Miedyki raskazali, jak viadziecca statystyka śmierciaŭ ad karanavirusa ŭ inšych krainach

Biełaruskaja statystyka pa karanavirusie adroźnivajecca ad ličbaŭ inšych krain. Tak, pry 30,5 tysiačy vypadkaŭ zachvorvańnia ŭ nas zarehistravana 171 śmierć ad COVID-19. Heta 0,6%.

Dla paraŭnańnia, u Šviecyi ź jaje najvyšejšym uzroŭniem žyćcia i raźvitaj miedycynaj, dzie taksama admovilisia ad karancinu i majuć 30,1 tysiačy paćvierdžanych vypadkaŭ COVID-19, kolkaść śmiarotnych vypadkaŭ vyšejšaja ŭ razy — 3679 (ci 12%). Ahułam pa Jeŭropie pracent śmiarotnaści ad karanavirusa vahajecca ad 3,5 da 14.

Jak viadziecca statystyka ŭ Biełarusi, Minzdaroŭja nie tłumačyć. Časam u paśviedčańniach ab śmierci fihuruje dyjahnaz «nieŭdakładnienaja pnieŭmanija», a svajaki pamierłaha nie viedajuć vynikaŭ testu.

«Naša Niva» paprasiła daktaroŭ, jakija pracujuć za miažoj, patłumačyć, jak uličvajuć latalnyja vypadki z COVID-19 u inšych krainach.

Pavialičyć

Polšča: važny faktar — zapalenčaja reakcyja

U Polščy paćvierdžana 18 529 vypadkaŭ karanavirusa i 925 śmierciaŭ. Pracent latalnych zychodaŭ siarod paćvierdžanych vypadkaŭ — 5.

Artur Macutkievič pracuje va Urocłavie ŭ adździaleńni aniestezijałohii i intensiŭnaj terapii Univiersiteckaj kliničnaj balnicy. Jon tłumačyć mietodyku Polščy:

«U statystyku śmiarotnaści ŭnosiacca paćvierdžanyja vypadki COVID-19, u katorych hałoŭnym patałahičnym miechanizmam chvaroby (tym, što jaje vyklikała ci adkazvała za praciah — NN) była sistemnaja zapalenčaja reakcyja.

Vostry reśpiratorny dystres-sindrom, pnieŭmanija jak adnyja z prajaŭ zapalenčaj reakcyi. Takija vypadki ŭličvajucca niezaležna ad taho, ci čałaviek mieŭ chraničnyja chvaroby, ci nie».

Vyklučeńniaŭ tut praktyčna niama. Čałaviek z karanavirusam moža nie patrapić u statystyku, tolki kali chvareŭ niečym inšym i mienavita heta chvaroba abo niepasrednyja jaje ŭskładnieńni pryviali da śmierci. Naprykład, pacyjent pieranios insult, praz heta byŭ u ciažkim stanie i ŭ nastupstvie pamior, ale nie było nijakich prajaŭ reakcyi zapaleńnia.

Aŭstryja: jość sprečnyja momanty

U Aŭstryi statystyka śmierciaŭ taksama ŭličvaje tych, chto byŭ pazityŭna testavany na karanavirus. Na 18 maja tam zarehistravana 16 176 vypadkaŭ zachvorvańnia i 629 śmierciaŭ (heta 3,9%).

Uładzimir Śvirkoŭ, aniestezijołah dziaržaŭnaj kliniki Kłahienfurt, kaža, što ŭ tamtejšych paśviedčańniach nie pišuć, ad čaho pamior pacyjent — zvyčajna prosta pieraličvajuć jaho dyjahnazy.

Ale chapaje sprečnych momantaŭ.

«Byŭ u nas pacyjent z COVID-19 i inšymi zachvorvańniami. Lažaŭ u reanimacyi, potym byŭ dva razy niehatyŭna testavany, pieraviedzieny ŭ niekavidnuju reanimacyju i tam pamior. Jon u statystyku nie patrapić. Tamu, jak jana viadziecca, heta amal fiłasofskaje pytańnie», — zaŭvažaje doktar.

ZŠA: bolš kankretyki, dyjahnaz mohuć pastavić navat biez testu

Ličby pa ZŠA vyhladajuć tak: 1,52 młn vypadkaŭ COVID-19 i 89 932 śmierci (5,9%).

Patołahaanatam špitala Koni-Ajlenda (Ńju-Jork) Nastaśsia Pihal raskazvaje pra dapamožnik, jakim kirujucca daktary pry vystaŭleńni pryčyny śmierci. Zhodna ź im, kali COVID-19 adyhraŭ rolu ŭ śmierci pacyjenta, heta abaviazkova pavinna być paznačana ŭ paśviedčańni.

Što admietna — dyjahnaz možna pastavić i biez testu na virus (kali abstaviny pierakanaŭčyja). Tady COVID-19 zapisvajecca jak «vierahodny» ci «mierkavany».

U niekatorych vypadkach stan pacyjenta moža być abciažarany chraničnymi zachvorvańniami, asabliva tymi, jakija źnižajuć funkcyjanalnaść lohkich — chraničnaja abstruktyŭnaja chvaroba lohkich ci astma. Jany mohuć pavialičyć ryzyku zaražeńnia reśpiratornaj infiekcyjaj, tamu taksama zanosiacca ŭ paśviedčańnie, ale nie ŭ hrafu asnoŭnych pryčyn.

Jašče adzin važny momant z amierykanskaha dapamožnika — asnoŭnuju pryčynu śmierci prosiać paviedamlać maksimalna kankretna. Heta budzie karysna dla hramadskaj achovy zdaroŭja i navukovych daśledavańnia. Naprykład, kali viadoma, što mieŭ miesca COVID-19, lepš paznačyć jaho, a nie prosta «virusnaja infiekcyja».

U ZŠA statystyka śmiarotnaści vykładziena ŭ ahulny dostup. Jana dapaŭniajecca kožny tydzień (apošnija dva tydni zvyčajna źmiaščajuć niapoŭnyja dadzienyja). Tam možna pabačyć nie tolki vypadki z karanavirusam, ale i ź pnieŭmanijaj.

«Adna z kałonak pakazvaje adnosnuju ahulnuju śmiarotnaść u paraŭnanni ź siarednim uzroŭniem 2017—2019 hadoŭ. Pakazčyk uklučaje ŭsie vypadki i havoryć ab upłyvie epidemii na ahulnuju śmiarotnaść», — zaŭvažaje Nastaśsia Pihal.

Tak, u krasaviku ŭzrovień śmiarotnaści ŭ asobnyja tydni byŭ na 12—31% vyšejšy, čym ŭ papiarednija hady.

• 0
• 0
• 0
• 0
• 0
• 0
• 0
• 0