10 śniežnia 1948 hoda Hienieralnaja asambleja AAN pryniała Usieahulnuju dekłaracyju pravoŭ čałavieka.
10 śniežnia 1948 hoda Hienieralnaja asambleja AAN pryniała Usieahulnuju dekłaracyju pravoŭ čałavieka.
Aficyjna hetuju datu adznačajuć z 1950 hoda. Hienasambleja abviaściła Usieahulnuju dekłaracyju pravoŭ čałavieka ahulnaj normaj, da dasiahnieńnia jakoj pavinny imknucca narody ŭsich krain, bieručy pad uvahu, što dekłaracyja źjaŭlajecca vialikim krokam napierad na šlachu čałaviečaha prahresu.
Jak paviedamiŭ BiełaPAN staršynia adzinaj zarehistravanaj u Biełarusi respublikanskaj pravaabarončaj arhanizacyi «Biełaruski Chielsinkski kamitet» (BCHK) Aleh Hułak, hety dzień jaho arhanizacyja sustrakaje z «aściarožnym aptymizmam». «Hod byŭ vielmi cikavy z punktu hledžańnia pravaabaroncaŭ. Heta była niejkaja niezrazumiełaja sinusoida, jakaja nieviadoma čym skončycca», — zajaviŭ A.Hułak.
«Hod pačaŭsia z taho, što byli vyzvaleny palityčnyja źniavolenyja — Mikałaj Statkievič, Andrej Klimaŭ, Źmicier Daškievič, Artur Fińkievič, žurnalist Alaksandr Zdvižkoŭ i pradprymalnik Mikałaj Aŭtuchovič, — zaznačyŭ pravaabaronca. — Ministerstva justycyi admoviłasia ad isku da BCHK, a Partyja kamunistaŭ Biełaruskaja paśpiachova pieražyła šaścimiesiačny pieryjad prypynieńnia svajoj dziejnaści».
Zatym, pavodle słoŭ A.Hułaka, uźnikła «sprava čatyrnaccaci»— maładych ludziej, asudžanych za akcyju pratestu pradprymalnikaŭ; sieli za kraty Siarhiej Parsiukievič i Andrej Kim. Potym byli vyzvaleny Alaksandr Kazulin, Kim i Parsiukievič, a niezaležnyja kandydaty ŭ deputaty atrymali čas u efiry i niekatoryja pasłableńni ŭ viadzieńni ahitacyjnaj kampanii padčas parłamienckich vybaraŭ.
«I ciapier, pad ciskam Jeŭropy, my bačym niekatoryja pasłableńni — u kijoskach źjavilisia dźvie niezaležnyja haziety, «Narodnaja vola» i «Naša niva», prysud apošniamu fihurantu «spravy čatyrnaccaci» Alaksandru Barazienku nie źviazany z pazbaŭleńniem voli», — skazaŭ kiraŭnik BCHK.
Na jaho dumku, da krasavika nastupnaha hoda, kali zakančvajecca maratoryj na sankcyi Jeŭropy ŭ dačynieńni da vyšejšych čynoŭnikaŭ Biełarusi, jašče možna budzie ŭbačyć «niejkija prykmiety libieralizacyi, adnak naŭrad ci asobnyja kroki mohuć prasunuć vyrašeńnie prablem z pravami čałavieka ŭ Biełarusi».
«My i ŭ dalejšym budziem imknucca da palapšeńnia situacyi z pravami čałavieka ŭ Biełarusi. I Dzień pravoŭ čałavieka, jaki źjaŭlajecca faktyčna našym prafiesijnym śviatam, my praviadziem na bajavym pastu», — zajaviŭ A.Hułak.
Kamientary