Hara sa śniehu i paŭtary tony maroziva: kala «Minsk-Areny» adznačyli dzień naradžeńnia biełaruskaha płambiru FOTA
U Minsku 30 červienia prajšoŭ samy maštabny dzień naradžeńnia hetaha leta — biełaruskamu płambiru spoŭniłasia 80 hadoŭ. 15 tysiač haściej atrymali pašparty i na adzin dzień stali «hramadzianami» «Krainy maroziva» — tematyčnaha parku zabaŭ, jaki pabudavali kala «Minsk-Areny» ŭ honar jubileju.
Niahledziačy na viecier i tolki 17 hradusaŭ ciapła za 6 hadzin śviata haściami byli źjedzieny paŭtary tony płambiru.
Pieršyja pašparty «hramadzianie» «sałodkaj krainy» pačali atrymlivać jašče za 10 chvilin da pačatku festu, a haściami stali nie tolki minčanie. Na 3-mietrovaj karcie z konturam Respubliki Biełaruś, na jakoj naviedvalniki nitačkami i stužkami praciahvali maršruty ad stalicy da svaich rodnych haradoŭ, źjavilisia Ńju-Jork, Varkuta i Nižni Noŭharad.
— Upieršyniu ŭ Biełarusi płambir vypuścili na našaj fabrycy 80 hadoŭ tamu. Jon staŭ pieršym marozivam, jakoje pradavali va ŭsich kutkach našaj krainy, — raspaviadaje namieśnik dyrektara pa markietynhu brendu «Bieły polus» Maksim Žurovič. — Nam stała cikava, jaki jon — toj samy smak bieź Je-dabavak. My adnavili na pradpryjemstvie aŭtentyčny recept pieršaha biełaruskaha maroziva. Nam spadabałasia, što atrymałasia, i naradziłasia ideja ŭ honar jubileju vypuścić limitavanuju partyju płambiru bieź Je-dabavak — «Biełaha polusa 1938».
Bolš za 1000 viełasipiedystaŭ i skiejtaraŭ naviedali fest na svaim ekatransparcie. Za heta kožny ź ich atrymaŭ pa płambiry «Bieły polus». Cikava, što darosłyja biełarusy vybirali pieravažna eskimo, a maleńkija — płambir ŭ vafielnym «stakančyku».
Pakaštavać «toje samaje» maroziva možna było za pieramohu ŭ letnim kiorlinhu i ŭ hulni ŭ sapraŭdnyja śniežki. Dvuchmietrovaja horka sa śniehu stała hałoŭnym miescam dla sełfi.
Ź jaho lapili śniežki, a samyja śmiełyja «hramadzianie» katalisia i załazili na viaršyniu. Śnieh, darečy, za ceły dzień tak i nie rastaŭ.
Zima ŭ «Krainie maroziva» na hetym nie skončyłasia. Na śviacie ŭpieršyniu adkryli hałoŭny katok krainy ŭ «Minsk-Arenie», dostup da jakoha ŭ zvyčajnyja dni jość tolki ŭ prafiesijnych spartsmienaŭ.
Paśla aktyŭnych zabaŭ padzaradzicca enierhijaj možna było na pieršym u krainie śvit-korcie. Tam prapanoŭvali pakaštavać «Bieły polus» z topinhami, małočnyja kaktejli na jaho asnovie i hałoŭnuju stravu festu — draniki z marozivam. Jany stali nastolki papularnymi, što ŭžo ŭ druhoj pałovie dnia ŭ restaran pryjšłosia davozić bulbu.
Niahledziačy na «nialetniaje» nadvorje, źmierznuć hości festu prosta nie paśpieli: 6 hadzin majstar-kłasaŭ na tancplacoŭcy i 4 hadzinny open-air na biełaruskaj movie zrabili svaju spravu.
Na hałoŭnaj scenie sa svaimi lepšymi chitami vystupili Akute, «Małanka Arkiestr», «Razbitaje serca pacana» i finalistka nacyjanalnaha adboru na Jeŭrabačańnie 2018 — Shuma. Jaje hadzinnym setam zaviaršyŭsia pieršy jubilej biełaruskaha płambiru ŭ farmacie vialikaha haradskoha fiestyvalu.
Kamientary