U zavoda AKB pad Brestam źmianiŭsia ŭłaśnik. Adzin z novych haspadaroŭ — trenier kamandy prezidenta
U skandalna viadomaha akumulatarnaha zavoda pad Brestam źmianiŭsia ŭłaśnik. Miesca padkantrolnaj Viktaru Lemiašeŭskamu kampanii «Bielinviesthandal-Spłaŭ» zaniali biznesmieny, jakija majuć mocny chakiejny bekhraŭnd, piša tut.by.
U 2016 hodzie zavod pad Brestam pačynała budavać kampanija «AjPaŭer», uładalnikam jakoj była firma «Bielinviesthandal-Spłaŭ». Abiedźvie struktury ŭvachodziać u 1AK-GROUP, saŭłaśnikam jakoj źjaŭlajecca biznesmien Viktar Lemiašeŭski.
«Akumulatarny zavod pad Brestam TAA «AjPaŭer» z 22 maja 2020 hoda vyviedzieny z-pad kantrolu hrupy kampanij 1AK-GROUP. U chodzie ździełki byŭ ździejśnieny prodaž 100% dolaj u statutnym fondzie TAA «AjPaŭer». U vyniku zavod atrymaŭ najmieńnie TAA «Akumulatarny Aljans». Novymi ŭdzielnikami tavarystva viaducca pieramovy z šeraham bujnych jeŭrapiejskich inviestaraŭ pa ŭvachodžańni ŭ kapitał zavoda», — paviedamili ŭ 1AK-GROUP.
Pavodle źviestak Adzinaha dziaržaŭnaha rehistra jurydyčnych asob, statutny fond novaha ŭłaśnika zavoda TAA «Akumulatarny Aljans» składaje 6,7 miljona rubloŭ. 85% doli kampanii naležyć Siarhieju Kahanoviču, a 15% — Dźmitryju Baskavu.
Kahanovič źjaŭlajecca namieśnikam dyrektara kampanii «Siem pahorkaŭ Bieł». Hrupa ŭklučaje kampanii, jakija zajmajucca vytvorčaściu roznych vidaŭ upakoŭki, prodažami składskoj i darožna-budaŭničaj techniki, stvareńniem łahistyčnych terminałaŭ.
Siarhiej Kahanovič daŭno zachaplajecca chakiejem, udzielničaŭ u spabornictvach z udziełam kamandy prezidenta.
Dźmitryj Baskaŭ — hiendyrektar chakiejnaha kłuba «Dynama-Minsk» i trenier kamandy Alaksandra Łukašenki.
«Raniej hulaŭ u kamandzie prezidenta. Potym staŭ trenieram. Heta jašče bolšaja adkaznaść, čym być bramnikam. Tut sprava navat nie treniravać, a kiravać kamandaj prezidenta. Prezident dazvalaje kiravać kamandaj, dazvalaje prymać rašeńni», — kazaŭ Baskaŭ paśla pieramohi na Kaladnym turniry-2020.
Kahanovič i Baskaŭ źjaŭlajucca členami savieta dyrektaraŭ BSB Banka.
Budaŭnictva akumulatarnaha zavoda vyklikała chvalu niezadavolenaści ŭ žycharoŭ Bresta i niekalkich viosak Bresckaha rajona. Jany ličać, što pradpryjemstva pahražaje ich zdaroŭju. Ad 25 lutaha 2018 hoda kožnuju niadzielu na płoščy Lenina ŭ Breście prachodziać sustrečy praciŭnikaŭ akumulatarnaha zavoda.
14 červienia 2019 hoda Brescki abłvykankam prypyniŭ budaŭnictva zavoda «da likvidacyi vyjaŭlenych parušeńniaŭ». Hienprakuratura pačała pravierku, KDB raspačaŭ kryminalnyja spravy za chabarnictva suprać Viktara Lemiašeŭskaha. U kancy hoda jaho i inšych fihurantaŭ spravy vypuścili ź SIZA da suda.
5 lutaha 2020 hoda Ekanamičny sud vynies rašeńnie pa pazovie Bresckaha abłvykankama da «AjPaŭer» ab viartańni 5,7 młn rubloŭ, jakija byli vyłučanyja kampanii ź inavacyjnaha fondu na budaŭnictva akumulatarnaha zavoda. Abłasnyja ŭłady nastojvali, što kampanija nie vykanała ŭmovaŭ damovy ab vydzialeńni srodkaŭ.
U pačatku krasavika 2020 hoda «AjPaŭer» atrymaŭ stanoŭčaje zaklučeńnie dziaržaŭnaj ekałahičnaj ekśpiertyzy pa prajekcie budaŭnictva akumulatarnaha zavoda i dazvoł na vykidy zabrudžvalnych rečyvaŭ u atmaśfieru.
23 krasavika Hałoŭdziaržbudekśpiertyza pryniała rašeńnie prypynić dziejańnie svajho zaklučeńnia pa akumulatarnym zavodzie. Padstavaj stała infarmacyja ab krynicach finansavańnia budaŭnictva akumulatarnaha zavoda.
Kamientary