«Usie pavinny być u maskach i karystacca antysieptykami». Baćki ździŭleny ŭmovami, na jakich ich dziaciej čakajuć u škołach

20 krasavika dzieci pavinny viarnucca da vučoby — tak u piatnicu vyrašyŭ Łukašenka. Minadukacyi rastłumačyła: chto choča, moža vučycca dystancyjna, astatnich čakajuć u škołach. Tut płanujuć pravodzić adpaviednyja supraćepidemičnyja mierapryjemstvy, kab nie dapuścić raspaŭsiudžvańnia karanavirusa. Praŭda, niekatoryja ź ich ździvili biełaruskich baćkoŭ, piša Tut.by.

«Pavažanyja baćki. U dziaciej, jakija pryjduć u paniadziełak u škołu, pierad urokami abaviazkova pamierajuć tempieraturu. Uvieś dzień — i na ŭrokach, i na pierapynkach - dzieci pavinny być u maskach. U kožnaha z vučniaŭ pavinny być asabistyja antysieptyki dla apracoŭki ruk», — takija ci padobnyja paviedamleńni atrymali ŭ piatnicu i subotu baćki vučniaŭ mnohich minskich škoł. U redakcyi TUT.BY jość bolš za dziasiatak skrynšotaŭ paviedamleńniaŭ ad kłasnych kiraŭnikoŭ u baćkoŭskich čatach z takim źmiestam. Patrabavańni ad administracyj pryjšli jak baćkam pieršakłaśnikaŭ, tak i starejšaj škole.

— Maja dačka ŭ pieršym kłasie. Ja nie ŭjaŭlaju, jak prymusić siamihodku ŭ pryncypie nadzieć masku — nie toje što prasiedzieć u joj niekalki hadzin. Adža jaje jašče treba mianiać — ci stanie pieršakłaška za hetym sačyć? Sama našu masku, bo mušu jeździć na pracu na hramadskim transparcie, — i viedaju, što ŭ miedycynskaj adnarazovaj mascy dastatkova niekamfortna dychać navat darosłamu, nie toje što dziciaci, — raspaviadaje minčanka Iryna.

Žančyna kaža, što čat ich kłasa druhi dzień hudzie na temu taho, što ich dzieci — a ŭ škołu ŭ paniadziełak pakul źbirajucca kala 10 pieršakłašak z 29 — buduć rabić z maskami i antysieptykami.

— Baćki śmiajucca — ale heta nasamreč nie śmiešna, - što spačatku dzieci vytruć maskami padłohi, ruki i tvar adzin adnaho, potym vyparać u vočy antysieptyki abo pasprabujuć ich na smak… Heta ž dzieci! I chto za heta budzie adkazvać? Kamu ŭsio heta treba?

Alaksandr u niadzielu źbirajecca iści ŭ apteku pa marlevuju masku dla svajoj dački — vaśmikłaśnicy adnoj ź minskich škoł.

— Kłasnaja napisała: antysieptyki i maski budzie praviarać na ŭvachodzie dziažurny piedahoh, chto nie vykonvaje praviły — moža być nie dapuščany da zaniatkaŭ. Dačka siońnia pasprabavała pachadzić doma ŭ miedycynskaj — kaža, dychać drenna i akulary paciejuć praz chvilinu. Dakładna viedaju, zdymie, jak tolki vyjdzie z majho pola zroku. Kupim marlevuju, moža, jana lepš «dychaje».

— Nakolki ja viedaju, administracyi našaj škoły dasłali vielmi raspłyvistyja rekamiendacyi: maŭlaŭ, dziaciej treba pasadzić pa adnym, u stałovaj sačyć, kab nie kantaktavali ź inšymi kłasami, usie pavinny vykonvać masačny režym, — raspaviadaje piedahoh adnoj sa staličnych himnazij na ŭmovach ananimnaści. — Voś tolki mnie da hetaha času nichto nie patłumačyŭ, jak pasadzić pa adnym kłas z 28 čałaviek — kab jany ŭsie raptam vyrašyli 20 čysła pačać vučycca vočna. I što takoje masačny režym, taksama nie patłumačyli: chto pavinien być u maskach? ja? dzieci? i my, i dzieci? Administracyja paprasiła: papiaredźcie baćkoŭ, kab u kožnaha usio było. U maim 5-m kłasie na vučobu ŭ paniadziełak, miarkujučy pa apytańni u čacie, źbirajecca 1 čałaviek. Nu, jak-niebudź spravimsia.

U kancy tydnia TUT.BY ŭ Ministerstvie adukacyi tłumačyli, što pa škołach sapraŭdy razasłali praviły arhanizacyi navučalnaha pracesu: kožny kłas pavinien vučycca va ŭłasnym kabiniecie, rassadžvacca za partami treba pa adnym i karystacca tolki svaimi pryładami, na pierapynkach školnikam rekamiendujuć paźbiahać cialesnych kantaktaŭ, rehularna karystacca antysieptykam i vykonvać asnoŭnyja praviły masačnych režymu. Jak heta ŭsio arhanizavać - vyrašyć kiraŭnik kožnaj ustanovy adukacyi.

Nahadajem, paśla taho jak pa hetaj temie vykazaŭsia Alaksandr Łukašenka (jon ličyć, što dzieciam para viartacca ŭ škoły, Ministerstva achovy zdaroŭja vykazvaje bolš aściarožnaje mierkavańnie), Minadukacyi pryniała rašeńnie, što z paniadziełka dzieci viartajucca na zaniatki. Havorka idzie pra toje, što z 20 krasavika škoły hatovyja pačać adukacyjny praces u raniejšym režymie. Z hetaha dnia pačynajecca čaćviortaja čverć.

• 0
• 0
• 0
• 0
• 0
• 0
• 0
• 0