Prosta kosmas: u Novaj Baravoj pabudavali niezvyčajnuju škołu na 1020 vučniaŭ
U žyłym rajonie Novaja Baravaja skončyłasia budaŭnictva pieršaj škoły — jana pabudavana ŭ kreatyŭnaj i niestandartnaj stylistycy, z terasami, prazrystymi kłasami, majsterniami, antystres-zonami, navukovymi ekspanatami, hazonami i terytoryjami adpačynku na dachu, sportzałami, stadyjonami i tenisnymi kortami. A taksama asobnym spartyŭna-azdaraŭlenčym kompleksam. Raspracoŭkaj prajekta, budaŭnictvam i kamplektacyjaj zajmałasia kampanija «A-100 Deviełapmient». Prajekt abyjšoŭsia zabudoŭščyku ŭ 20 młn dalaraŭ.
Škoła raźličana na 1020 vučniaŭ, a płošča jaje pieravyšaje 14 000 kvadratnych mietraŭ. Zbudavańnie składajecca z čatyroch karpusoŭ — błoka pačatkovaj škoły, błoka siaredniaj škoły, administracyjnaha korpusa i terytoryi hramadskich prastor (kudy ŭvajšli kafe-stałovaja, spartyŭnaja zała, trenažornaja zała, aktavaja zała, tvorčyja majsterni).
Dla siaredniaj i pačatkovaj škoł arhanizavany asobnyja ŭvachody. Kožny ź ich abstalavany zonaj resepšn i prapusknoj sistemaj. Pa ŭsioj terytoryi ŭstalavana sistema videanazirańnia.
Dla małych uładkavany harderoby, pakoi dla snu, zony rekreacyi i zajmalnyja navukovyja ekspanaty. Usie kłasy abstaŭleny meblaj i ŭkamplektavany nieabchodnaj technikaj, a taksama admysłovymi pryborami. Usie dźviery ŭ kłasach prazrystyja — zroblena heta dla stvareńnia atmaśfiery davieru i adkrytaści.
Školnyja łabaratoryi i majsterni, a taksama biblijateka buduć całkam abstalavanyja kampanijaj «A-100 Deviełapmient»: u ich ustalujuć kamputary ź licenzijnym softam, stanki, pryłady, šviejnyja mašynki, reaktyvy i łabaratorny invientar. Biblijateku napoŭniać knihami i padručnikami.
U škole stvorana biezbarjernaje asiarodździe z sučasnymi liftami, sanvuzłami i dušavymi dla ludziej ź invalidnaściu.
Siarod važnych adroźnieńniaŭ — terasy i dach, na jaki možna patrapić z čatyroch roznych miescaŭ. Svaje terasy, u pryvatnaści, atrymali kafe i biblijateka. Placoŭki na dachu ŭklučajuć darožki, hazon i łaŭki.
Taksama pradumanyja 13 zon rekreacyi, pryčym dla roznych dziaciej — starejšych i maładziejšych, aktyŭnych i spakojnych. Na kožnym paviersie sabranyja navukovyja ekspanaty, jakija ŭ hulniavoj formie demanstrujuć zakony fiziki — ad «praviła ryčahu» da raspaŭsiudžvańnia hukavych chval i aptyčnych iluzij. Dla razhruzki praduhledžany «kutki cišyni». A dla prychilnikaŭ muzyki ŭstalavana pijanina dla hrańnia nahami.
Terytoryja škoły zajmaje 4,6 hiektary. Pahaniać miač možna budzie na dvuch palach z štučnym pakryćciom dla junijorskaha futbołu i mini-futbołu. Pobač — placoŭka z prahumavanym pakryćciom dla hulni ŭ valejboł, baskietboł i tenis. Jość taksama rampa dla skiejtbordynhu i workout-zony z trenažorami. Pakłapacilisia taksama ab arelach, tenisnych stałach, hulniavych i raźvićciovych placoŭkach.
Budynak škoły złučany śpiecyjalnaj halerejaj sa spartyŭna-azdaraŭlenčym kompleksam. U im raźmieščana dva basiejny (adzin daŭžynioj 25 mietraŭ, druhi — dla dziaciej), dźvie sauny, pavierchni z padahrevam, trenažornaja zała, tancavalnaja zała, a taksama kafe i vialiki choł dla naviedvalnikaŭ. Spartyŭny centr sprajektavany takim čynam, kab u im mahli zajmacca i školniki, i žychary rajona Novaja Baravaja.
Z nadychodam viasny i spryjalnych umoŭ nadvorja zabudoŭščyk pačaŭ pravodzić raboty pa azielanieńni terytoryi škoły. Tut buduć vysadžany liścianyja i chvojnyja drevy, šmathadovyja dekaratyŭnyja travy i pavojnyja raśliny, a taksama šmatlikija hazony.
U krasaviku 2020 hoda kampanija «A-100 Deviełapmient» pieradaść «Škołu Budučyni» dziaržavie. Zaniatki tut pačnucca ŭžo 1 vieraśnia. Usiaho ž u Novaj Baravoj budzie dziejničać čatyry škoły. Zaraz idzie prajektavańnie druhoj škoły, dzie budzie realizavana ekałahičnaja tematyka i ŭžytyja «zialonyja» rašeńni.
Ciapier čytajuć
Biełarus nabyŭ kvateru ŭ Ispanii, ale jaje zaniali akupasy. Ciapier jon nie moža jaje viarnuć39
Kamientary