Ukrainskaja kampanija ŭkłała $20 miljonaŭ u aršanski zavod, jaki Łukašenka choča nacyjanalizavać

Na zaparoskim pradpryjemstvie «Motor Sič», jakoje naležyć ukrainskamu biznesoŭcu Viačasłavu Bahusłajevu i vałodaje 60 adsotkami akcyj Aršanskaha avijaramontnaha zavodu, pakul nie kamentujuć zajavu Alaksandra Łukašenki pra nacyjanalizacyju hetaha biełaruskaha pradpryjemstva, piša Radyjo Svaboda.

U toj ža čas stała viadoma, što ciapier na pradpryjemstvie adbyvajecca narada.

Sioleta ŭ traŭni prezydent «Motor Sič» Viačasłaŭ Bahusłajeŭ lotaŭ u Miensk na pieramovy pra źmienu biełaruskaha akcyjanera aršanskaha zavodu. Pavodle deputata, jaki ŭvachodzić u top-25 najbolš zamožnych biznesoŭcaŭ Ukrainy, mienavita «miascovy investar» admoviŭsia vykonvać svaju častku investycyjnych abaviazańniaŭ.

«Tamu ŭvieś «syr-bor». Svaju častku investycyjnych abaviazańniaŭ «Motor Sič» vykanaŭ na 110%», — kazaŭ Viačasłaŭ Bahusłajeŭ ukrainskim žurnalistam, kamentujučy ŭ traŭni paviedamleńni pra mahčymuju pieradaču kantrolnaha pakietu akcyj Aršanskaha avijaramontnaha zavodu dziaržaŭnamu pradpryjemstvu «Biełspecźnieštechnika».

«Nie razumieju, adkul heta: uziać i zabrać. Na rynku možna tolki kupić abo vykupić. Tak pracuje ŭsia Eŭropa. Treba raźličycca z akcyjanerami», — skazaŭ u traŭni Viačasłaŭ Bahusłajeŭ. Pavodle jaho, Aršanski avijaramontny zavod zaviaršyŭ 2017 hod z prybytkam.

I tady ž prezydent «Motor Sič» udakładniŭ, što z momantu nabyćcia ŭ 2012 hodzie kantrolnaha pakieta akcyj Aršanskaha zavodu, na toj momant prablemnaha i vystaŭlenaha ŭładami Biełarusi na pryvatyzacyju, ukrainskaje pradpryjemstva ŭkłała ŭ raźvićcio avijaramontnaha zavodu prykładna 20 miljonaŭ dalaraŭ.

Ukrainskija ŚMI paviedamlali, što Viačasłaŭ Bahusłajeŭ paśla apošniaha raŭndu pieramoŭ vymušany byŭ viarnucca ź Miensku ŭ Kijeŭ rejsavym samalotam, bo jahony «Jak-40» aryštavali na aeradromie ŭ Voršy ŭ jakaści zakładu, kab prymusić jaho admovicca ad finansavych pretenzij da biełaruskaha zavodu i da taho ž vypłacić «niaŭstojku» za nibyta nievykanańnie investycyjnych abaviazańniaŭ. Paźniej, jak śćviardžajuć niekatoryja krynicy, ukrainski biznesoviec nie pajechaŭ na sustreču ŭ administracyju biełaruskaha prezydenta abmiarkoŭvać umovy pieradačy akcyj Biełarusi, choć i paćvierdziŭ svaju hatoŭnaść admovicca ad akcyj.

Va Ŭkrainie šerah ekspertaŭ rynku nie vyklučajuć, što biełaruskija ŭłady vyrašyli nacyjanalizavać Aršanski avijaramontny zavod, bo padazravali, što jon moža pierajści va ŭłasnaść Rasiei z pryčyny prodažu 56% akcyj ukrainskaha «Motor Sič» kitajskaj karparacyi Beijing Skyrizon Aviation Industry Investment Co.

Taja ŭhoda letaś stała pradmietam kryminalnaj spravy, jakuju raspačała Słužba biaśpieki Ŭkrainy. Pavodle śledčych, toje, što akcyi ŭkrainskaha pradpryjemstva pradavalisia zamiežnikam pakietami pa 10% praz afšory, vyklikała padazreńni, što novym realnym ułaśnikam najvažniejšaha dla abarony Ŭkrainy pradpryjemstva moža akazacca zusim nia taja kampanija, što była zajaŭlena.

Pavialičyć

U toj ža čas ukrainskija eksperty vyklučajuć, što biełaruskija ŭłady nacyjanalizujuć biełaruskija aktyvy Viačasłava Bahusłajeva na zakaz svajho ŭkrainskaha kalehi Piatra Parašenki. Chutčej sprava ŭ tym, što na mahutnaściach Aršanskaha avijaramontnaha zavodu rychtavalisia vypuskać madyfikacyju viertalota «Mi-8», jaki dziakujučy novamu ŭkrainskamu ruchaviku značna pieraŭzychodziŭ by rasiejskaha kankurenta «Mi-17». I heta ŭžo nie mahło spadabacca Rasiei.

Pavodle asobnych infarmacyjnych krynic, Aršanski avijaramontny zavod paśla bankructva budzie abjadnany ŭ chołdynh z analahičnym pradpryjemstvam u Baranavičach i pieradadzieny ŭ skład dziaržpradpryjemstva «Biełśpiecźnieštechnika». Vykazvajecca i takaja versija, što Aršanski avijaramontny zavod, dakładniej, jaho ŭźlotna-pasadačnaja pałasa vielmi spadabaŭsia biełaruskaj kampanii «Bremina hrup», jakaja buduje pobač multymadalny lahistyčny centar.

• 0
• 0
• 0
• 0
• 0
• 0
• 0
• 0