniki, ale i pakazała, što maź zdolnaja źniščyć navat asabliva reziscentnuju da sučasnych lekaŭ bijaplonku, jakuju farmuje stafiłakok.
Padčas ekśpierymientu zvaryli 75 porcyj mazi Balda, u skład jakoj uvachodziać časnyk, cybula (abo cybula parej — z aryhinalnaha receptu heta nie zusim zrazumieła, tamu navukoŭcy na ŭsialaki vypadak zrabili dva varyjanty ziella), byčynaja žoŭć i vino.
I kožny raz maź źniščała bijaplonku, dla baraćby ź jakoj daktary ŭžyvajuć antybijotyki ŭ kancentracyi, što ŭ sotni razoŭ pieravyšaje zvyčajnuju. Jana dobra spracavała i ŭ baraćbie ź inšymi niebiaśpiečnymi bakteryjami, zaražeńnie jakimi ciažka paddajecca lačeńniu i časta zakančvajecca amputacyjaj.
Tut varta adznačyć, što inhredyjenty, jakija ŭvachodziać u skład mazi, pracujuć tolki razam. Kali daśledčyki pasprabavali vyłučać ź jaje asobnyja składniki i čyścić ich, efiektyŭnaść rezka źnižałasia.
Sprava ŭ tym, što sučasnaja farmaceŭtyka imkniecca raźbić leki na składniki i maksimalna ačyścić ich, tady jak siaredniaviečnyja znachary, naadvarot, išli šlacham spałučeńnia pryrodnych charaktarystyk roznych rečyvaŭ, jakija takim čynam dapaŭniali adno adno i ŭzmacniali sukupny efiekt.
Da prykładu, vino, cybula i žoŭć, vydzielenyja ź ziella, sami pa sabie ŭ časie ekśpierymientu pakazali słabyja antymikrobnyja ŭłaścivaści i nie dali rady nie tolki bijaploncy, ale navat i asobnym bakteryjam.
Navukoŭcy jašče pavinny z bolšaj dakładnaściu vyśvietlić, ci pracuje maź Balda ŭ kliničnych umovach, adnak užo ciapier možna vykazać zdahadku, što jana nie škodzić, a tamu farmaceŭtam varta da jaje pryhledziecca.
Ciapier čytajuć
Minski miedyk pajšoŭ vajavać za Rasiju, praź miesiac atrymaŭ ciažkaje ranieńnie, a ciapier vybivaje vypłaty, siedziačy ŭ invalidnym vazku9
Minski miedyk pajšoŭ vajavać za Rasiju, praź miesiac atrymaŭ ciažkaje ranieńnie, a ciapier vybivaje vypłaty, siedziačy ŭ invalidnym vazku
U Biełarusi zaćvierdzili praviły evakuacyi kaštoŭnaściaŭ na vypadak vajny: cehłu z Bresckaj krepaści z nadpisami buduć ratavać pierš za karciny Šahała i Sucina1313
Kamientary