Hamielčuka, jakomu milicyjaniery ŭ cyvilnym źviazali ruki papruhaj, aryštavali na 15 sutak
Na 15 sutak aryštavali hamielčuka Alaksieja Dumiankova za niepadparadkavańnie milicyi. Takoje rašeńnie vynies u sudzie Čyhunačnaha rajonu Homla Alaksiej Chłyščankoŭ, paviedamlaje «Svaboda».
7 červienia Alaksieja Dumiankova kala doma zatrymali milicyjanty ŭ cyvilnym. Jany dahnali jaho, pastavili na kaleni i źviazali jamu ruki za śpinaj papruhaj. Alaksiej u toj dzień źbiraŭsia iści na pikiet pa zbory podpisaŭ za Śviatłanu Cichanoŭskuju.
Pavodle pratakołu, Dumiankoŭ uciakaŭ ad supracoŭnikaŭ RAUS, «šturchanuŭ supracoŭnika milicyi» i chapaŭ pravaachoŭnikaŭ «za formiennaje abmundziravańnie».
«Ja spačatku nia viedaŭ, što heta milicyjanty, — jany byli ŭ cyvilnym, i ich aŭtamabil byŭ nie słužbovy. Ja pabieh ad ich prosta ad strachu, pierapałochaŭsia. Ja nikoha nie šturchaŭ, nie kryčaŭ, nie abražaŭ, nie chapaŭ za vopratku. Kali jany ŭtroch padyšli da mianie — u mianie prosta serca zakałaciłasia, i ja pabieh uciakać», — patłumačyŭ na sudzie Dumiankoŭ.
Dahetul nieviadomy los Juryja Ŭłasava — paplečnika Siarhieja Cichanoŭskaha. Jon pavinien byŭ vyjści ź IČU 7 červienia paśla 30-dzionnaha aryštu. Ale viečaram u subotu akazałasia, što Jury znachodzicca ŭ izalatary. Ni ŭ sudzie, ni ŭ izalatary jahonaj žoncy nie paviedamili, čamu tak stałasia.
Kamientary