Murał z Kamiennaj Horki pryznali najlepšym u śviecie pa vynikach hałasavańnia ŭ listapadzie

Rabotu biełaruskaha mastaka Jaŭhiena Sasiury «Ličbavy śviet», jakaja źjaŭlajecca častkaj manumientalnaha art-trypcichu «Budučynia» ŭ staličnym mikrarajonie Kamiennaja Horka, nazvali najlepšaj u śviecie. Hałasavańnie prachodziła na mižnarodnaj płatformie Street Art Cities, kamanda jakoha papiarednie vybrała 16 najbolš zaŭvažnych manumientalnych rośpisaŭ, jakija byli zrobleny ŭ listapadzie ŭ roznych krainach, paviedamlaje Źviazda.

Pavialičyć

Pieramožcam apytańnia, paviedamili aktyvisty art-prajektu Urban Myths, staŭ vykanany ŭ technicy fotarealizmu murał na 9-paviarchoŭcy pa vulicy Prytyckaha, 134. Jaho aŭtar — uradženiec Pinska Jaŭhien Sasiura. Mastak pracuje pad tvorčym psieŭdanimam mutus i ŭžo dobra viadomy na radzimie jak aŭtar pieršaha lehalnaha rośpisu ŭ rodnym horadzie (2012), murałaŭ-paštovak z łandšaftami staroha Pinska (2016), rośpisaŭ u miežach mižnarodnaha fiestyvalu Vulica Brasil i kamiercyjnych rabot pa zamovie dziaržaŭnych ustanoŭ i haradskich uładaŭ. Jaŭhien užo raskazvaŭ, što rabota «Ličbavy śviet» pryśviečanaja suviazi śvietu hłabalnych kamunikacyj, tradycyjnaha ładu žyćcia pryrody: «U vobrazie hałoŭnaj hieraini spałučylisia sučasnaja dziaŭčyna, žycharka Minska, i piersanaž słavianskaj mifałohii, bahinia Makaš, jakaja apiekavałasia tkactvam i inšymi žanočymi ramiostvami, a taksama čałaviečaha losu naohuł». Dźvie druhija častki trypcichu «Budučynia», jaki simvalizuje ruch Biełarusi ź siońnia ŭ zaŭtra — murał «Fryłans» sierbskaha mastaka Artez i tvor ispanca Slim «Hieroi novaha času», raźmieščanyja na susiednich šmatpaviarchoŭkach.

Da mižnarodnaha pośpiechu Jaŭhien Sasiura stavicca vielmi spakojna: «Ja nie ŭsprymaŭ by heta jak niejkuju nadzvyčaj surjoznuju padzieju, prosta padpisčyki adnaho z mastackich abjadnańniaŭ prahałasavali za ŭpadabanuju rabotu. Ci buduć novyja murały? Biezumoŭna, ale ŭžo ŭ nastupnym siezonie — zaraz nazapašvaju i pradumvaju novyja idei, jakich zaŭždy chapaje». Zrešty, tut možna zapiarečyć ścipłaści biełaruskaha mastaka: mižnarodnaja supołka Street Art Cities, jakaja ŭchvaliła jaho rabotu, z 2017 hoda dziejničaje ŭ 570 haradach 79 krain śvietu i ŭtrymlivaje infarmacyju pra mastackija raboty bolš čym 24300 aŭtaraŭ! U pryvatnaści, u Biełarusi «palaŭničyja na vuličnyja rośpisy» naličyli ŭžo zvyš 600 cikavych i vartych uvahi stryt-art abjektaŭ, pradstaŭlenych na interaktyŭnaj karcie.

Jak adznačaje kamanda prajektu Street Art Cities, pieramoha biełarusa stała «krychu niečakanaj» — jon nabraŭ 53% hałasoŭ ad bolš čym tysiačy prychilnikaŭ stryt-artu z roznych krain i abyšoŭ suśvietna viadomych vuličnych mastakoŭ INTI z Čyli, Lula Goce ź Ispanii i Sasha Korban z Ukrainy.

• 0
• 0
• 0
• 0
• 0
• 0
• 0
• 0