Były kiraŭnik ANT Kisiel zdaje katedž u Drazdach za $6500 na miesiac. Jak vam interjery? ŠMAT FOTA
Były kiraŭnik kanała ANT Ryhor Kisiel zdaje ŭ arendu svoj katedž u Drazdach. Adpaviednaja abjava źjaviłasia na sajtach z katałohami nieruchomaści.
Za arendu doma na vulicy Račnoj prosiać $6500 na miesiac. Dakładnaja łakacyja doma nie paznačana, ale identyfikavać haspadara nieskładana. Na ścianie ŭ adnym z pakojaŭ možna zaŭvažyć partret Kisiala. U inšym visić šarž na Kisiala i inšych prapahandystaŭ ź dziaržaŭnaha telebačańnia — Juryja Kazijatku, Alaksandra Zimoŭskaha.
Haspadar doma admoviŭsia kamientavać situacyju. «A z čaho vy ŭziali, što ja niešta zdaju? — udakładniŭ Kisiel i praciahnuŭ: — Heta majo pryvatnaje žyćcio, a detali pryvatnaha žyćcia ja nie kamientuju».
Eks-kiraŭnik ANT atrymaŭ nadzieł u Drazdach u siaredzinie 2000-ych. Jak i ŭsim inšym pradstaŭnikam łukašenkaŭskaj namienkłatury, elitnaja ziamla dastałasia jamu zadarma albo amal zadarma.
Jaho susiedzi pa bakach — Viktar Šejman i śviatar Fiodar Poŭny
Ryhor Kisiel — unikalny žychar Drazdoŭ, bo zmoh niejkim čynam pabudavać na svaich 15 sotkach ažno dva katedžy. Adnym vałodaje jon, druhim — dačka Alena. Niezrazumieła, jaki ź ich zdajecca ŭ arendu.
«Na pieršym paviersie raźmieščany haścinaja, stałovaja, kuchnia, spalnia z sanvuzłom, haściny pakoj, sanvuzieł, u jakim ŭstalavanaja dušavaja kabina z łaźniaj, kabiniet, trenažornaja zała, pralnia. Na druhim paviersie raźmieščany try pakoi, prastornaja spalnia z panaramnym aknom, sanvuzieł, harderobny. U domie zrobleny sučasny ramont ź jakasnych budaŭničych materyjałaŭ. Dom całkam ukamplektavany ŭsioj nieabchodnaj meblaj i bytavoj technikaj, u kožnym pakoi ŭstalavany kandycyjanier. Razumnaja płaniroŭka doma dazvalaje adčuvać siabie kamfortna ŭ luby čas hoda. Aŭtanomnaje aciapleńnie. Dla parkoŭki aŭto jość haraž i miesca na ŭčastku. Na prydamavoj terytoryi vykanany łandšaftny dyzajn, ustalavanaja prastornaja altanka, stvoranaja dekaratyŭnaja sažałka», — havorycca ŭ abviestcy.
Ryhor Kisiel
Naradziŭsia ŭ 1955 u vioscy Zdudzičy Śvietłahorskaha rajona. Skončyŭ žurfak BDU (1979). Pracavaŭ u haziecie «Mahiloŭskaja praŭda» (1979—1987), u Mahiloŭskim abkamie KPB (1987—1990), redaktaram haziety «Mahiloŭskija viedamaści» (1990—1994). Staršynia Biełteleradyjokampanii (1994—2000), pasoł u Rumynii (2000—2002), staršynia praŭleńnia ANT (2002—2017). Udaviec, maje dvuch dziaciej.
Kamientary