Anarchistam Jemialjanavu i Komaru dali pa 7 hadoŭ kałonii ŭzmocnienaha režymu za akcyi la budynkaŭ suda i SIZA ŭ Minsku
Siońnia, 12 lutaha, u sudzie Savieckaha rajona stalicy abviaścili prysud dvum anarchistam — Mikitu Jemialjanavu i Ivanu Komaru za vosieńskija akcyi: spačatku čyrvonaj farbaj byŭ zapeckany budynak haradskoha suda, a potym z druhoj sproby kaktejlem Mołatava byli paškodžany dźviery adnaho z budynkaŭ SIZA, piša Tut.by.
Kožnaha prysudzili da 7 hadoŭ pazbaŭleńnia voli ŭ kałonii ŭzmocnienaha režymu. Takoje rašeńnie pryniaŭ sudździa Alaksandr Jakunčychin.
Pa prośbie advakataŭ prysud čytali całkam, na heta syšło dźvie hadziny.
Anarchistaŭ pryznali vinavatymi pa ŭsich epizodach. Tolki adnosna akcyi kala SIZA sud zamianiŭ artykuł pra «paškodžańni historyka-kulturnaj kaštoŭnaści» na inšuju, prosta «paškodžańnie majomaści» (218-y artykuł zamiest 344 KK). Choć sankcyja amal taja ž: až da 3-10 hadoŭ pazbaŭleńnia voli.
Sud paličyŭ, što ŭ abvinavačanych nie było namieru na paškodžańnie mienavita histaryčnaha abjekta. Choć jon i ŭvachodzić u skład historyka-kulturnaj kaštoŭnaści «Zamak Piščały» 2-j katehoryi, ale papieradžalnaj šyldy zvonku niama, jak taho patrabuje zakon.
Napiaredadni prakuror Maksim Sieniŭ prasiŭ pryznačyć kožnamu z abvinavačanych pa 7 hadoŭ u kałonii ŭzmocnienaha režymu.
Sud prachodziŭ pry ŭzmocnienych mierach biaśpieki. Ludzi, jakija pryjšli na praces, vymušanyja byli stajać u čerhach da ramak na nadhlad: adna ź ich była kala ŭvachodu ŭ budynak, druhuju ŭstalavali na ŭvachodzie ŭ zału suda. Pa kalidorach prahulvalisia ludzi ŭ cyvilnym, na hrudziach u ich možna było zaŭvažyć kamiery, jak u kantraloraŭ u transparcie. Na jašče adnu kamieru zdymali usich, chto ŭvachodziŭ u budynak suda.
Sudziać anarchistaŭ, jakija niaŭdała sprabavali dakinuć «kaktejl Mołatava» da Vaładarki. Škoda — 1,5 rubla
Ciapier čytajuć
Zahnuŭsia biznes člena chakiejnaj kamandy Łukašenki, jaki abiacaŭ pabudavać łyžny maniež za Viarchoŭnym sudom uzamien na łasyja ŭčastki1
Kamientary