Top-mieniedžarka biełaruskaha «Vajbiera» raskazała pra seksizm u IT i pra toje, jakich abnaŭleńniaŭ varta čakać u dadatka
Vajbieram u Biełarusi karystajecca bolš za 5 miljonaŭ čałaviek, suśvietnaja ž aŭdytoryja dadatka pierasiahnuła miljard zarehistravanych karystalnikaŭ.
Ofisy Viber mieściacca pa ŭsim śviecie, ale hałoŭnyja centry raspracoŭki — u Tel-Avivie i Minsku. Niadaŭna minskaja kamanda pierajechała ŭ novaje pamiaškańnie, a sam dadatak źmianiŭ łahatyp i palepšyŭ svaju funkcyjanalnaść.
U suviazi z hetym my vyrašyli raspytać kiraŭnicu centra raspracoŭki Vieraniku Kiesavu, jakich jašče navinak čakać karystalnikam, a zaadno raspytali pra jaje šlach u IT.
Daviedka: Vieranika Kiesava źjaŭlajecca kiraŭnicaj centra raspracoŭki Viber u Biełarusi. Kiruje im z momantu zasnavańnia kampanii viasnoj 2012 hoda. Adnačasova z hetym źjaŭlajecca prajekt-mieniedžarkaj kamandy, jakaja stvaraje Viber dla iOS pryład: ajfonaŭ i ajpadaŭ. Vypusknica Biełaruskaha dziaržaŭnaha ŭniviersiteta pa śpiecyjalnaści «vykładčyk fiłasofii i sacyjahumanitarnych dyscyplin».
«NN»: Raskažycie krychu pra siabie: dzie vyraśli, žyli, čamu pryjšli ŭ IT?
— Ja naradziłasia ŭ Rasii, pad Tułaj. Kali mnie spoŭniłasia 6 hadoŭ, siamja pierajechała ŭ Biełaruś, ale da hetaha my paśpieli pažyć u Sibiry, Uźbiekistanie i Hruzii. Ja šmat čaho pamiataju z taho času, i takija pastajannyja mihracyi — cikavy dośvied, jon sfarmiravaŭ šmat karysnych jakaściaŭ. Mnie zdajecca, uva mnie dahetul žyvie duch kačeŭnika, choć pry siońniašnim rytmie žyćcia heta składana ŭjavić.
U IT ja pryjšła nie adrazu: chacieła dakładna vyznačycca, čym ja chaču zajmacca i dzie zmahu prymianić svaje navyki.
Za plačyma byŭ salidny dośvied pracy z zamiežnymi zamoŭcami ŭ rekłamnym ahienctvie i niadrennaja anhlijskaja mova. Mnie chaciełasia praciahvać raźvivacca, ale ŭžo ŭ inšaj vobłaści. Na toj momant IT-śfiera ŭ Minsku była ŭžo dosyć raźvitaja, tamu ja chutka znajšła dla siabie vakansiju asistentki mieniedžera prajektaŭ u aŭtsorsinhavaj kampanii. Pamiataju, što bolš za ŭsio ŭ pieršy dzień na novaj pracy mianie ŭraziła vafielnica i mahčymaść rychtavać prysmaki naŭprost na ofisnaj kuchni. Paźniej ja pieražyła mnostva nadzvyčajnych padziej, ale hetyja vafli pamiataju da hetaha času (uśmichajecca).
«NN»: Kažuć, što praz «papsovaść», zvyšpapularnaść prafiesii ajcišnikaŭ siarod vypusknikoŭ kursaŭ i VNU stanovicca ŭsio mienš dobrych śpiecyjalistaŭ, ci tak heta? Ci adčuvajecie vy heta pa tych, chto prychodzić da vas u kampaniju na sumoŭi?
— Bolšaja častka patencyjnych supracoŭnikaŭ Viber — heta ŭžo sfarmiravanyja śpiecyjalisty ź vialikim dośviedam pracy. Siońnia jon jość navat u studentaŭ i niadaŭnich vypusknikoŭ.
Ja liču, što papularnaść i zapatrabavanaść peŭnych śfier — heta vydatny stymuł raźvivać svoj patencyjał, kab być kankurentnazdolnym na rynku.
Z kožnym hodam my majem usio bolš prafiesijnaj litaratury ŭ adkrytym dostupie dla samastojnaha vyvučeńnia, źjaŭlajucca novyja adukacyjnyja prahramy, adkryvajucca škoły z aŭtarskimi kursami. Kali student vybiraje papularnuju prafiesiju, jon pavinien razumieć usiu adkaznaść u adnosinach da svajoj budučyni. Jamu sapraŭdy treba jak maha raniej pačać napracoŭvać praktyčnyja navyki i vybudoŭvać karjeru, inakš jaho abhoniać bolš matyvavanyja.
«NN»: Što było samym składanym, kali vy tolki ŭlivalisia ŭ śfieru?
— Syści roŭna ŭ 7 hadzin viečara (uśmichajecca).
Na samaj spravie, spačatku składanym zdavałasia absalutna ŭsio: razumieć prafiesijny słenh, raźbiracca ŭ techničnych zadańniach, navat stasavacca z prahramistami, bo jany zaŭsiody viedajuć bolš, čym ty. U pieršy hod ja litaralna nočyła na pracy.
U adnoj sa svaich knih piśmieńnik Małkolm Hładueł raspracavaŭ formułu 10 000 hadzin, zhodna ź jakoj mienavita stolki času treba inviestavać u jakuju-niebudź dziejnaść, kab dasiahnuć značnaha pośpiechu. Ich ja tady, viadoma, nie adpracavała, ale była da hetaha vielmi blizkaja.
U luboj pracy važna razumieć, što heta mienavita toje, čym ty chočaš zajmacca. Kali cikaŭnaść mocnaja, budzie i matyvacyja.
«NN»: Čamu da hetaha času sutykajemsia z vykazvańniem «IT — nie žanočaja śfiera»? I čamu kali mužčyny bačać žanočyja IT-forumy, dla ich heta adrazu ž stanovicca abjektam dla žartaŭ?
Prykład seksisckich kamientaroŭ u adras žančyn-prahramistak.
— «IT — nie žanočaja śfiera»… Navat na ŭzroŭni vykazvańnia dla mianie hučyć nienaturalna. Abmiažoŭvać raźvićcio kampanii talenavitymi śpiecyjalistami peŭnaha hiendara, jak minimum, niełahična i nieefiektyŭna. Siońnia ŭ Viber u pracentnych suadnosinach bolš chłopcaŭ, ale heta nie vynik palityki našaha HR-adździeła i nie častka karparatyŭnaj kultury. Na sumoŭi my aceńvajem tolki ŭzrovień prafiesijanalizmu i asabistyja jakaści.
«NN»: Ci sutykalisia vy ź jakimi-niebudź zaŭvahami, niepryjemnymi seksisckimi kamientarami ŭ svoj adras za ŭsiu svaju karjeru?
— Ofis raspracoŭki Viber u Biełarusi — heta vialiki kalektyŭ, bolš za 100 čałaviek. Usie jany padzielenyja na kamandy, u kožnaj ź jakich svaja śpiecyfika kamunikacyi i ŭnutranyja tradycyi. Farmiravańnie takoha asiarodździa — praces spantanny i arhaničny. Ja liču, što heta vielmi važna dla zdarovaj atmaśfiery ŭnutry kamandy. Pry hetym Viber prytrymlivajecca ahulnych praviłaŭ uzajemnaj pavahi supracoŭnikaŭ adzin da adnaho, niezaležna ad połu, uzrostu, źniešnaści. Umieńnie trymacca čužych miežaŭ, a taksama być vietlivym i karektnym — nieadjemnaja charaktarystyka darosłaha čałavieka.
Mnie paščaściła paźbiehnuć seksisckich kamientaroŭ u svoj adras u prafiesijnym asiarodździ. U asabistym žyćci z hetym sutykaješsia našmat čaściej. Z časam ja stała bolš radykalna reahavać na padobnaje parušeńnie maich miežaŭ.
Ale nie mahu nie adznačyć, što naša hramadstva ŭsio ž mianiajecca, niachaj heta adbyvajecca i nie tak chutka, jak chaciełasia b. Pytańni hiendarnaj roŭnaści ŭsio čaściej padymajucca ŭ masavaj kultury i ŭ socyumie ŭ cełym, ŚMI ŭsio bolš raskazvajuć pra realnyja situacyi, dzie pravy žančyn uščamlalisia. Usio heta pakrysie vychoŭvaje ŭ žančynach niejki łokus, jaki dazvalaje pry nieabchodnaści dać adpor, a ŭ mužčynach — pavažlivaje staŭleńnie da žančyn.
Idealnaja karcina śvietu dla mianie — dzie nie treba dzialić ludziej na mužčyn i žančyn.
«NN»: Ci sychodziać vašy supracoŭniki-mužčyny ŭ dekret?
— Niekalki supracoŭnikaŭ asnoŭnaha ofisa ŭ Izraili — tak. U Minsku pra takija vypadki mnie nieviadoma. Viber daje adzin vychadny dla baćkoŭ u dzień rodaŭ. Jak praviła, chłopcy sami biaruć adpačynak na niekalki tydniaŭ, kab dapamahčy svaim žonkam kłapacicca pra niemaŭla. My vielmi cenim i zaachvočvajem taki kłopat i prychilnaść da siamiejnych kaštoŭnaściaŭ.
«NN»: Što dla vas značyć być paśpiachovaj? U čym heta prajaŭlajecca?
— Ja starajusia nie dumać takimi katehoryjami. U apošni čas štoviečar składaju śpis ź piaci rečaŭ abo padziej, jakija prynieśli mnie radaść u hety dzień. Kali adrazu zapisvaju ŭsie piać štuk, to ŭ maim razumieńni dzień byŭ sapraŭdy paśpiachovym.
«NN»: Čaho nam čakać ad Viber? Jakich abnaŭleńniaŭ?
— Ciapier my davoli časta vypuskajem abnaŭleńni: kala dvuch razoŭ na miesiac. Z apošniaha — hrupy dla nieabmiežavanaj kolkaści ŭdzielnikaŭ, jarkija paviedamleńni, «Abranaje» ŭ dapaŭnieńniach dla čataŭ i hetak dalej. U raspracoŭcy znachodzicca šmat novych fič, niekatoryja ź ich byli vybranyja na padstavie zapytaŭ karystalnikaŭ praz słužbu padtrymki.
«NN»: Viedaju, što niekatorych karystalnikaŭ napružvaje rekłama ŭ dadatku…
— Viber — heta biaspłatny dadatak pa abmienie paviedamleńniami i zaŭsiody budzie takim. Kab jon byŭ maksimalna karysnym dla karystalnikaŭ, funkcyjanał uvieś čas raźvivajecca. I jak luby kamiercyjny pradukt, mesendžar taksama patrabuje inviestycyj. U tym liku z boku partnioraŭ, jakija zacikaŭlenyja ŭ prasoŭvańni na płatformie. Važna adznačyć, što ŭsie rekłamnyja farmaty Viber raspracavanyja maksimalna natyŭnymi, kab nie pieraškadžać znosinam karystalnikaŭ. Naprykład, baniery, jakija źjaŭlajucca tolki paśla zaviaršeńnia zvankoŭ; rekłama, jakuju možna ŭbačyć tolki paśla zapampoŭki stykieraŭ; biznes-čaty, ad jakich pry žadańni ŭ luby momant možna adpisacca naciskam na adnu knopku ŭ nastrojkach.
«NN»: Ci budzie redyzajn desktopnaha dadatka, ci źjavicca mahčymaść bolš kamfortna pierasyłać paviedamleńni?
— My nie schilnyja razvažać pra toje, čaho jašče nie zrabili. Razam z hetym składana admaŭlać, jak chutka siońnia mianiajecca paradyhma dyzajnu. Asobnyja karekciroŭki ŭnosiacca amal z kožnym abnaŭleńniem apieracyjnaj sistemy. Sačycie za navinami.
«NN»: A jak nakont biełaruskaj movy ŭ dadatku?
— Na dadzieny momant dadatak Viber łakalizavany bolš čym na 30 moŭ śvietu. Biełaruskaja nie ŭvachodzić u hety śpis. Ale, mahčyma, u budučyni situacyja źmienicca.
Ciapier čytajuć
Byłyja žonka i dziaŭčyna Pratasieviča abjadnalisia i pryjšli da jaho novaj niaviesty, kab adpomścić. I pahražajuć sudom4
Kamientary