U Instytucie historyi NAN Biełarusi padčas kruhłaha stała «Aktualnyja prablemy daśledavańnia, restaŭracyi i muziejefikacyi Kreŭskaha zamka» ekśpierty pradstavili vyniki apošnich archieałahičnych rabot, a taksama raskazali, jakim stanie Kreŭski zamak paśla zaviaršeńnia rabot.
Pieršy etap restaŭracyi zamka, metaj jakoha było zachavańnie aŭtentyčnych frahmientaŭ, što dajšli da sučasnaści praz stahodździ, užo paśpiachova zavieršany. Pa słovach kiraŭnicy adździeła kultury Smarhonskaha rajvykankama Taćciany Ražavaj, ciapier pierad śpiecyjalistami staić novaja ambicyjnaja zadača.
«My chočam zrabić zamak nie prosta kamiennymi ścienami, a žyvym abjektam, dzie turysty zmohuć adkryć dla siabie šmat novaha. Naša meta — kab Kreŭski zamak pracavaŭ na raźvićcio historyi i patryjatyzmu. My zaprašajem ekśpiertaŭ da sumiesnaj pracy nad stvareńniem muzieja, jaki nieŭzabavie pavinien źjavicca ŭ Krevie», — skazała pradstaŭnica rajvykankama.
Pra niepasredny chod rabot raskazała hałoŭnaja architektarka prajekta prajektnaha filijała «Biełrestaŭracyja» Alena Karlanok. Pa jaje słovach, daśledavańni 2025 hoda całkam paćvierdzili zdahadki architektaraŭ.
«Nami była znojdziena treciaja vieža zamka. Raskapany kontur zbudavańnia z mahutnymi padmurkami i sklapienistymi pierakryćciami. Akramia taho, u niepasrednaj blizkaści ad jaje vyjaŭlenaja małaja nižniaja brama. Sčasanyja kamiani dazvolili nam dakładna vyznačyć jaje habaryty, a znojdzienyja pa bakach zbudavańni śviedčać pra sistemu abarony hetaha ŭjezdu», — patłumačyła Alena Karlanok.
Hrafik rabot užo vyznačany. U krasaviku prajektnaja dakumientacyja budzie padadziena na dziaržaŭnuju ekśpiertyzu. Budaŭniča-mantažnyja raboty płanujecca pačać letam.
«My raźličvajem zaviaršyć budaŭniča-mantažnyja raboty da kanca biahučaha hoda. Adrazu paśla hetaha paŭstanie zadača muziejefikacyi pamiaškańniaŭ i stvareńnia pastajannaj muziejnaj ekspazicyi», — dadała architektarka prajekta.
Mahčyma, mienavita tut była viaźnica Kiejstuta. Archieołah pryadkryvaje sakrety Kreŭskaha zamka
Na raskopkach u Kreŭskim zamku znajšli niekalki kukuciaŭ. Što heta takoje?
Padčas raskopak u Kreŭskim zamku vyjavili cikavuju asablivaść padmurka
Stvorana mastackaja 3D rekanstrukcyja Kreŭskaha zamka
«Małaja brama budzie vielmi cikavaj i adekvatnaj». Archieołahi padvodziać vyniki sioletnich raskopak na Kreŭskim zamku i strojać płany na nastupny siezon
Kamientary