Makiej na pryjomie ŭ honar Kaściuški cytavaŭ Bžezinskaha. A Marzaluk zładziŭ jamu avacyju
«Źbihnieŭ Bžezinski nazvaŭ Tadevuša Kaściušku cudoŭnym hierojem dźviuch braterskich nacyj — palakaŭ i biełarusaŭ, jaki zmahaŭsia nie tolki za svaju svabodu, ale i za svabodu amierykancaŭ», — zajaviŭ ministr zamiežnych spraŭ Biełarusi Uładzimir Makiej na pryjomie ŭ honar dnia naradžeńnia Tadevuša Kaściuški.
«Jak i dla Biełarusi, šlach da suvierenitetu ZŠA, Polščy i Litvy byŭ doŭhim i ciažkim», — adznačyŭ biełaruski ministr.
Siońniašni pryjom na siomym paviersie hatela DoubleTree by Hilton byŭ niezvyčajny.
Niezvyčajny, tamu što najčaściej pryjomy daje adna kraina, a zaprašeńni na siońniašniuju imprezu minski bamond atrymaŭ ad imieni adrazu dvuch dypłamataŭ: pasła Polščy Artura Michalskaha i časovaha pavieranaha ŭ spravach ZŠA ŭ Biełarusi Dženifer Mur.
Bolš za toje, na pryjomie prysutničali adrazu dva ministry zamiežnych spraŭ: biełaruski Uładzimir Makiej i litoŭski Linas Linkiavičus.
Da ŭdzielnikaŭ pryjomu ŭ videazapisie źviarnulisia taksama dziaržsakratar ZŠA Majk Pampiea i ministr zamiežnych spraŭ Polščy Jacak Čaputovič.
Abjadnaŭ čatyry krainy ŭradženiec Biełarusi, patryjot Rečy Paspalitaj i hieroj vajny za niezaležnaść ZŠA Tadevuš Banavientura Kaściuška.
Choć data nie kruhłaja — 274-ja hadavina sa dnia naradžeńnia, ale atmaśfiera na pryjomie była asablivaja, i heta źviazanaje z tymi pieramienami, jakija adčuvajucca ŭ adnosinach Biełarusi i krain Zachadu.
Raniej dzień naradžeńnia Kaściuški ŭ Minsku tak nie adznačaŭsia.
«Naša mierapryjemstva pryśviečanaje adnamu z samych viadomych i słavutych u śviecie ŭradžencaŭ Biełarusi Tadevušu Kaściušku, imia jakoha važna dla Biełarusi, ZŠA, Polščy i, z ulikam histaryčnaha kantekstu, Litvy. Nas pryciahvaje ŭ Kaściušku nievierahodny razmach jaho asoby», — skazaŭ Uładzimir Makiej.
«Paŭsiudna Tadevuš Kaściuška pakinuŭ pa sabie hłyboki i niezabyŭny śled», — pierakanany kiraŭnik biełaruskaha MZS.
Jak adznačyŭ Uładzimir Makiej, zasłuhi Tadevuša Kaściuški byli vysoka acenienyja jašče pry žyćci. Jon atrymaŭ hanarovaje amierykanskaje i francuzskaje hramadzianstvy. Atrymlivaŭ taksama ščodryja hrašovyja i ziamielnyja padarunki, u tym liku ad kanhresu ZŠA, brytanskaha parłamienta, uradaŭ Šviecyi i Francyi, rasijskaha impieratara Paŭła I.
«Vychadziec z terytoryi siońniašniaj Bresckaj vobłaści Tadevuš Kaściuška ŭ pramym sensie słova zakłaŭ kamień u padmurak adnoj z samych pavažanych u vajennaj śfiery navučalnych ustanoŭ — Vajennaj akademii ZŠA ŭ Vest-Pojncie. Darečy, dniami ŭ Biełarusi ź vizitam znachodziŭsia adzin z byłych studentaŭ hetaj akademii, dziaržaŭny sakratar ZŠA Majkł Pampiea, ź jakim była razmova ab nieabchodnaści dalejšaha raźvićcia dvuchbakovych adnosin. Jon taksama skazaŭ, što kožny ŭ akademii viedaje imia Tadevuša Kaściuški. Siońniašniaje mierapryjemstva šmat u čym źjaŭlajecca jarkim praciaham hetaha vizitu».
Ministr zamiežnych spraŭ Biełarusi źviarnuŭ uvahu, što jość roznyja mierkavańni datyčna dziejnaści Tadevuša Kaściuški, jak, darečy, kožnaj vyklučnaj asoby ŭ historyi. «Ale, niahledziačy na nieadnaznačnaść acenak fihury Kaściuški, nie stavicca pad sumnieŭ vieličynia jaho ŭździejańnia na ludziej i chod histaryčnych padziej», — zajaviŭ Uładzimir Makiej.
Kiraŭnik zamiežnapalityčnaha viedamstva taksama zajaviŭ, što Biełaruś z pavahaj stavicca da ahulnaj historyi, navat kali ŭ joj jość sprečnyja staronki. Nie treba dzialić, kamu bolš — Biełarusi, Litvie, Polščy, ZŠA ci navat Šviejcaryi abo Francyi naležyć imia Kaściuški», — ličyć ministr.
Kožnuju pramovu prysutnyja sustreli apładysmientami. Padkreślena doŭha i emacyjna paśla pramovy Uładzimira Makieja plaskali deputat Pałaty pradstaŭnikoŭ Ihar Marzaluk i doktar histaryčnych navuk Valancin Hołubieŭ, jakija stajali ŭ hety momant pobač.
Varta adznačyć, što raniej Ihar Marzaluk nie raz dakazvaŭ, što Kaściuška — hieroj polski, a nie biełaruski.
Ciapier čytajuć
Były vykładčyk Iniaza pierajšoŭ na biełaruskuju ŭ emihracyi. Jon razvažaje pra los univiersiteta, biełarusaŭ za miažoj i adroźnieńnie nas ad palakaŭ77
Kamientary