Dva dziasiatki kulturnickich arhanizacyj i inicyjatyŭ Biełarusi zapatrabavali vyzvaleńnia Viktara i Eduarda Babarykaŭ
Kulturnickaja supolnaść Biełarusi rašuča pratestuje suprać palityčna matyvavanaha pieraśledu dziejačaŭ kultury i suprać inšych dziejańniaŭ biełaruskich uładaŭ, jakija błakujuć isnavańnie važnych kulturnych i hramadskich inicyjatyŭ.
Padčas praviadzieńnia pieradvybarčaj kampanii zatrymanyja miecenat, fiłantrop i hramadski dziejač, eks-staršynia kiraŭnictva «Biełhazprambanka» Viktar Babaryka i jahony syn, kiraŭnik płatformaŭ Ulej i MolaMola, mieniedžar kultury Eduard Babaryka. Pravaabarončaja supolnaść Biełarusi pryznała Eduarda i Viktara Babarykaŭ palitviaźniami. Byli źniatyja z pakazu i dałučanyja da kryminalnaj spravy suprać «Biełhazprambanka» tvory z karparatyŭnaj kalekcyi banka, paralizavanaja dziejnaść kraŭdfandynhavych placovak Ulej i MolaMola.
Dziakujučy inicyjatyvie Viktara Babaryki i padtrymcy «Biełhazprambanka» za apošniaje dziesiacihodździe byli realizavanyja nastupnyja kulturnyja prajekty:
- Mižnarodny forum teatralnaha mastactva «TeArt» (pieršapačatkova — Teatralny tydzień z «Biełhazprambankam», 2010 — 2019),
- vystava «Dziesiać stahodździaŭ mastactva Biełarusi», prymierkavanaja da 75-hadovaha jubileju Nacyjanalnaha mastackaha muzieju Biełarusi (2014),
- prajekt «Vosieński sałon z «Biełhazprambankam»» (2015 — 2019), paklikany pradstavić tvory maładych biełaruskich mastakoŭ, jakija pracujuć u roznych vidach i technikach vyjaŭlenčaha mastactva (žyvapis, hrafika, fatahrafija, skulptura, dekaratyŭna-prykładnoje mastactva i instalacyja),
- byŭ stvorany i aktyŭna funkcyjanuje kulturnicki chab OK16 (2017 — pa ciapierašni čas).
U 2018 hodzie «Biełhazprambankam» było prafinansavanaje vydańnie 15 000 asobnikaŭ piacitomnika Śviatłany Aleksijevič u pierakładzie na biełaruskuju movu dla pieradačy ŭ dar biblijatekam Biełarusi.
U 2015 hodzie Viktar Babaryka atrymaŭ hanarovaje zvańnie «Miecenat kultury Biełarusi» pa vynikach 2014 hoda. Adna z najbolš hučnych jaho inicyjatyŭ — stvareńnie karparatyŭnaj kalekcyi «Biełhazprambanka».
Karparatyŭnaja kalekcyja «Biełhazprambanka» — zbor tvoraŭ mastactva, jaki farmirujecca ŭ miežach realizacyi nacyjanalnaha historyka-kulturnaha prajekta «Art-Biełaruś» i naličvaje siońnia bolš za 150 artefaktaŭ — karciny, skulptury, knihi. Jadro kalekcyi składajuć tvory mastakoŭ Paryžskaj škoły, jakija naradzilisia ŭ Biełarusi: Marka Šahała, Chaima Sucina, Šrahi Carfina, Pinchusa Kremienia, Michaiła Kikoina, Vosipa Lubiča, Vosipa Cadkina. 35 ekspanataŭ zboru ŭklučanyja ŭ Dziaržaŭny śpis historyka-kulturnych kaštoŭnaściej Respubliki Biełaruś. Značnaja častka kalekcyi z 2017 hodu ekspanavałasia ŭ halerei «Art-Biełaruś», jakaja mieścicca ŭ Pałacy mastactvaŭ i da apošnich dzion była dastupnaja dla ŭsich naviednikaŭ. Pavodle infarmacyi dziaržaŭnych ŚMI «paŭtary sotni karcin koštam 20 miljonaŭ dalaraŭ dałučanyja da kryminalnaj spravy», źviazanaj z supracoŭnikami «Biełhazprambanku». Mastactvaznaŭcy nazyvajuć heta rejdarskim zachopam. Na siońnia los i miescaznachodžańnie kalekcyi nieviadomyja.
U červieni 2020 hoda zabłakavanyja rachunki kraŭdfandynhavych i fandrajzinhavych placovak Ulej i MolaMola, jakija plonna pracavali tam, dzie nie spraŭlalisia sa svaimi abaviazkami ministerstva kultury (a taksama adukacyi, infarmacyi, achovy zdaroŭja, sacyjalnaha zabieśpiačeńnia). Ciaham piaci hadoŭ praz partał ulej.by realizavaŭsia ceły šerah prajektaŭ, siarod jakich 211 było źviazana z vydańniem knih dla dziaciej i darosłych na ruskaj i biełaruskaj movach, 82 — z pastanoŭkaj teatralnych i kinaśpiektaklaŭ, zdymkami dakumientalnych i karotkamietražnych hulniavych filmaŭ, 77 — z vydańniem debiutnych muzyčnych albomaŭ albomaŭ i klipaŭ užo viadomych vykanaŭcaŭ; 92 prajekty byli realizavanyja ŭ śfiery miedyja (błohi, publicystyka, anłajn-vydańni), 191 inicyjatyva była źviazanaja z sacyjalnaj śfieraj (padtrymka bolnic, dapamoha žyviołam, inšyja značnyja dla hramadstva prajekty); 126 prajektaŭ mieli dačynieńnie da dyzajnu (adzieńnie, aksiesuary, kreatyŭnyja pradukty), 88 biźnies-prajektaŭ pačynali svajo isnavańnie mienavita praz kraŭdfandynh.
U situacyi, kali dziaržaŭnaja palityka ŭ śfiery kultury aryjentavanaja pieravažna na padtrymku łajalnych uładzie tvorcaŭ, za apošnija hady Viktar i Eduard Babaryki stvaryli sapraŭdnuju ekasistemu dla isnavańnia biełaruskaj kultury.
My patrabujem spynieńnia palityčna matyvavanaha pieraśledu i vyzvaleńnia Viktara i Eduarda Babarykaŭ, a taksama «vyzvaleńnia» ich kulturnych prajektaŭ.
RHA «Biełaruski PEN-centr»
MHA «ZBS «Baćkaŭščyna»
HKK «Budźma Biełarusami»
Centr vizualnych i vykanaŭčych mastactvaŭ «ART Karparejšn»
Mižnarodny forum «TEART»
Art Siadziba
Asacyjacyja «Belfilm»
HA «Sajuz biełaruskich piśmieńnikaŭ»
Knižnaja sieryja «Amierykanka»
Pierakładčyckaja majsternia
Latučy ŭniviersitet
Jeŭrapiejski kaledž Liberal Arts u Biełarusi
Centr kultury VZAP
Kross-ciennostnaja antipłatforma
Press Club Belarus
HA «Tavarystva biełaruskaj movy imia Francyska Skaryny»
Vydaviectva «Januškievič»
Vydaviectva «Łohvinaŭ»
Vydavieckaja inicyjatyva «Pflaŭmbaŭm»
Zajava adkrytaja da padpisańnia inšymi arhanizacyjami
Kamientary