«Šancaŭ niama»: Tadevuš Kandrusievič adkazaŭ nakont inicyjatyvy bieatyfikacyi Franciška Skaryny

U adkaz na inicyjatyvu adnosna bieatyfikacyi Franciška Skaryny, ź jakoj 16 kastryčnika vystupiła Zhurtavańnie biełarusaŭ śvietu «Baćkaŭščyna», Mitrapalit Minska-Mahiloŭski, staršynia Kanfierencyi katalickich biskupaŭ, arcybiskup Tadevuš Kandrusievič vystupiŭ z nastupnaj zajavaj. Tekst adkazu źmieščany na sajcie catholic.by.

«Na «Chryścijanskim infarmacyjnym partale krynica.info» źjaviłasia infarmacyja pra toje, što ZBS «Baćkaŭščyna» zaachvočvaje pisać listy probašču minskaj parafii sv. Simona i sv. Aleny ks. kanoniku Uładzisłavu Zavalniuku z prośbaj ab inicyjavańni pracesu bieatyfikacyi našaha słavutaha pieršadrukara doktara Franciška Skaryny.

U suviazi z hetym, znachodziačysia na pryśviečanym moładzi Sinodzie Biskupaŭ, jaki ŭ hetyja dni adbyvajecca ŭ Vatykanie, ad imia Kanfierencyi Katalickich Biskupaŭ u Biełarusi zajaŭlaju nastupnaje.

Pa-pieršaje, Katalicki Kaścioł ź vialikaj pavahaj adnosicca da asoby i zasłuhaŭ biełaruskaha pieršadrukara Franciška Skaryny. U minułym hodzie pradstaŭniki Kaścioła prymali aktyŭny ŭdzieł u śviatkavańni Jubileju 500-hodździa vydańnia im Biblii na rodnaj movie i ź vialikaj radaściu pryniali b paćvierdžańnie jaho śviataści.

Pa-druhoje, pracedura bieatyfikacyi (praces abviaščeńnia błahasłaŭlonym) u Katalickim Kaściole akreślivajecca Apostalskaj Kanstytucyjaj Divinus perfectionis Magister papy Jana Paŭła II. Pavodle hetaha dakumienta, bieatyfikacyjny praces moža raspačać tolki biskup taho miesca, dzie pachavany čałaviek, pra bieatyfikacyju jakoha idzie havorka.

Na žal, dakładna nieviadoma, dzie pachavany Francišak Skaryna. Hety fakt pakul što nie daje nijakich šancaŭ na raspačaćcie pracesu jaho bieatyfikacyi.

Pa-treciaje, kaściolnaje zakanadaŭstva praduhledžvaje šmat inšych umovaŭ dla raspačaćcia bieatyfikacyjnaha pracesu,

i adnoj z hałoŭnych źjaŭlajecca pierakanańnie Božaha naroda ŭ śviataści hetaha čałavieka i ŭ hieraičnaści cnotaŭ, jakija jon praktykavaŭ u svaim ziamnym žyćci. Akramia taho, z momantu śmierci kandydata dla bieatyfikacyi pavinien isnavać jaho kult siarod viernikaŭ.

Tak, naprykład, my pamiatajem, jak padčas pachavańnia sv. Jana Paŭła II 8 krasavika 2005 h. na płoščy Śviatoha Piatra ŭ Rymie źjavilisia płakaty z nadpisam: «Užo śviaty».

Pa-čaćviortaje, Kanfierencyja Katalickich Biskupaŭ u Biełarusi nie davała nijakich paŭnamoctvaŭ ks. kanoniku Uładzisłavu Zavalniuku źbirać materyjały dla inicyjavańnia pracesu bieatyfikacyi Franciška Skaryny. Praces bieatyfikacyi źjaŭlajecca pieradusim jurydyčnym aktam, u jakim nieabchodna zachoŭvać normy kaściolnaha zakanadaŭstva.

Toje, što prapanujuć aŭtary inicyjatyvy, pra jakuju paviedamlaje «Chryścijanski infarmacyjny partał krynica.info», źjaŭlajecca niekananičnym dziejańniem i nie maje nijakaj jurydyčnaj mocy ŭ Katalickim Kaściole.

Sabranyja takim čynam materyjały nie mohuć być dałučanyja da pracesu bieatyfikacyi ŭ vypadku jaho raspačaćcia biskupam miesca, dzie pachavany naš słavuty ziamlak.

• 0
• 0
• 0
• 0
• 0
• 0
• 0
• 0