Kaledž u Vidzach ustalavaŭ va ŭłasnym dvary pomnik z rasijskim dvuchhałovym arłom FOTA
Uvahu na heta źviarnuŭ viciebski žurnalist Źmicier Kazakievič, jaki pachodzić ź Vidzaŭ. Padčas adnaho z naviedvańniaŭ rodnaha miastečka ŭ Brasłaŭskim rajonie jon pabačyŭ pamiatny kamień z hierbam Rasijskaj impieryi
Kazakievič na svajoj staroncy ŭ fejsbuku napisaŭ: «Pryjechaŭ na radzimu - i na tabie: kamień. Mała było kaviarni «Tradicija 1803», dyk jašče kamień upiorli […], cara-baciušku prypomnili. I heta, kali što, na radzimie Tamaša Vaŭžeckaha [adzin z kiraŭnikoŭ paŭstańnia 1794 hoda — «NN»], jaki tut vučyŭsia ŭ jezuickaj škole i jaki pachavany ŭ Vidzach. Mnie prykra. Darečy, taja samaja jezuickaja škoła była zasnavanaja ŭ Vidzach na pačatku 18 st».
Vyśvietliłasia, što pamiatny znak byŭ adkryty sioleta jašče ŭ červieni. Namieśnica dyrektara Vidzaŭskaha dziaržaŭnaha prafiesijna-techničnaha kaledža pa vučebna-vychavaŭčaj rabocie Nina Łapkoŭskaja tak patłumačyła situacyju:
«U 1803 hodzie byŭ ukaz pa adkryćci ŭjeznych haradskich vučyliščaŭ. Takoje vučylišča było adkrytaje ŭ tym liku i ŭ Vidzach. U nas vyvučałasia ahranamija, byli asnovy prafiesijnaj adukacyi. My znajšli adpaviednyja dakumienty ŭ archivach.
I heta była Rasijskaja impieryja, tamu my ŭstalavali taki pamiatny znak. Heta vyklučna naša bačańnie, nam nichto jaho nie naviazvaŭ. U nas byŭ daśledčy prajekt, ź jakim my zaniali pieršaje miesca na respublikanskim konkursie. Ustalavali pamiatny znak z pavahaj da minułaha. Usio było za srodki kaledža, nam nichto nie dapamahaŭ. Uvieś prajekt zrobleny pad kiraŭnictvam dyrektara Michaiła Śmirnova, jon byŭ inicyjatar, a ź im pahadziŭsia ŭvieś piedahahičny kalektyŭ», — skazała spadarynia Łapkoŭskaja.
Vidzy — ahraharadok u Brasłaŭskim rajonie Viciebskaj vobłaści.
Kamientary