29 maja na videaservisie VOKA adbudziecca tranślacyja najnoŭšaha śpiektakla Nacyjanalnaha akademičnaha teatra imia Janki Kupały «Karol Lir». Pastanoŭku možna budzie ŭbačyć biaspłatna ź luboj kropki Biełarusi.
«Karol Lir» staŭ pieršaj i hałoŭnaj premjeraj jubilejnaha siezona — da hetaj znakamitaj pjesy kupałaŭcy źviarnulisia ŭpieršyniu. Kab hieroi Šekśpira zahavaryli pa-biełarusku, dla pastanoŭki režysior Mikałaj Pinihin uziaŭ tekst Juryja Haŭruka — vybitnaha pierakładčyka i ŭ minułym redaktara teatra.
Scenahrafija i kaściumy da śpiektakla zrobleny maładoj mastačkaj Kaciarynaj Šymanovič, čyja debiutnaja praca na vialikaj scenie Kupałaŭskaha — «Šlachcic Zavalnia, abo Biełaruś u fantastyčnych apaviadańniach» — stała adnym z hałoŭnych teatralnych adkryćciaŭ minułaha siezona. Muzyka da pastanoŭki napisana kampazitaram Andrejem Zubryčam.
U roli Lira — narodny artyst Biełarusi Viktar Manajeŭ. Vychavaŭšy troch dačok, karol Brytanii vyrašaje padzialić dziaržavu na častki i addać karonu. Stomleny ŭładar choča dažyć svaje dni ŭ lubovi. Ale naščadki dumajuć inakš — atrymaŭšy uładu, jany admaŭlajucca ad baćki i staroha karala. Lir stanovicca vyhnańnikam u hołym poli, dzie ad kolišniaj vieličy zastalisia ćmianyja ŭspaminy.
Roli dačok Lira vykonvajuć Viktoryja Čaŭłytka (Hanierylja), Valancina Harcujeva (Rehana) i Marta Hołubieva (Kardelija). Taksama ŭ śpiektakli zadziejničanyja Dźmitryj Jesianievič, Raman Padalaka, Ihar Sihoŭ, Andrej Hradabojeŭ, Ivan Kušniaruk, Ivan Trus, Andrej Drobyš, Alaksandr Kazieła, Alaksandr Paŭłaŭ, Alaksandr Zielanko, Andrej Kavalčuk, Pavieł Astravuch, Michaił Śvita, Pavieł Paŭluć.
Žyvy efir 29 maja budzie dastupny ŭ mabilnym dadatku VOKA ci na sajcie voka.tv ź luboj pryłady i ŭ sietcy luboha apieratara Biełarusi navat biez aŭtaryzacyi. Šmatkamiernaja mastackaja zdymka ŭ vysokaj jakaści dazvolić kožnamu hledaču maksimalna pahłybicca ŭ atmaśfieru teatralnaj zały i ŭbačyć usio, što adbyvajecca na scenie, z roznych rakursaŭ. Pakaz pačniecca a 19-j hadzinie.
Anłajn-pakaz ładzicca ŭ miežach śpiecyjalnaha prajekta da 100-ha siezona teatra, jaki prachodzić pry padtrymcy hienieralnaha partniora — kampanii A1.
Ciapier čytajuć
«Ja jašče moh sumniavacca ŭ sabie. Ale kali Maša takoje zrabiła!» Nieviadomyja fakty pra Viktara Babaryku raskazała jaho advakatka Natalla Mackievič77
Kamientary