Volha Karač pačynaje abaronu transhiendaraŭ — u ich niešta nie tak ź identyfikacyjnym numaram u pašparcie

Dyrektarka hramadzianskaj kampanii «Naš dom» Volha Karač vyrašyła prasoŭvać zakonaprajekt pa abaronie pravoŭ transhiendaraŭ.

Nahadajem, što transhiendary — heta ludzi, jakija źmianili poł. U Biełarusi takija apieracyi pravodziacca biaspłatna.

«Ja miarkuju, što ŭ Biełarusi zaraz kala 1000 transhiendaraŭ. Heta majo mierkavańnie, statystyčnych ličbaŭ ja nie maju», — pryznajecca Karač. Ale z hatoŭnaściu tłumačyć važnaść abranaj prablemy:

«Zrazumieła, što prablemy transhiendaraŭ tyčacca nievialikaj kolkaści ludziej, naŭrad ci jakaja babulka ź Biešankovičaŭ pračynajecca ranicaj z dumkaj pra transhiendaraŭ. Ale našaj kampanii važna, kab navat hetaja niešmatlikaja katehoryja ludziej mahła być pačutaj i mieła mahčymaść vyrašyć ich prablemu».

Pavialičyć

Jana zhadvaje krasamoŭny prykład dyskryminacyi transhiendaraŭ — biełaruski pašpart.

«Kali čałaviek atrymlivaje pašpart, jamu prysvojvajecca identyfikacyjny numar. I bolš jaho źmianić nielha.

Pieršaja ličba ŭ hetym numary ŭkazvaje na poł čałavieka. Kali čałaviek mianiaje poł, a razam z tym i pašpart, stary identyfikacyjny numar zastajecca.

Heta taŭro i napamin pra minułaje, ad jakoha niemahčyma pazbavicca!

Praz heta ŭ transhiendarnych ludziej uźnikajuć prablemy, kali jany ŭładkoŭvajucca na pracu abo mianiajuć bankaŭskuju kartku. Im davodzicca «spaviadvacca» starońnim ludziam i tłumačyć, čamu tak — a heta zaŭsiody dyskamfort», — ličyć Volha Karač.

Dyk a što jana prapanuje rabić ź identyfikacyjnym numaram? Kankretnaha adkazu ŭ Karač niama.

«Heta tema dla dyskusii, dla šyrokaha abmierkavańnia. My dumajem dałučyć da abmierkavańnia milicyju, spytacca ŭ ich, jak jany bačyć vyrašeńnie prablemy. Ludzi, jakija sutyknulisia z dyskryminacyjaj, ličać, što pavinna być mahčymać numar zamianić.

Ja dumaju, što treba naohuł zamianić identyfikacyjnyja numary takim čynam, kab zrabić ich hiendarna-niejtralnymi. Pracy vielmi šmat, bo hety numar prachodzić u šmat jakich dakumientach, u tych ža vizach. Treba pisać zapyt u MUS, vyśviatlać, ci płanujucca źmieny ŭ pašpartach biełarusaŭ. Ja atrymała pašpart u 2018 hodzie, i tam pa-raniejšamu jość pryviazka da połu».

Identyfikacyjny numar pačynajecca z advolnaj ličby. Raniej ža ličby «1», «3» i «5» stavilisia mužčynam, jakija naradzilisia ŭ 19, 20 i 21 stahodździach adpaviedna. A «2», «4» i «6», adpaviedna, žančynam.

Adnak cymus situacyi ŭ tym, što milicyja zrabiła pašparty «hiendarna-niejtralnymi» jašče ŭ 2012 hodzie. Ciapier identyfikacyjny numar pačynajecca z advolnaj ličby dla tych, chto ŭpieršyniu atrymlivaje pašpart.

Ale hramadzianie, jakija ŭpieršyniu atrymali pašparty da 2012 hoda, zastajucca z raniejšym numaram.

«Škada, što [mahčymy] «adziny kandydat» Pavieł Sieviaryniec budzie znoŭ kazać tolki pra tradycyjnyja kaštoŭnaści, pra tradycyjnyja siemji, a heta značyć, što prablemy i transhiendaraŭ, i ŁHBT-supolnaści znoŭ zastanucca pa-za ŭvahaj», — padsumoŭvaje Volha Karač.

• 0
• 0
• 0
• 1
• 0
• 0
• 0
• 0