Minsk spakušaje Vašynhton kalijnymi ŭhnajeńniami?

Biełaruskija ŭłady mohuć spakušać ZŠA pastaŭkami kalijnych uhnajeńniaŭ pa kankurentnych cenach. Hetu temu abmiarkoŭvali ekanamisty i palitołahi ŭ litoŭskich ŚMI.

Siońnia ZŠA kuplajuć kalij pieravažna ŭ Kanadzie. Heta daje Atavie zručny ryčah dla cisku na handlovych pieramovach z Vašynhtonam, što iduć sa skrypam.

Pradukcyja «Biełaruśkalija» raniej mieła asnoŭnyja rynki zbytu ŭ Kitai i Indyi. Łahistyka pastavak na amierykanski rynak takaja ž mahčymaja. Amierykanski rynak vializny, popyt na im harantavany: ZŠA — adzin z najbolšych vytvorcaŭ sielhaspradukcyi ŭ śviecie.

Dla Minska takaja pieraaryjentacyja mahła b być cikavaja nie tolki z ekanamičnych, ale i z palityčnych mierkavańniaŭ: tady b Vašynhton staŭ kroŭna zacikaŭleny ŭ tym, kab Jeŭropa — a heta pieradusim Polšča i Litva — bolš nie pierakryvali Minsku tranzitnych šlachoŭ.

Samy tanny maršrut pieravozki ŭhnajeńniaŭ — praź Litvu, port Kłajpiedy, dzie isnuje admysłova pabudavany pahruzačny terminał. Barjer — sankcyi ES suprać łukašenkaŭcaŭ i kiepskija adnosiny Vilni i Minska. Jany byli ŭviedzienyja ŭ 2022 hodzie ŭ adkaz na hibrydnyja ahresiŭnyja dziejańni Biełarusi i napad na Ukrainu.

Sankcyi suprać «Biełaruśkalija» — samyja balučyja z usich uviedzienych suprać łukašenkaŭcaŭ. Mnohija inšyja abmiežavańni lohka ci składana, ale abychodziacca. Ale dla kaliju inšaj tannaj łahistyki niama, i Minsk hublaje na hetym kala miljarda dalaraŭ za hod.

Čytajcie taksama: Voś zakrytaja statystyka ekspartu kaliju. Sankcyi dziejničajuć

U Vilni pabojvajucca apynucca ŭ situacyi, kali amierykancy pra niešta damoviacca ź Minskam cieraz hałavu litoŭcaŭ i palakaŭ. Ministr zamiežnych spraŭ Litvy Kiastucis Budrys pabyvaŭ u Vašynhtonie i razmaŭlaŭ sa śpiecpasłańnikam prezidenta ZŠA pa Biełarusi Džonam Koŭłam. U amierykanskaj stalicy ministr demanstravaŭ ćviordaść.

Staršynia biełaruskaha KDB — i hałoŭny pieramoŭnik z amierykancami — Ivan Cierciel paśla narady ŭ Alaksandra Łukašenki pa pytańniach adnosinaŭ z ZŠA 14 kastryčnika kazaŭ: «My majem usie šancy, usie šancy ŭ cełym, kab dasiahnuć praryvu ŭ adnosinach sa Złučanymi Štatami i Zachodniaj Jeŭropaj, my adkrytyja dla hetaha. I dumaju, što ŭ najbližejšy čas my pačujem dobryja naviny na hetym treku».

Adnak prajšoŭ miesiac, ale nijakich vialikich zruchaŭ nie adbyłosia. Praŭda, Polšča ad siońnia častkova adkryła dva pamiežnyja pierachody: u Bruzhach i Bierastavicy. Zatoje adnosiny ź Litvoj śpikiravali na dno paśla nalotaŭ mieteazondaŭ z kantrabandaj ź biełaruskaj terytoryi. Vilnia ŭspryniała heta jak hibrydnuju ataku i ŭ adkaz užyła krajniuju mieru: zakryła miažu, za čym pajšła burnaja reakcyja Minska pad apładysmienty rasijskaj prapahandy. Prasić prabačeńnia biełaruski dyktatar publična admoviŭsia. Naadvarot, Minsk zabaraniŭ vyjezd litoŭskich hruzavikoŭ u Biełarusi praz trecija krainy, faktyčna, aryštavaŭšy ich.

Litva, port Kłajpiedy stali asnoŭnaj darohaj ekspartu ŭhnajeńniaŭ «Biełaruśkalija» kala 20 hadoŭ nazad. Da 2021 hoda, da atak mihrantami, Litva paśladoŭna i adnaznačna vystupała suprać raspaŭsiudžvańnia režymu sankcyj na pradukcyju «Biełaruśkalija». Tak było, prykładam, u 2011 hodzie, kali mienavita hrupa krain na čale ź Litvoj zabłakavała pakiet anałahičnych sankcyj, za jakija vystupaŭ šerah inšych krain ES u adkaz na parušeńni pravoŭ čałavieka ŭ Biełarusi.

Da ŭviadzieńnia sankcyj praz port Kłajpiedy adhružałasia kala 11 miljonaŭ tonaŭ biełaruskich uhnajeńniaŭ štohod. ZŠA spažyvaje za hod ad 7 da 10 miljonaŭ tonaŭ kalijnych uhnajeńniaŭ. Biełaruś patencyjna zdolnaja zabiaśpiečvać usie patreby ZŠA ŭ hetaj syravinie.

Takaja ździełka Biełarusi była b vyhadnaja. Ale ŭ situacyi, kali režym Łukašenki ruchajecca ŭ bok tatalitaryzmu i praciahvaje padtrymlivać rasijskuju vajnu va Ukrainie, jeŭrapiejskija krainy bačać u Biełarusi pahrozu.

• 2
• 0
• 0
• 2
• 0
• 0
• 1
• 0